ດັ້ນກີບເມກ

ເນື່ອງຈາກປີໃໝ່ລາວປີນີ້ ກົງກັບວັນທີ 14, 15 ແລະ 16 ເມສາ ແລະ ສຳລັບວັນທີ 15, 16 ເປັນວັນເສົາ-ວັນອາທິດ ຈຶ່ງມີການພັກຊົດເຊີຍ ເຖິງວັນຈັນທີ 17 ແລະ 18 ວັນຄານ, ການຢຸດພັກຫຼາຍມື້ນັ້ນ ຄົງພາໃຫ້ຫຼາຍຄົນໄດ້ມີເວລາຢູ່ກັບຄອບຄົວ, ບາງຄົນກັບເມືອຢາມບ້ານ ສ່ວນວ່າພວກສາຍເມົາ-ສາຍດື່ມ ກໍຄົງຈະດີໃຈບໍ່ໜ້ອຍຄືກັນ ທີ່ມີເວລາພັກຕໍາຈອກຫຼາຍມື້ ແຕ່ກໍມີສິ່ງທີ່ໜ້າເປັນຫ່ວງ ເຖິງການສັນຈອນໄປມາໃນໄລຍະບຸນປີໃໝ່ ອີງຕາມແຈ້ງການຈາກ ຫ້ອງວ່າການສຳນັກງານນາຍົກ ກໍໄດ້ເນັ້ນໃຫ້ເອົາໃຈໃສ່ຫຼາຍບັນຫາ.

ເລື່ອງການສັນຈອນໄປມາ ແລະ ຮູບແບບການຫຼິ້ນບຸນປີໃໝ່ ແມ່ນເນັ້ນໃຫ້ບຸກຄົນເຄົາລົບຮັກສາຮີດຄອງປະເພນີ, ການຈັດຕັ້ງກ່ຽວຂ້ອງ ກໍຕ້ອງໄດ້ເອົາໃຈໃສ່ເລື່ອງຄວາມສະຫງົບ-ປອດໄພ ທັງຊີວິດ ແລະ ຊັບສິນຂອງປະຊາຊົນ, ກະຊວງປ້ອງກັນຄວາມສະຫງົບ ແລະ ກົມໃຫ່ຍຕຳຫຼວດ, ກົມຕຳຫຼວດຈະລາຈອນ ໄດ້ອອກແຈ້ງການ ຄຳແນະນຳເລກທີ 027/ກຈຈ, ລົງວັນທີ 27 ມີນາ 2023 ກ່ຽວກັບການສັນຈອນໄປມາ ແລະ ຄວາມເປັນລະບຽບຮຽບຮ້ອຍໄລຍະສະຫຼອງປີໃໝ່ລາວ ເຊິ່ງເນັ້ນຫຼາຍຈຸດສຳຄັນເຊັ່ນ: ການຂັບຂີ່ປອດໄພ, ການຄວບຄຸມກວດກາທາດເຫຼົ້າຂອງຜູ້ຂັບຂີ່, ສະກັດກັ້ນການຂັບຂີ່ໄວເກີນຂອບເຂດ.

ຜູ້ຂຽນເຫັນວ່າ: ບັນດາພໍ່ແມ່ຜູ້ປົກຄອງລູກຫຼານຕ້ອງໄດ້ເອົາໃຈໃສ່ຕັກເຕືອນພວກເຂົາ ໃຫ້ມີສະຕິໃນການຂັບຂີ່ສັນຈອນທ່ຽວຫຼິ້ນບຸນປີໃໝ່ ບໍ່ໃຫ້ປະໝາດ ເກີດອຸບັດເຫດສູນເສຍຊັບສິນ, ເປັນການຫຼຸດຜ່ອນ ອັດຕາເກີດອຸບັດເຫດ, ຖ້າວ່າພາກລັດ-ການຈັດຕັ້ງ ເອົາໃຈໃສ່ປະກາດເຕືອນແລ້ວ ພາກພໍ່ແມ່-ຜູ້ປົກຄອງຕ້ອງຕື່ນໂຕ ບອກສອນລູກຫຼານໃຫ້ເອົາໃຈໃສ່ຕໍ່ກົດລະບຽບສັນຈອນ ແລະ ຫຼິ້ນໃຫ້ຖືກຕາມປະເພນີ-ຮີດຄອງອັນດີງາມ.

ບຸນປີໃໝ່ ສິ່ງສຳຄັນທີ່ຂາດບໍ່ໄດ້ຄືການຖືໂອກາດສົມມາ ພໍ່ແມ່ເຖົ້າແກ່ອາວຸໂສ; ຄູອາຈານຜູ້ທີ່ເຮົາເຄົາລົບບູຊາ ເພື່ອຂໍພອນ ແລະ ອວຍພອນໃຫ້ກຳລັງໃຈ ເຊິ່ງກັນ ແລະ ກັນ, ອະນາໄມບ້ານເຮືອນໃຫ້ສະອາດ ການທ່ຽວຫຼິ້ນກິນກໍຕ້ອງໄດ້ກວດເບິ່ງນໍ້າ-ໄຟໃຫ້ປອດໄພຄັກແນ່! ບໍ່ແມ່ນວ່າຟ້າວແຕ່ອອກໄປຫຼິ້ນນຳໝູ່ ຈົນລືມມອດໄຟ; ຫຼິ້ນກິນໃຫ້ປອດໄພ ຂໍແຕ່ຢ່າຝາກຊີວິດຄວາມມ່ວນຊື່ນໄວ້ກັບບຸນປາງດຽວ ບູຮານເຕືອນວ່າ: ຢ່າເມົາຫຼິ້ນເມົາກິນຈົນບໍ່ຄຳນຶງເຖິງຊີວິດ.