(ສພຊ) ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7 ນໍາໂດຍທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ ແລະ ສະມາຊິກສະພາປະຊາຊົນແຂວງໄຊຍະບູລີປະຈຳເມືອງຊຽງຮ່ອນ ພ້ອມດ້ວຍຄະນະ ໄດ້ພົບປະພະນັກງານຫຼັກແຫ່ງຂອງເມືອງຊຽງຮ່ອນ ໃນຕອນບ່າຍຂອງວັນທີ 23 ມັງກອນ 2024 ທີ່ສະໂມສອນເມືອງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ໄຊຍະບູລີ ຊຸດທີ II.
ທ່ານ ກົງທອງ ສິດທິໄຊ ເຈົ້າເມືອງໆຊຽງຮ່ອນ ໄດ້ລາຍງານໂດຍຫຍໍ້ວ່າ: ໃນໄລຍະ 1 ປີຜ່ານມາ ເມືອງຊຽງຮ່ອນໄດ້ພົບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ທັງທາງກົງ ແລະ ທາງອ້ອມ ໂດຍສະເພາະແມ່ນຄວາມຫຍຸ້ງຍາກທາງດ້ານເສດຖະກິດ-ການເງິນ, ການປ່ຽນແປງດິນຟ້າອາກາດ, ໄພທຳມະຊາດ, ລາຄາສິນຄ້າ, ລາຄານໍ້າມັນເຊື້ອໄຟ, ອັດຕາແລກປ່ຽນ ແລະ ອັດຕາເງິນເຟີ້ ມີທ່າອຽງສູງຂຶ້ນ ; ແຕ່ເຖິງຢ່າງໃດກໍຕາມ ພາຍໃຕ້ການນຳພາ-ຊີ້ນໍາຂອງອົງການປົກຄອງເມືອງຊຽງຮ່ອນ ເຮັດໃຫ້ທົ່ວເມືອງມີສະຖຽນລະພາບທາງດ້ານການເງິນ ຮັບປະກັນບໍ່ໃຫ້ເກີດວິກິດສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ບັນດາຄາດໝາຍສູ້ຊົນຂອງຂະແໜງການຕ່າງໆ ໄດ້ບັນລຸຕາມແຜນທີ່ວາງໄວ້ເປັນສ່ວນໃຫຍ່. ດ້ານວຽກງານປ້ອງກັນ ຊາດ-ປ້ອງກັນຄວາມສະຫງົບ (ປກຊ-ປກສ) ໄດ້ສຸມໃສ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຢ່າງຮອບດ້ານ, ເອົາໃຈໃສ່ນຳພາ-ຊີ້ນຳໂດຍກົງ, ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ຢ່າງມີຈຸດສຸມ ແລະ ຕາມທິດນຳ 3 ສ້າງ ໃຫ້ເຂົ້າສູ່ລ່ວງເລິກ; ຫັນເອົາກຳລັງ ປກຊ-ປກສ ລົງປະຈຳຮາກຖານບ້ານ, ສ້າງທ່າສະ ໜາມ 3 ຂັ້ນ ຕິດພັນກັບການຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ເຮັດໃຫ້ຄະດີຕ່າງໆທີ່ເກີດຂຶ້ນໄດ້ຮັບການແກ້ໄຂຢ່າງທັນການ, ຮັບປະກັນເຮັດໃຫ້ເມືອງມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບ ບໍ່ມີເຫດການຮ້າຍແຮງເກີດຂຶ້ນ ສະ ແດງອອກໃນທົ່ວເມືອງມີ 4 ກຸ່ມບ້ານສູ້ຮົບຕິດລຽນ, ບ້ານປ້ອງກັນຊາດເຂັ້ມແຂງ 43 ບ້ານ ເທົ່າກັບ 100%, ບ້ານປ້ອມໝັ້ນສູ້ຮົບເອກະລາດ 22 ບ້ານ ແລະ ບ້ານປ້ອງກັນຄວາມສະຫງົບດີ 41 ບ້ານ ເທົ່າກັບ 95,3% ເຊິ່ງເປັນພື້ນຖານສຳຄັນທີ່ສ້າງເງື່ອນໄຂເອື້ອອຳນວຍໃຫ້ເມືອງໄດ້ຮັບການພັດທະນາຢ່າງຕໍ່ເນື່ອງ. ການພັດທະນາດ້ານວຽກງານເສດຖະກິດຂອງເມືອງຂະຫຍາຍຕົວຢ່າງຕໍ່ເນື່ອງ ດ້ວຍອັດຕາການຂະຫຍາຍຕົວໃນລະດັບ 7,15% ຜົນຜະລິດພາຍໃນບັນລຸ 873,3 ຕື້ກີບ ສະເລ່ຍຕໍ່ຫົວຄົນໜຶ່ງໄດ້ 24 ລ້ານກີບ; ໄດ້ສຸມໃສ່ການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ຢ່າງເຂັ້ມງວດ ສຸມໃສ່ເກັບລາຍຮັບເຂົ້າງົບປະມານ ໄດ້ 4.704,23 ລ້ານກວ່າກີບ ເທົ່າກັບ 135,6% ແລະ ຄຸ້ມຄອງລາຍຈ່າຍປະຕິບັດໄດ້ 3.120,12 ລ້ານກວ່າກີບ ເທົ່າກັບ 99,49% ຂອງແຜນການປີ.
ຈາກນັ້ນ, ສະມາຊິກສະພາ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສພຂ ໄຊຍະບູລີ ຊຸດທີ II ເຊິ່ງປະກອບມີບັນດາມະຕິ, ກົດໝາຍ ແລະ ນິຕິກໍາໃຕ້ກົດໝາຍ, ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ຜູ້ເຂົ້າຮ່ວມກໍໄດ້ມີການແລກປ່ຽນຄຳຄິດຄຳເຫັນ ແລະ ຮັບຄຳສະເໜີຈາກຜູ້ມີສິດເລືອກຕັ້ງ. ຫຼັງຈາກນັ້ນ, ຄະນະໄດ້ໄປມອບອຸປະກອນໃຫ້ໂຮງຮຽນອານຸບານປົ່ງມອນ ແລະ ກວດກາເສັ້ນທາງບ້ານເຂດທົ່ງກາບ.
(ພາບ ແລະ ຂ່າວ: ນາງ ກຸກກິກ ບຸດດາໄຊ)