ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 24 ພຶດສະພາ 2022 ຜ່ານມາ ສະມາຊິກສະພາແຫ່ງຊາດ ປະຈໍໍາເຂດເລືອກຕັ້ງທີ 15 ນຳໂດຍທ່ານ ນາງ ບຸນສຸວັນ ໂພໄຊຊະນະສານ, ທ່ານ ທິບພະສອນ ສາມາເລີກ ເລຂາທິການສະພາປະຊາຊົນແຂວງ, ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງຊະນະສົມບູນ ສົມທົບກັບຄະນະນໍາຂອງເມືອງ ໄດ້ລົງຢ້ຽມຢາມໂຮງຮຽນບ້ານໃຫມ່ ສິງສໍາພັນ ເມືອງຊະນະສົມບູນ ແຂວງຈໍາປາສັກ

ໃນການລົງມາຄັ້ງນີ້ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໄດ້ນໍາເອົາສັງກະສີ, ພ້ອມເຂົ້າສານ,ໄຂ່, ຫມີ່ສໍາເລັດຮູບ ລວມເປັນເງິນມູນຄ່າ 8 ລ້ານກີບ ໃຫ້ກຽດຮັບເອົາໂດຍ ທ່ານ ພູຄີ ຄໍາມະນີຫວັງ ອຳນວຍການໂຮງຮຽນ ບ້ານໃຫມ່ສິງສໍາພັນ, ທ່ານ ພັນຕີ ສັງວອນ ຈັນທະປະເສີດ ຫົວຫນ້າດ່ານປະເພນີ ສິງສໍາພັນ ພ້ອມດ້ວຍເລຂາຄະນະພັກບ້ານ ແລະ ປະຊາຊົນພາຍໃນບ້ານເຂົ້າຮ່ວມເພື່ອເປັນສັກຂີພະຍານ

ພ້ອມດຽວກັນນັ້ນ, ອໍານວຍການໂຮງຮຽນໄດ້ກ່າວຄໍາຂອບໃຈຕໍ່ການລົງມາຢ້ຽມຢາມຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ທີ່ໄດ້ນໍາເອົາເຄື່ອງຈໍານວນດັ່ງກ່າວມາມອບໃຫ້ພ້ອມໃຫ້ຄໍາຫມັ້ນສັ້ນຍາວ່າ ຈະນໍາໃຊ້ເຂົ້າບູລະນະຊ້ອມແຊມຫລັງຄາຂອງໂຮງຮຽນ ໃຫ້ນ້ອງນັກຮຽນພາຍໃນບ້ານໃຫມ່ ສິງສໍາພັນໃຫ້ດີຂຶ້ນກວ່າເກົ່າ ເພື່ອເປັນການສົ່ງເສີມການສຶກສາຂອງນ້ອງໆນັກຮຽນ.

ພາບ-ຂ່າວ: ພຸດທະສອນ ແສງພອນ