ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມຄະນະປະຈໍສະພາປະຊາຊົນແຂວງຈໍາປາສັກ ປະຈໍາເດືອນມີນາ 2022 ໄດ້ໄຂຂື້ນໃນຕອນເຊົ້າຂອງວັນທີ 10 ມີນາ 2022 ນີ້ ຢູ່ທີ່ຫ້ອງປະຊຸມຂອງສະພາປະຊາຊົນແຂວງ ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ, ມີບັນດາທ່ານຮອງປະທານສະພາປະຊາຊົນແຂວງ, ປະທານຄະນະກໍາມະການ, ເລຂາ-ຮອງເລຂາທິການ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ ຢ່າງພ້ອມພຽງ.

ວາລະດໍາເນີນກອງປະຊຸມ, ໄດ້ສະຫຼຸບຄືນການຈັດຕັ້ງປະຕິບັດວຽກງານຂອງເດືອນກຸມພາ ທີ່ຜ່ານມາ ແລະ ວາງແຜນການ ປະຈໍາເດືອນມີນາ 2022, ໄດ້ຄົ້ນຄວ້າກ່ຽວກັບການເລືອກຕັ້ງສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງປາກຊ່ອງ ເພື່ອທົດແທນສະມາຊິກສະພາປະຊາຊົນແຂວງ ທີ່ເສຍຊີວິດ; ຄົ້ນຄວ້າແກ້ໄຂຄໍາສະເໜີຂອງອົງການປົກຄອງແຂວງຈໍາປາສັກ ທີ່ສະເໜີຕໍ່ຄະນະປະຈໍາສະພາປະຊາຊົນແຂວງໃນເດືອນທີ່ຜ່ານມາ ແລະ ຄົ້ນຄວ້າບັນຫາສໍາຄັນອີກຈໍານວນໜຶ່ງ. ເຊິ່ງບັນດາທ່ານຄະນະປະຈໍາສະພາປະຊາຊົນແຂວງ ໄດ້ພ້ອມກັນສຸມໃສ່ໃນການປະກອບຄໍາຄິດເຫັນຕໍ່ເນື້ອໃນບັນຫາທີ່ນໍາເຂົ້າມາຄົ້ນຄວ້າໃນກອງປະຊຸມຄະນະປະຈໍາຄັ້ງນີ້ ບົນພື້ນຖານຄວາມເອກະພາບ ແລະ ຖືກຕ້ອງຕາມລະບຽບກົດໝາຍທີ່ກໍານົດໄວ້.

ໃນຕອນທ້າຍຂອງການດໍາເນີນກອງປະຊຸມ ທ່ານ ສາທອງ ໄຊຍະວົງ ປະທານຄະນະປະຈໍາສະພາປະຊາຊົນແຂວງຈໍາປາສັກ ໄດ້ສະຫຼຸບ ແລະ ໃຫ້ທິດຊີ້ນໍາ ຕໍ່ການຄົ້ນຄວ້າພິຈາລະນາບັນຫາທີ່ນໍາມາຄົ້ນຄ້ວາ, ພ້ອມທັງເນັ້ນໃຫ້ 3 ຄະນະກໍາມະການ ແລະ ຄະນະເລຂາທິການ ຂອງສະພາປະຊາຊົນແຂວງຈໍາປາສັກ ຈົ່ງພ້ອມກັນເພີ່ມທະວີສຸມໃສ່ໃນການຈັດຕັ້ງປະຕິບັດວຽກງານ ຕາມພາລະບົດບາດ, ສິດ ແລະ ໜ້າທີ່ ຄວາມຮັບຜິດຊອບຂອງຕົນ, ໂດຍສະເພາະວຽກງານຕິດຕາມກວດກາ, ວຽກງານການແກ້ໄຂຄໍາຮ້ອງຂໍຄວາມເປັນທໍາຂອງພົນລະເມືອງ ແລະ ການເປັນເສນາທິການໃຫ້ຄະນະປະຈໍາສະພາປະຊາຊົນແຂວງ ໃນການເຄື່ອນໄຫວຈັດຕັ້ງປະຕິບັດວຽກງານຮອບດ້ານ ໃຫ້ມີຄວາມເຂັ້ມແຂງໜັກແໜ້ນ, ຮັບປະກັນປະສິດທິພາບ ແລະ ເຮັດສໍາເລັດຕາມແຜນການລະດັບຄາດໝາທີ່ວາງໄວ້.

(ພາບ-ຂ່າວ: ສົມວິຈິດ ໄຊມົນຕີ)