ເພື່ອປະຕິບັດຕາມຄຳແນະນຳຂອງຄະນະປະຈຳພັກແຂວງ ສະນັ້ນໃນວັນທີ 15 ສິງຫາ 2023 ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໄດ້ຈັດພິທີໂຄສະນາ ແລະ ປາຖະກະຖາວັນສຳຄັນຂອງພັກຂອງຊາດຄື: ວັນຄ້າຍວັນເກີດ ຂອງປະທານສຸພານຸວົງ ຄົບຮອບ 114 ປີ, ວັນສ້າງຕັ້ງແນວລາວສ້າງຊາດ ຄົບຮອບ 73 ປີ, ວັນລັດຖະທຳມະນູນ ຄົບຮອບ 32 ປີ ແລະ ວັນຍຶດອຳນາດທົ່ວປະເທດ ຄົບຮອບ 78 ແລະ 48 ປີ; ພາຍໃຕ້ການເປັນປະທານຂອງທ່ານ ບຸນໂຮມ ເທດທານີ ຮອງເລຂາພັກແຂວງ, ປະທານສະພາປະຊາຊົນແຂວງ; ມີບັນດາທ່ານຄະນະປະຈຳສະພາປະຊາຊົນແຂວງ, ຮອງປະທານຄະນະກຳມະການ, ຄະນະເລຂາທິການ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມຮັບຟັງຢ່າງພ້ອມພຽງ.

ໃນພິທີຄະນະປະຈຳ ແລະ ຄະນະໜ່ວຍພັກ ຂອງສະພາປະຊາຊົນແຂວງໄດ້ພັດປ່ຽນກັນຂຶ້ນໂຄສະນາ ແລະ ເຜີຍແຜ່ບັນດາເນື້ອໃນເອກະສານຂອງວັນສຳຄັນຕ່າງໆ ເພື່ອເຮັດໃຫ້ສະມາຊິກພັກ ແລະ ພັກງານພາຍໃນສະພາປະຊາຊົນແຂວງ ໄດ້ເຊື່ອມຊືມ ແລະ ຮັບຮູ້ເຖິງຄວາມເປັນມາຂອງວັນປະຫວັດສາດທີ່ສຳຄັນຕ່າງ ຂອງຜູ້ນຳທີ່ແສນເຄົາລົບຮັກ ຂອງຊາດ ໃນພາລະກິດຕໍ່ສູ້, ປົດປ່ອຍປະເທດຊາດໃນໄລຍະຜ່ານມາ, ເຂົ້າໃຈຢ່າງເລິກເຊິ່ງເຖິງ ຄວາມໝາຍ, ຄວາມສຳຄັນ ການກຳເນີດຂອງແນວລາວສ້າງຊາດ ແລະ ລັດຖະທຳມະນູນ; ໄດ້ຮູ້ເຂົ້າໃຈ ເຖິງມູນເຊື້ອອັນພິລະອາດຫານ, ມູນເຊື້ອຄວາມສາມັກຄີອັນໜຶ່ງອັນດຽວ ຂອງປະຊາຊົນລາວບັນດາເຜົ່າ ທີ່ສາມາດຍຶດອຳນາດຈາກລັດທິລ່າເມືອງຂຶ້ນແບບເກົ່າ ແລະ ແບບໃໜ່ໄດ້ຢ່າງສົມບູນ ພາຍໃຕ້ການນຳພາອັນປີຊາສາມາດ, ສະຫຼຽວສະຫຼາດ ຂອງພັກປະຊາຊົນປະຕິວັດລາວ.

  ໃນຕ້ອງທ້າຍ ທ່ານ ບຸນໂຮມ ເທດທານີ ຍັງໄດ້ໂອລົມຕໍ່ພິທີ ໂດຍເນັ້ນໃຫ້ພະນັກງານ-ລັດຖະ ກອນພາຍໃນສະພາປະຊາຊົນແຂວງ ຈົ່ງສຶກສາຮ່ຳຮຽນເອົາບົດຮຽນ, ຄຸນສົມບັດສິນທຳປະຕິວັດອັນສູງສົ່ງ, ເພື່ອຍົກສູງສະຕິ, ຕື່ນຕົວເປັນເຈົ້າການຂະຫຍາຍມູນເຊຶ້ອຮັກຊາດ, ຮັກລະບອບປະຊາທິປະໄຕ, ມີຄວາມສາມັກຄີປອງດອງ ແລະ ຊ່ວຍເຫຼື່ອເຊິ່ງກັນ ແລະ ກັນເຂົ້າໃນການປະຕິບັດໜ້າທີ່ອັນມີກຽດ ທີ່ພັກ-ລັດມອບໝາຍໃຫ້ປະສົບຜົນສຳເລັດ ແລະ ເກີດດອກອອກຜົນຢ່າງໃຫຍ່ຫຼວງ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ

020 99 77 7890