ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 12-13 ກັນຍາ 2022 ນີ້, ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ ຮອງປະທານສະພາປະຊາຊົນແຂວງ ຮອງປະທານຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ແຂວງສະຫວັນນະເຂດ, ທ່ານ ພັທ ແສງກາ ສຸວັນນະຄົງ ຮອງປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ທັງເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 13 ພ້ອມດ້ວຍ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຊົນນະບູລີ, ໄດ້ລົງເຄື່ອນໄຫວພົບປະເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 03 ຂອງສະພາແຫ່ງຊາດຊຸດທີ IX ແລະສະພາປະຊາຊົນແຂວງຊຸດທີ II ໂດຍການຕ້ອນຮັບ ຂອງຄະນະນຳຂອງເມືອງ,ມີບັນດາທ່ານຄະນະພັກ-ຄະນະປົກຄອງເມືອງ, ຄະນະຫ້ອງການ, ທະຫານ, ຕຳຫຼວດ, ພະນັກງານລັດຖະກອນ, ອຳນາດການປົກຄອງບ້ານ ຕະຫຼອດຮອດພໍ່ແມ່ປະຊາຊົນເຂົ້າຮ່ວມຮັບຟັງຢ່າງພ້ອມພຽງ.

ການລົງເຄື່ອນໄຫວພົບປະເຜີຍແຜ່ຂອງບັນດາທ່ານ ສສຊ ແລະ ສສຂ ໃນຄັ້ງນີ້ແມ່ນໄດ້ລົງຢູ່ 04 ຈຸດຄື: ຈຸດສຸມກຸ່ມບ້ານລຳທວາຍ, ຈຸດບ້ານກະເບົາ, ຈຸດບ້ານກອງປະທຸມວັນ ແລະ ໂອ້ລົມສະມາຊິກພັກ-ພະນັກງານຢູ່ທີ່ສະໂມສອນເມືອງ ຊຶ່ງໃນແຕ່ລະຈຸດທີ່ລົງບັນດາທ່ານ ສສຊ ແລະ ສສຂ ກໍ່ໄດ້ຮັບຟັງການລາຍງານ ການຈັດຕັ້ງປະຕິບັດວຽກງານການຊີ້ນໍາ-ນຳພາວຽກງານຂອງອຳານາດການປົກທັງສາມບ້ານ, ພ້ອມທັງການລາຍງານ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງຊົນນະບູລີໂດຍຫໍ້ຍ, ຈາກນັ້ນ ບັນດາທ່ານ ສສຊ, ສສຂ ກໍ່ໄດ້ຜັດປ່ຽນກັນເຜີຍແຜ່ເນື້ອໃນຜົນສຳເລັດຂອງ ກອງປະຊຸມສະໄໝສາມັນ ເທື່ອທີ 3 ໃຫ້ປະຊາຊົນຜູ້ມີສິດເລືອກຕັ້ງໄດ້ຮັບຮູ້,  ໂດຍສະເພາະກອງປະຊຸມໄດ້ຮັບຮອງເອົາຫຼາຍບັນຫາສຳຄັນເປັນຕົ້ນແມ່ນ: ການຮັບຮອງເອົາ 10 ມະຕິຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ແລະ ການຮັບຮອງເອົາ 4 ມະຕິຂອງກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນ ແຂວງຊຸດທີ II

ໂອກາດນີ້, ພໍ່ແມ່ ປະຊົນ ກໍ່ຍັງໄດ້ຊັກຖາມ ແລະມີຄຳສະເໜີ ໂດຍສະເພາະແມ່ນບັນຫາການພັດທະນາພື້ນຖານໂຄງລ່າງໃນນັ້ນການກໍ່ເສັ້ນທາງ, ຂົວແຫ່ງຕ່າງໆຈາກເມືອງຫາບ້ານ, ການສ້າງຕາຂ່າຍໄຟຟ້າ, ການແກ້ໄຂບັນຫາຢາເສບຕິດ, ບັກຫາຄູອາສາສະໝັກ,​ການກໍ່ສ້າງສຸກສາລາປະຈຳບ້ານ, ລະບົບຊົນລະປະທານເໝືອງຝາຍທີ່ຈະນຳໃຊ້ເຂົ້າໃນການຜະລິດຂອງພໍ່ແມ່ປະຊາຊົນ ເພື່ອເປັນການແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂຶ້ນ, ພ້ອມນັ້ນ ສສຊ ແລະ ສສຂ ກໍ່ຍັງໄດ້ມີຄໍາເຫັນຫຼາຍດ້ານ ຕໍ່ກັບການການພັດທະນາພື້ນຖານ ໂຄງລ່າງ, ການພັດທະນາທາງດ້ານເສດຖະກິດ, ການແກ້ໄຂບັນຫາ ທາງດ້ານຢາເສບຕິດ ໂດຍຕິດພັນ ກັບການແກ້ໄຂ 2 ວາລະແຫ່ງຊາດ ຂອງລັດຖະບານ ເພື່ອແນໃສ່ໃຫ້ ບັນລຸໄດ້ຕາມລະດັບຄາດໝາຍ ທີ່ພັກ-ລັດວາງໄວ້. ພ້ອມນັ້ນ ຍັງ ໄດ້ຕອບບັນຫາການຊັກຖາມຂອງ ພໍ່ແມ່ປະຊາຊົນ ເພື່ອໃຫ້ຮັບຮູ້ ແລະ ເຂົ້າໃຈເຖິງບັນຫາຕ່າງໆຕໍ່ກັບສະພາບການອັນລວມຕໍ່ກັບການພັດທະນາ ຂອງປະເທດເຮົາໃນໄລຍະປະຈຸບັນ  ພ້ອມທັງຮັບເອົາຄຳສະເໜີຂອງອົງການປົກຄອງບ້ານ ແລະພໍ່ແມ່ປະຊາຊົນໄປນຳສະເໜີ ຕໍ່ຂະແໜງການກ່ຽວຂ້ອງ, ເພື່ອນຳໄປປຶກສາຫາລື ແລະ ຄົ້ນຄວ້າແກ້ໄຂໃນຂັ້ນຕໍ່ໄປ.​

ພາບ-ຂ່າວ: ນ.ຄອນສະຫວັນ ເມກສະຫວັນ