ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າວັນທີ 28 ເມສາ 2022, ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມການຈັດຕັ້ງເຜີຍແຜ່ເຊື່ອມຊຶມ, ຜັນຂະຫຍາຍ ມະຕິກອງປະຊຸມຂອງສູນກາງພັກ-ລັດຖະບານ ແລະ ມະຕິຂອງອົງຄະນະພັກ-ອົງການປົກຄອງແຂວງ ໂດຍການເປັນປະທານຂອງ ສະຫາຍ ສົມຈິດ ຫັບລະກອນ ກໍາມະການປະຈໍາພັກແຂວງ, ຮອງປະທານຄະນະປະຈໍາສະພາປະຊາຊົນແຂວງ, ມີ ຄະນະປະຈໍາສະພາປະຊາຊົນແຂວງ, ຄະນະໜ່ວຍພັກ, ສະມາຊິກພັກ ພ້ອມດ້ວຍພະນັກງານ-ລັດຖະກອນພາຍໃນສະພາປະຊາຊົນແຂວງເຂົ້າຮ່ວມ.

ກອງປະຊຸມເຜີຍແຜ່ເຊື່ອມຊຶມໃນຄັ້ງນີ້ ກໍເພື່ອເຮັດໃຫ້ຄະນະນໍາ-ຄະນະພັກ ແລະ ພະນັກງານ-ລັດຖະກອນພາຍໃນສະພາປະຊາຊົນແຂວງ ໄດ້ຮັບຮູ້, ເຊື່ອມຊືມ ຢ່າງເລິກເຊິ່ງ ຕໍ່ບັນດາແນວທາງ, ນະໂຍບາຍ, ມະຕິ, ຄໍາສັ່ງ ຂອງພັກ; ເພື່ອເຮັດໃຫ້ການນຳພາຊີ້ນໍາ ຂອງຄະນະນໍາ-ຄະນະພັກສະພາປະຊາຊົນແຂວງ ມີການຫັນປ່ຽນໃໝ່ຢ່າງຕັ້ງໜ້າ, ຈະແຈ້ງ, ຮັດກຸມ ແລະ ເລິກເຊິ່ງ ຕໍ່ກັບການປະຕິບັດພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ.

ກອງປະຊຸມໄດ້ຮັບຟັງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ, ເລຂາທິການສະພາປະຊາຊົນແຂວງຂຶ້ນເຜີຍແຜ່ເຊື່ອມຊຶມ ມະຕິ ກອງປະຊຸມຄົບຄະນະ ຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XI; ມະຕິ ກອງປະຊຸມຄົບຄະນະ ຄັ້ງທີ 4 ຂອງຄະນະບໍລິຫານງານພັກແຂວງ ສະໄໝທີ XI; ຮັບຟັງສະຫາຍ ພັທ ຄໍາດາ ໂສລະພົມ ຮອງເລຂາໜ່ວຍພັກ, ປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ຂຶ້ນເຜີຍແຜ່ເຊື່ອມຊຶມ ຄໍາແນະນໍາຂອງນາຍົກລັດຖະມົນຕີ ວ່າດ້ວຍການຈັດຕັ້ງຜັນຂະຫຍາຍຄໍາສັງຂອງຄະນະເລຂາທິການສູນການພັກ ສະບັບເລກທີ 190/ຄລສພ, ລົງວັນທີ 29 ກັນຍາ 2021 ວ່າດ້ວຍການປັບປຸງກົງຈັກການຈັດຕັ້ງ ຂອງບັນດາກະຊວງ, ອົງການ ແລະ ທ້ອງຖິ່ນ ສະບັບເລກທີ 01/ນຍ, ລົງວັນທີ 6 ທັນວາ 2021; ຄໍາສັ່ງແນະນໍາຂອງເຈົ້າແຂວງ ວ່າດ້ວຍການເພີ່ມທະວີປ້ອງກັນ, ສະກັດກັ້ນ ແລະ ການຄວບຄຸມການແຜ່ລະບາດຂອງພະຍາດ Covid -19 ດ້ວຍການດໍາລົງຊີວິດແບບໃໝ່ (New Normal) ສະບັບເລກທີ 5454/ຈຂ, ລົງວັນທີ 18 ພະຈິກ 2021; ຄໍາສັ່ງຂອງຄະນະເລຂາທິການສູນກາງພັກ ວ່າດ້ວຍການປັບປຸງກົງຈັກການຈັດຕັ້ງ ຂອງບັນດາກະຊວງ, ອົງການ ແລະ ທ້ອງຖິ່ນ ສະບັບເລກທີ 190/ຄລສພ, ລົງວັນທີ 29 ກັນຍາ 2021; ຮັບຟັງ ສະຫາຍ ສົມຈິດ ຫັບລະກອນ ເຜີຍແຜ່ເຊື່ອມຊຶມ ມະຕິຂອງຄະນະເລຂາທິການສູນກາງພັກ ວ່າດ້ວຍການເພີ່ມທະວິການນໍາພາຂອງພັກ ເພື່ອສ້າງການຫັນປ່ຽນໃໝ່ຢ່າງແຂງແຮງ ແລະ ເລິກເຊິ່ງວຽກງານພະນັກງານ ສະບັບເລກທີ 03/ຄລສພ, ລົງວັນທີ 30 ກັນຍາ 2021 ມີບາງຕອນ ສະຫາຍໄດ້ກ່າວວ່າ: ການສ້າງການຫັນປ່ຽນວຽກພະນັກງານ ແມ່ນໜຶ່ງໃນບັນຫາສຸດທີ່ສໍາຄັນ ພົວພັນເຖິງການກໍາອໍານາດ ແລະ ການຄົງຕົວຂອງພັກເຮົາ ກໍຄືຜົນສໍາເລັດຂອງພາລະກິດປ່ຽນແປງໃໝ່ຮອບດ້ານ ມີຫຼັກການຂອງພັກ, ທັງແມ່ນບັນຫາຮີບດ່ວນສະເພາະໜ້າ ແລະ ທັງເປັນບັນຫາຍຸດທະສາດພື້ນຖານ, ຍາວນານ ເພື່ອສ້າງໃຫ້ມີກໍາລັງຖັນແຖວພະນັກງານ (ນໍາພາ-ຄຸ້ມຄອງ ແລະ ວິຊາການ) ທີ່ພຽບພ້ອມ ແລະ ປ່ຽມລົ້ນໄປດ້ວຍຄຸນທາດການເມືອງ, ຄຸນສົມບັດສິນທໍາປະຕິວັດທີ່ໜັກແໜ້ນ, ມີນໍ້າໃຈເສຍສະຫຼະສູງ, ເປັນແບບຢ່າງທີ່ດີໃນການດໍາລົງຊີວິດ, ມີຈັນຍາບັນ, ຈັນຍາທໍາ, ມີຄວາມຮູ້, ຄວາມສາມາດ-ຊໍານິຊໍານານງານ, ມີແບບແຜນເຮັດວຽກແບບວິທະຍາສາດ, ຮັບໃຊປະຊາຊົນ ແລະ ປະເທດຊາດຢ່າງສຸດໃຈ, ສືບທອດພາລະກິດປະຕິວັດຂອງພັກ ແລະ ຂອງຊາດລາວໃຫ້ຍືນຍົງຄົງຕົວ. ພ້ອມກັນນັ້ນ, ສະຫາຍ ຍັງໄດ້ຮຽກຮອງໃຫ້ຄະນະນໍາ-ຄະນະພັກ, ສະມາຊິກພັກ ແລະ ພະນັກງານ-ລັດຖະກອນພາຍໃນສະພາປະຊາຊົນແຂວງ ຈົ່ງເປັນເຈົ້າການໃນການຈັດຕັ້ງຜັນຂະຫຍາຍບັນດາເນື້ອໃນ ມະຕິກອງປະຊຸມຂອງສູນກາງພັກ-ລັດຖະບານ ແລະ ມະຕິຂອງອົງຄະນະພັກ-ອົງການປົກຄອງແຂວງ ເຂົ້າສູ່ວຽກງານຕົວຈິງ ແລະ ນໍາໄປຈັດຕັ້ງປະຕິບັດໃຫ້ເກີດດອກອອກຜົນຢ່າງເປັນຮູບປະທໍາໃນຕໍ່ໜ້າ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