ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຂ) ໃນໂອກາດເຄື່ອນໄຫວຢ້ຽມຢາມ ສປປລາວ ຂອງປະທານສະພາແຫ່ງຊາດ ແຫ່ງ ສສ.ຫວຽດນາມ,​ ໃນວັນທີ 16 ພຶດສະພາຜ່ານມາ, ສະຫາຍ ເວືອງ ດິງ ເຫວະ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານສະພາແຫ່ງຊາດ ແຫ່ງ ສສ.ຫວຽດນາມ ໄດ້ມີຄຳເຫັນກ່າວເປີດໃນກອງປະຊຸມສໍາມະນາແລກປ່ຽນບົດຮຽນກ່ຽວກັບກົນໄກ,​ ນະໂຍບາຍ ເພື່ອການຟື້ນຕົວ ແລະ ພັດທະນາເສດຖະກິດ-ສັງຄົມຫຼັງການແຜ່ລະບາດຂອງພະຍາດໂຄວິດ-19. ໃນບັນຍາກາດອັນເຕັມໄປດ້ວຍຄວາມສາມັກຄີ, ຄວາມເບີກບານມ່ວນຊື່ນຂອງປະຊາຊົນລາວ ແລະ ປະຊາຊົນຫວຽດນາມອ້າຍນ້ອງ ທີ່ກຳລັງຈັດຕັ້ງບັນດາກິດຈະກຳຕ່າງໆຢ່າງຕັ້ງໜ້າ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ-ຫວຽດນາມ, ຫວຽດນາມ-ລາວ ຄົບຮອບ 60 ປີ, ວັນເຊັນສົນທິສັນຍາມິດຕະພາບ ແລະການຮ່ວມມື ຫວຽດນາມ-ລາວ, ລາວ-ຫວຽດນາມ ຄົບຮອບ 45 ປີ ແລະພິເສດແມ່ນປີສາມັດຄີມິດຕະພາບ ລາວ-ຫວຽດນາມ 2022.ພະຍາດໂຄວິດ-19 ແມ່ນໄດ້ເກີດຂຶ້ນຢ່າງກະທັນຫັນ ແລະສົ່ງຜົນກະທົບອັນໜັກໜ່ວງ, ຮອບດ້ານເຖິງບັນດາປະເທດໃນທົ່ວໂລກ, ໃນນັ້ນມີປະເທດລາວ ແລະ ຫວຽດນາມ ພວກເຮົາ ໃນສະພາບການດັ່ງກ່າວນັ້ນ, ດ້ວຍຈິດໃຈອັນຮີບດ່ວນ ແລະ ເປັນເຈົ້າການ ສະພາແຫ່ງຊາດ, ຄະນະປະຈຳສະພາແຫ່ງຊາດບັນດາອົງການຂອງສະພາແຫ່ງຊາດ, ຜູ້ແທນສະພາແຫ່ງຊາດ ໄດ້ຍົກສູງຄວາມຮັບຜິດຊອບຂອງຕົນ, ປະ ສານສົມທົບຢ່າງແໜ້ນແຟ້ນກັບລັດຖະບານ, ບັນດາອົງການທີ່ກ່ຽວຂ້ອງ ໄດ້ທາບທາມຄວາມຄິດເຫັນຂອງຜູ້ມີສິດເລືອກຕັ້ງ, ປະຊາຊົນ, ນັກວິທະຍາສາດ, ຜູ້ຊ່ຽວຊານ, ວົງຄະນາຍາດວິສາຫະກິດພາຍໃນ ແລະຕ່າງປະເທດ ດ້ວຍຫຼາຍຮູບການທີ່ແຕກຕ່າງກັນ, ເພື່ອຄົ້ນຄວ້າ ແລະສ້າງບັນດານະໂຍບາຍໂດຍລວມ ໜູນຊ່ວຍການຟື້ນຕົວ ແລະ ພັດທະນາເສດຖະກິດ-ສັງຄົມ.

ມາເຖິງປັດຈຸບັນ, ເສດຖະກິດ ຫວຽດນາມ ໄດ້ມີການປ່ຽນແປງໃໝ່, ບັນດາການເຄື່ອນ ໄຫວດ້ານເສດຖະ ກິດ-ສັງຄົມແມ່ນໄດ້ເປີດປະຕູຄືນໃໝ່, ບັນດານະໂຍບາຍຕອບໂຕ້ກັບການແຜ່ລະບາດຂອງພະຍາດ ແລະ ການພັດ ທະນາເສດຖະກິດ-ສັງຄົມ ໄດ້ເສີມຂະຫຍາຍຢ່າງມີປະສິດທິຜົນ ແລະເຂົ້າສູ່ຊີວິດຕົວຈິງ.

