ເພື່ອເປັນການຈັດຕັ້ງຜັນຂະຫຍາຍ ແລະ ໂຄສະນາເຜີຍແຜ່ບັນດາເນື້ອໃນສຳຄັນຕ່າງໆ ທີ່ລັດຖະບານສະ ເໜີຕໍ່ກອງປະຊຸມສະພາແຫ່ງຊາດ ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈ ທັງເປັນການລົງພົບປະຜູ້ມີສິດເລືອກຕັ້ງ ເພື່ອເປັນການລົງເກັບກຳຄຳຄິດເຫັນ ຕໍ່ວຽກງານການຄຸ້ມຄອງບໍລິຫານລັດ ດັ່ງນັ້ນ,ມາໃນລະຫວ່າງວັນທີ 12 ຫາ 13 ກັນຍາ 2023 ນີ້, ທ່ານ ພອນສານ ວິໄລເມັ້ງ ຮອງປະທານຄະນະບໍລິຫານງານສູນກາງສະຫະພັນກໍາມະບານລາວທັງເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ທ່ານ ພູທອນ ພຸດທະຂັນຕິ ກຳມະການຄະນະປະຈຳສະພາປະຊາຊົນແຂວງ ເລຂາທິການສະພາປະຊາຊົນແຂວງ ທັງເປັນສະມາຊິກສະພາປະຊາຊົນແຂວງ ຊຸດທີII ປະຈໍາເຂດເລືອກຕັ້ງນະຄອນໄກສອນພົມວິຫານ; ທ່ານ ສີທາ ສົງວິໄລ ສະມາຊິກສະພາປະຊາຊົນແຂວງ ຊຸດທີII ປະຈໍາເຂດເລືອກຕັ້ງນະຄອນໄກສອນພົມວິຫານ ແລະ ທ່ານ ນາງ ດວງຈັນ ແສນວິເສດ ສະມາຊິກສະພາປະຊາຊົນແຂວງ ຊຸດທີII ປະຈໍາເຂດເລືອກຕັ້ງນະຄອນໄກສອນພົມວິຫານ
ໄດ້ລົງເຄື່ອນໄຫວພົບປະເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 05 ຂອງສະພາແຫ່ງຊາດຊຸດທີ IX ແລະ ສະພາປະຊາຊົນແຂວງຊຸດທີ II ຢູ່ນະຄອນໄກສອນພົມວິຫານ ໂດຍການຕ້ອນຮັບຂອງທ່ານ ສົມໝາຍ ສົງວິໄລ ກຳມະການຄະນະປະຈຳພັກນະຄອນ ຮອງເຈົ້ານະຄອນໄກສອນພົມວິຫານ ພ້ອມດ້ວຍບັນດາທ່ານຄະນະພັກນະຄອນ,ຫົວໜ້າ-ຮອງຫົວໜ້າຫ້ອງການ, ກໍາລັງປກສ-ປກຊ , ພະນັກງານ-ລັດຖະກອນ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນພາຍໃນເທດສະບານນະຄອນໄກສອນພົມວິຫານ ເຂົ້າຮ່ວມຢ່າງພ້ອມພຽງ.
ການລົງເຄື່ອນໄຫວພົບປະເຜີຍແຜ່ຂອງບັນດາທ່ານ ສສຊ ແລະ ສສຂໃນຄັ້ງນີ້ແມ່ນໄດ້ລົງຢູ່ 03 ຈຸດຄື: ຈຸດທີ01 ກຸ່ມບ້ານທີ 10 ບ້ານໂພນສິມ, ຈຸດທີ 02 ກຸ່ມບ້ານພັດທະນາທີ 04 ບ້ານອຸດົມວິໄລ ແລະ ຈຸດທີ 03 ຢູ່ສະໂມສອນຫ້ອງວ່າການນະຄອນໄກສອນພົມວິຫານ ຊຶ່ງໃນແຕ່ລະຈຸດທີ່ລົງບັນດາທ່ານ ສສຊ ແລະ ສສຂກໍ່ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານການຊີ້ນໍາ-ນຳພາວຽກງານຂອງອຳນາດການປົກທັງສອງບ້ານ, ພ້ອມທັງການລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງນະຄອນໂດຍຫຍໍ້, ຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນ ເທື່ອທີ 05 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຊຸດທີ II ໃຫ້ພໍ່ແມ່ປະຊາຊົນກໍຄືຜູ້ມີສິດເລືອກຕັ້ງໄດ້ຮັບຮູ້ ພາຍຫຼັງທີ່ບັນດາທານ ສສຊ, ສສຂ ໄດ້ເຜີຍແຜ່ຜົນສຳເລັດດັ່ງກ່າວແລ້ວ ຍັງໄດ້ເປີດໂອກາດໃຫ້ອໍານາດການປົກຄອງຕະຫຼອດຮອດພໍ່ແມ່ປະຊາຊົນໄດ້ຊັກຖາມ ແລະ ມີຄຳສະເໜີໂດຍສະເພາະແມ່ນບັນຫາການພັດທະນາພື້ນຖານໂຄງລ່າງໃນນັ້ນການແກ້ໄຂບັນຫາປາກົດການຫຍໍ້ທໍ້ໃນສັງຄົມ
ບັນຫາຢາເສບຕິດ, ບັນຫາທີ່ດິນ ແລະ ລະບົບຊົນລະປະທານເໝືອງຝາຍທີ່ຈະນໍາໃຊ້ເຂົ້າໃນການຜະລິດຂອງພໍ່ແມ່ປະຊາຊົນເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນ,ພ້ອມນັ້ນ ສສຊ ແລະ ສສຂ ກໍ່ຍັງໄດ້ມີຄໍາເຫັນຫຼາຍດ້ານຕໍ່ກັບການພັດທະນາພື້ນຖານໂຄງລ່າງ, ການພັດທະນາທາງດ້ານເສດຖະກິດ-ສັງຄົມ, ການແກ້ໄຂບັນຫາຢາເສບຕິດໂດຍຕິດພັນກັບ 02 ວາລະແຫ່ງຊາດ ຂອງລັດຖະບານເພື່ອແນໃສ່ໃຫ້ ບັນລຸໄດ້ຕາມລະດັບຄາດໝາຍ ທີ່ພັກ-ລັດວາງໄວ້.ພ້ອມນັ້ນ ກໍຍັງໄດ້ຕອບບັນຫາການຊັກຖາມຂອງ ພໍ່ແມ່ປະຊາຊົນເພື່ອໃຫ້ຮັບຮູ້
ແລະ ເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມຕໍ່ກັບການພັດທະນາ ຂອງປະເທດເຮົາໃນໄລຍະປະຈຸບັນພ້ອມທັງຮັບເອົາຄຳສະເໜີຂອງອຳນາດການຄອງບ້ານ ແລະ ພໍ່ແມ່ປະຊາຊົນໄປນຳສະເໜີ ຕໍ່ຂະແໜງການກ່ຽວຂ້ອງ,ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ.
ພາບ-ຂ່າວ: ນາງ ຄອນສະຫວັນ ເມກສະຫວັນ