(ສພຊ) ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 7 ນໍາໂດຍທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ເພັງນິລັນ ຄຳພັນເພັງ ປະທານສະພາປະຊາຊົນແຂວງໄຊຍະບູລີ ແລະ ສະມາຊິກສະພາປະຊາຊົນແຂວງໄຊຍະບູລີປະຈຳເມືອງເງິນ ພ້ອມດ້ວຍຄະນະ ໄດ້ພົບປະພະນັກງານຫຼັກແຫ່ງຂອງເມືອງເງິນ ໃນຕອນບ່າຍຂອງວັນທີ 24 ມັງກອນ 2024 ທີ່ສະ ໂມສອນເມືອງ ເພື່ອເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ໄຊຍະບູລີ ຊຸດທີ II.

ທ່ານ ທະວິສັກ ໄຊຍະວົງ ເຈົ້າເມືອງໆເງິນ ໄດ້ລາຍງານໂດຍຫຍໍ້ວ່າ: ໃນໄລຍະຜ່ານມາ ເມືອງເງິນ ໄດ້ຜັນຂະຫຍາຍເນື້ອໃນ 4 ມະຕິຄື: ມະຕິກອງປະຊຸມຄົບຄະນະກາງສະໄໝທີ VII ຂອງອົງຄະນະພັກແຂວງ, ມະຕິກອງປະຊຸມອົງການປົກຄອງແຂວງ ປະຈຳ 6 ເດືອນຕົ້ນປີ, ມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 9 ສະໄໝທີ VII ແລະ ມະຕິກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 11 ສະໄໝທີ V ໃຫ້ແກ່ພະນັກງານ-ລັດຖະກອນ, ທະຫານ-ຕໍາຫຼວດ ແລະ ປະຊາຊົນ ໄດ້ 22 ບ້ານ ແລະ 4 ຂົງເຂດ; ຂົງເຂດວຽກງານ ປກຊ-ປກສ ໄດ້ຊີ້ນຳ-ນຳພາກຳລັງອອກເຄື່ອນໄຫວກວດກາລາດຕະເວນຂອບເຂດບໍລິເວນເສັ້ນຊາຍແດນຕາມຊ່ອງທາງທຳມະຊາດ, ແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນສັງຄົມ; ຂົງເຂດເສດຖະກິດ ແມ່ນປັບປຸງພື້ນຖານໂຄງລ່າງທີ່ຈຳເປັນພາຍໃນເມືອງ ເປັນຕົ້ນຍົກລະດັບເສັ້ນທາງຮ່ອມບ້ານບີໝີ, ບ້ານຂອນ, ບ້ານແກ້ວດອນຄູນ, ບ້ານນາຍາງຄຳ ແລະ ກໍ່ ສ້າງຂົວຂ້າມນ້ຳເງິນບ້ານນາຊົວ, ປັບປຸງສະຖານທີ່ກ້ອງອ່າງເກັບນ້ຳຫ້ອຍນານ້ອຍ ແລະ ນຳພາການຈັດ ຕັ້ງ, ພໍ່ແມ່ປະຊາຊົນບ້ານເພຍງາມ ກໍ່ສ້າງເສັ້ນທາງເບຕົງທາງຮ່ອມພາຍໃນບ້ານ ມີຄວາມຍາວ 380 ແມັດ.

ຈາກນັ້ນ, ສະມາຊິກສະພາ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສພຊ ຊຸດທີ IX ແລະ ສພຂ ໄຊຍະບູລີ ຊຸດທີ II ເຊິ່ງປະກອບມີບັນດາມະຕິ, ກົດ ໝາຍ ແລະ ນິຕິກໍາໃຕ້ກົດໝາຍ, ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ; ຜູ້ເຂົ້າຮ່ວມກໍໄດ້ມີການແລກປ່ຽນຄຳຄິດຄຳເຫັນ ແລະ ຮັບຄຳສະ ເໜີຈາກຜູ້ມີສິດເລືອກຕັ້ງ.

(ພາບ ແລະ ຂ່າວ: ນາງ ກຸກກິກ ບຸດດາໄຊ)