ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນຈັນ, ວັນທີ 22 ສິງຫາ 2022 ຢູ່ທີ່ຫ້ອງປະຊຸມສະພາປະຊາຊົນ​ແຂວງອຸດົມໄຊ, ທ່ານ ປອ ຢາງກູ້ ຢາງລືໄຊ ຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ ພ້ອມດ້ວຍຄະນະທິມງານຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ, ໄດ້ພົບປະເຮັດວຽກຮ່ວມກັບ​ສະພາປະຊາຊົນ​ແຂວງ, ໂດຍການຕ້ອນຮັບຂອງ ທ່ານ ນ.ຄໍາພອນ ພິມມະຈັນ ຮອງປະທານສະພາປະຊາຊົນ​ແຂວງ, ມີບັນດາທ່ານຄະນະປະຈໍາ ສພຂ, ຄະນະເລຂາທິການ ສພຂ, ແລະ ພະນັກງານສະພາປະຊາຊົນແຂວງ ເຂົ້າຮ່ວມ.

ການເຄື່ອນໄຫວພົບປະເຮັດວຽກຮ່ວມກັບ​ສະພາປະຊາຊົນ​ແຂວງ ຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ໃນຄັ້ງນີ້, ຈຸດປະສົງກໍ່ເພື່ອຕິດຕາມ, ຊຸກຍູ້​ ແລະ ເກັບກໍາຂໍ້ມູນວຽກງານ ສະຖາບັນຄົ້ນຄວ້ານິຕິກໍາສະພາແຫ່ງຊາດແລະ ​ເປັນ​ເທື່ອ​ທໍາ​ອິດ ທີ່ທາງຄະນະທິມງານຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ໄດ້ມາຢ້ຽມຍາມ ແລະ ເຮັດວຽກຢູ່ແຂວງອຸດົມໄຊ. ​ກ່ອນອື່ນຕາງໜ້າຄະນະເລຂາທິການສະພາປະຊາຊົນ​ແຂວງ ກໍ່ໄດ້ລາຍງານ ການເຄື່ອນໄຫວຂອບການພົວພັນ, ກົງຈັກປະສານງານທີ່ຕິດພັນກັບວຽກງານຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ແລະ ຫຼັງຈາກນັ້ນ ບັນດາທ່ານຜູ້ເຂົ້າຮ່ວມ ໄດ້​ປຶກສາ​ຫາລື, ຕີ​ລາຄາຄືນ​ກ່ຽວ​ກັບ​ການເຮັດວຽກ, ການຈັດຕັ້ງປະຕິບັດ​ພາລະ​ບົດບາດ, ສິດ ​ແລະ​ ໜ້າ​ທີ່ ຂອງ​ສະພາ​ແຫ່ງ​ຊາດ ​ແລະ​ ສະພາ​ປະຊາຊົນ​ແຂວງ ເຖິງຂໍ້ສະດວກ, ຫຍຸ້ງຍາກ ແລະ ​ຂໍ້ຄົງຄ້າງ ​ເພື່ອ​ພ້ອມ​ກັນ​ປັບປຸງ​ແກ້​ໄຂ​ໃຫ້ມີການຫັນປ່ຽນທີ່ດີຂຶ້ນ ກ່ຽວກັບການ​ນໍາພາ – ຊີ້​ນໍາ ຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ​​ຕໍ່ກັບ ​ສະພາ​ປະຊາຊົນຂັ້ນ​ແຂວງ ໃນໄລຍະຜ່ານມາ ແລະ ຈະໄດ້ສືບຕໍ່ການ​ພົວພັນ​ປະສານ​ງານ ແລະ ເຄື່ອນໄຫວວຽກງານຮ່ວມກັນໃນຕໍ່ໜ້າ ​ໂດຍສະເພາະແມ່ນເລັ່ງໃສ່ການສ້າງຄວາມເຂັ້ມແຂງໃຫ້ແກ່ ສສຊ-ສສຂ ໄດ້ປະຕິບັດຕາມ 3 ພາລະບົດບາດຂອງຕົນຢ່າງເຕັມສ່ວນ.

ໂອກາດດັ່ງກ່າວທ່ານ ປອ ຢາງກູ້ ຢາງລືໄຊ ຫົວໜ້າສະຖາບັນຄົ້ນຄວ້ານິຕິກໍາສະພາແຫ່ງຊາດ ໄດ້ສະເໜີພາລະບົດບາດຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ, ແຜນການເຝຶກອົບຮົມໃຫ້ແກ່ ສສຊ-ສສຂ ແລະ ວິຊາການທີ່ເປັນໃຫ້ຄະນະປະຈໍາ ສພຂ, ສະມາຊິກ ສພຂ ແລະ ຕອນທ້າຍປະທານໄດ້ມີຄຳເຫັນສະຫຼຸບ ແລະ ກ່າວປິດກອງປະຊຸມ.

ພາບ/ຂ່າວ: ແສງພອນ ອິນນະລົງ.