ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 24​ ຫາ 25 ກຸມພາ 2022 ນີ້ ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ ສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ​ ພ້ອມດ້ວຍ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງທ່າປາງທອງ, ໄດ້ລົງເຄື່ອນໄຫວພົບປະເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 02 ຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ໂດຍການຕ້ອນຮັບຂອງ ທ່ານ​ ຄໍາປະສົງ ຂົງຄໍາ ກໍາມະການພັກແຂວງ​ ເລຂາພັກເມືອງ ເຈົ້າເມືອງໆທ່າປາງທອງ ມີບັນດາທ່ານຄະນະພັກ-ຄະນະປົກຄອງເມືອງ, ຄະນະຫ້ອງການ, ທະຫານ, ຕຳຫຼວດ, ພະນັກງານລັດຖະກອນ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຮັບຟັງຢ່າງພ້ອມພຽງ.

ການລົງເຄື່ອນໄຫວພົບປະເຜີຍແຜ່ຂອງບັນດາທ່ານ ສສຊ ແລະ ສສຂ ໃນຄັ້ງນີ້ແມ່ນໄດ້ລົງຢູ່ 04 ຈຸດຄື: ຈຸດບ້ານທົ່ງປາງ, ໂອ້ລົມສະມາຊິກພັກ-ພະນັກງານຢູ່ທີ່ສະໂມສອນເມືອງ,ຈຸດບ້ານນາຕັງ ແລະ ຈຸດບ້ານດອນຂາວ ເຊິ່ງໃນແຕ່ລະຈຸດທີ່ລົງບັນດາທ່ານ ສສຊ ແລະ ສສຂ ກໍ່ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານການຊີ້ນໍາ-ນຳພາວຽກງານຂອງອຳານາດການປົກທັງສາມບ້ານ, ພ້ອມທັງການລາຍງານ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງທ່າປາງທອງ ໂດຍຫໍ້ຍ, ຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງ ກອງປະຊຸມສະໄໝສາມັນເທື່ອທີ 02 ຂອງສະພາແຫ່ງຊາດ ຊຸດທີ IX ແລະສະພາປະຊາຊົນແຂວງ ຊຸດທີ II, ເຊິ່ງໃນກອງປະຊຸມສະພາປະຊາຊົນແຂວງ ຊຸດທີ​ II ກໍ່ໄດ້ມີການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2021 ແລະ ທິດທາງຕໍ່ໜ້າ,ຮັບຮອງເອົາການສະ ເໜີແຕ່ງຕັ້ງປະທານສະພາ ປະຊາຊົນແຂວງເຂດ 02, ຮັບຮອງເອົາບົດລາຍງານອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງປີ 2021 ແລະ ທິດທາງແຜນການ,ຮັບຮອງເອົາບົດລາຍງານການເຄື່ອນໄຫວວຽກງານປະຈໍາປີ 2021 ແລະ ທິດທາງຕໍ່ໜ້າຂອງສະພາປະຊາຊົນແຂວງ ຊຸດທີ 02 ,ຮັບຮອງເອົາບົດລາຍງານອົງການກວດກາລັດແຂວງ ກ່ຽວກັບການຕິດຕາມກວດກາ ຕາມຜົນການກວດສອບປີ 2019 ບົດສະຫຼຸບການເຄື່ອນໄຫວວຽກງານປີ 2021 ແລະ ທິດທາງແຜນການປີ 2022.

ພາຍຫຼັງທີ່ບັນດາທ່ານ ສສຊ ແລະ ສສຂ ເຜີຍແຜ່ຜົນສໍາເລັດຂອງກອງປະຊຸມສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ສໍາເລັດແລ້ວ, ການຈັດຕັ້ງຂອງບ້ານ ກໍ່ຄື ພໍ່ແມ່ປະຊາຊົນພາຍໃນບ້ານກໍ່ໄດ້ສະເໜີບັນຫາການພັດທະນາພື້ນຖານໂຄງລ່າງເປັນຕົ້ນແມ່ນ: ການກໍ່ເສັ້ນທາງ, ຂົວແຫ່ງຕ່າງໆຈາກເມືອງຫາບ້ານ, ການສ້າງຕາຂ່າຍໄຟຟ້າ, ການແກ້ໄຂບັນຫາຢາເສບຕິດ, ບັກຫາຄູອາສາສະໝັກ,​ການກໍ່ສ້າງສຸກສາລາປະຈຳບ້ານ, ລະບົບຊົນລະປະທານເໝືອງຝາຍທີ່ຈະນຳໃຊ້ເຂົ້າໃນການຜະລິດຂອງພໍ່ແມ່ປະຊາຊົນ ເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນ, ພ້ອມນີ້ ສສຊ ແລະ ສສຂ ຍັງໄດ້ຕອບບັນຫາການຊັກຖາມຂອງພໍ່ແມ່ປະຊາຊົນເພື່ອໃຫ້ຮັບຮູ້ ແລະເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມ ຕໍ່ກັບການພັດທະນາຂອງປະເທດເຮົາ ແລະຈະຮັບເອົາຄໍາສະເໜີຂອງພໍ່ແມ່ປະຊາຊົນໄປນຳສະເໜີຕໍ່ພາກສ່ວນທີ່ກ່ຽວຂ້ອງ ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ.​

ໂອກາດທີ່ ສສຊ ແລະ ສສຂ ລົງເຄື່ອນໄຫວຢູ່ເມືອງທ່າປາງທອງໃນຄັ້ງນີ້ ຍັງໄດ້ນໍາເອົາເຄື່ອງຊ່ວຍເຫຼືອ​ (ຜ້າຫົ່ມ) ​ລົງມາມອບໃຫ້ແກ່ອຳນາດການປົກຄອງທັງສາມຈຸດຄື: ຈຸດບ້ານ ທົ່ງປາງ ຈຳນວນ​ 46​ ຜືນ, ຈຸດບ້ານນາຕັງ 44 ຜືນ ແລະ ຈຸດບ້ານ​ດອນຂາວ ຈຳນວນ​ 50​ ຜືນ​ ເຊິ່ງລວມທັງໝົດ 140 ຜືນ ເພື່ອໃຫ້ອໍານາດການປົກຄອງທັງສາມບ້ານ ດັ່ງກ່າວ ນຳໄປແຈກຢາຍໃຫ້ຄອບຄົວທີ່ທຸກຍາກອີກດ້ວຍ.​