ກອງປະຊຸມສຳມະນາໃນມື້ນີ້ ໄດ້ຈັດຂຶ້ນ ເພື່ອພ້ອມກັນແລກປ່ຽນ ແລະບໍ່ແບ່ງບັນດາບົດຮຽນປະສົບການຕົວຈິງລະຫວ່າງສອງສະພາແຫ່ງຊາດ ລາວ-ຫວຽດນາມ ເຊິ່ງເປັນກອງປະຊຸມສໍາມະນາຄັ້ງທໍາອິດໃນຂອບຂອງຂໍ້ຕົກ ລົງວ່າດ້ວຍການຮ່ວມມືລະຫວ່າງສອງສະພາແຫ່ງຊາດ. ສິ່ງເຫຼົ່ານີ້ແມ່ນເສົາຄໍ້າອັນສຳຄັນ, ມີຄວາມແທດຈິງ, ປະ ກອບສ່ວນອັນໃຫຍ່ຫຼວງຕໍ່ກັບຂະບວນການຟື້ນຕົວ ແລະ ພັດທະນາເສດຖະກິດຂອງ ຫວຽດນາມ.

ຂ້າພະເຈົ້າເຊື່ອໝັ້ນຢ່າງໜັກແໜ້ນວ່າ ໃນກອງປະຊຸມສໍາມະນານີ້ ບັນດາອົງການຂອງລັດຖະບານ,ບັນດາທ່ານຜູ້ແທນສະພາແຫ່ງຊາດ, ສະພາປະຊາຊົນຂອງບັນດາທ້ອງຖິ່ນຂອງສອງປະເທດ ຈະພ້ອມກັນແລກປ່ຽນບົດຮຽນຕົວຈິງຂອງແຕ່ລະປະເທດຢ່າງຕັ້ງໜ້າ ເພື່ອເຮັດໃຫ້ບັນດາບັນຫາທີ່ທັງສອງຝ່າຍມີຄວາມສົນໃຈຮ່ວມກັນໄດ້ມີຄວາມກະຈ່າງແຈ້ງຂຶ້ນຕື່ມ ແລະສຳຄັນກ່ວາໝູ່ ແມ່ນບັນດາຂໍ້ມູນຂ່າວສານ ແລະບັນດາບົດຮຽນທີ່ຖອດຖອນໄດ້ຈາກກອງປະຊຸມສຳມະນາ ຈະເປັນພື້ນຖານອັນມີຄຸນຄ່າໃນຂະບວນການສ້າງ ຫຼືສືບຕໍ່ເຮັດສຳເລັດບັນດາກົນໄກ, ນະ ໂຍບາຍຕ່າງໆ ຮັບໃຊ້ແກ່ການພັດທະນາເສດຖະກິດ-ສັງຄົມຂອງທັງສອງປະເທດໃນສະພາບການໃໝ່.

ປະຊາຊົນຫວຽດນາມ ມີຄວາມເອກອ້າງທະນົງໃຈເມື່ອມີປະຊາຊົນລາວອ້າຍນ້ອງ ເປັນເພື່ອນມິດອັນສະໜິດສະໜົມ, ສະພາແຫ່ງຊາດຫວຽດນາມ ມີຄວາມເອກອ້າງທະນົງໃຈທີ່ມີບັນດາສະຫາຍຜູ້ບໍລິສຸດຜຸດຜ່ອງ, ຍາມໃດກໍຄຽງບ່າຄຽງໄຫຼ່, ຮ່ວມທຸກຮ່ວມສຸກໃນຕະຫຼອດໄລຍະແຫ່ງການຕໍ່ສູ້ກູ້ຊາດໃນເມື່ອກ່ອນ ກໍຄືໃນພາລະກິດການສ້າງສາ ແລະ ພັດທະນາປະເທດປັດຈຸບັນ.

ໃນບັນຍາກາດອັນສະຫງ່າຜ່າເຜີຍ ແລະ ເຕັມໄປດ້ວຍໄມຕີຈິດມິດຕະພາບຂອງກອງປະຊຸມສຳມະນາ ຕາງໜ້າການນຳພັກ, ລັດ ຫວຽດນາມ, ຂໍຢືນຢັນວ່າ: ສະພາແຫ່ງຊາດຫວຽດນາມ ຈະປະສານສົມທົບຢ່າງແໜ້ນແຟ້ນກວ່າເກົ່າກັບສະພາແຫ່ງຊາດລາວ ສືບຕໍ່ສືບທອດ ແລະ ເສີມຂະຫຍາຍບັນດາບົດຮຽນ, ຜົນການຮ່ວມມື, ປະກອບ ສ່ວນຢ່າງຕັ້ງໜ້າເຂົ້າໃນການປັບປຸງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ເຊື່ອໝັ້ນເຊິ່ງກັນ ແລະກັນ ແລະ ຮ່ວມມືຢ່າງຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ໃຫ້ໝັ້ນຄົງຂະໜົງແກ່ນຊົ່ວກາລະນານ ເພື່ອສັນຕິພາບ, ຄວາມໝັ້ນຄົງ, ການຮ່ວມມື ແລະ ພັດທະນາພາກພື້ນ ແລະສາກົນ.