(ສພຊ) ວັນທີ 13 ກຸມພາ 2018 ຜ່ານມາ ທ່ານ ສີໃສ ລືເດດມູນສອນ ກຳມະການສູນກາງພັກ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 11 ແຂວງບໍລິຄຳໄຊ; ພ້ອມດ້ວຍ ສສຊ ປະຈຳເຂດເລືອກຕັ້ງທີ 11 ແລະ ສະມາຊິກສະພາປະຊາຊົນແຂວງ (ສສຂ) ປະຈຳເມືອງໄຊຈຳພອນ ໄດ້ລົງພົບປະກັບປະຊາຊົນເພື່ອເຜີຍແຜ່ຜົນສຳເລັດຜົນສຳເລັດກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນແຂວງບໍລິຄຳໄຊ ຊຸດທີ I ທີ່ບ້ານເມືອງຈຳ ເຊິ່ງກ່ອນໜ້ານີ້ແມ່ນຕາແສງຈຳ, ໄດ້ຮັບນາມມະຍົດເປັນຕາແສງວິລະຊົນ ເຊິ່ງຂຶ້ນກັບເມືອງຄຳເກີດ ແຕ່ໃນປັດຈຸບັນບ້ານເມືອງຈຳ ແມ່ນຂຶ້ນກັບເມືອງໄຊຈຳພອນ ແຂວງບໍລິຄຳໄຊ.
ການເຜີຍແຜ່ດັ່ງກ່າວ ໄດ້ມີພໍ່ແມ່ປະຊາຊົນຈາກບ້ານເມືອງຈຳ ແລະ ບ້ານໂພນເມືອງເຂົ້າຮ່ວມຮັບຟັງ 124 ຄົນ ຍິງ 56 ຄົນ; ບ້ານເມືອງຈຳ ແລະ ບ້ານໂພນເມືອງ ເປັນບ້ານທີ່ຢູ່ຫ່າງໄກຈາກເທດສະບານເມືອງ 41 ກິໂລແມັດ, ມີຊາຍແດນຕິດກັບ ເມືອງແອັງເຊິນ ແຂວງເຫງະອານ ສສ.ຫວຽດນາມ; ເນື້ອທີ່ຂອງສອງບ້ານກວມເອົາເຂດພູດອຍ 95%, ໃນເມື່ອກ່ອນນີ້ສອງບ້ານຍັງເປັນບ້ານທີ່ທຸກຍາກ ເປັນເຂດທີ່ໝັ້ນພື້ນຖານຂອງການປະຕິວັດ, ເປັນບ່ອນທີ່ຜູ້ນຳຂອງການປະຕິວັດໄດ້ອາໄສເພື່ອເຄື່ອນໄຫວ ເປັນຕົ້ນທ່ານ ສີສົມພອນ ລໍວັນໄຊ ອະດີດກຳມະການກົມການເມືອງສູນກາງພັກ; ເປັນເຂດທີຂຶ້ນກັບ 3 ຕາແສງຍອດນ້ຳຂອງເມືອງຄຳເກີດ; ປະຊາຊົນແມ່ນຕັ້ງບ້ານເຮືອນຢູ່ກະແຈກກະຈາຍຕາມຮ່ອມຫ້ວຍ, ພູສູງ ການດຳລົງຊີວິດແມ່ນຕິດພັນກັບທຳມະຊາດ, ປະຊາຊົນຂາດເຂົ້າກິນ ແລະ ເຄື່ອງນຸ່ງຫົ່ມ, ບໍ່ມີເສັ້ນທາງເຂົ້າໄປເຖິງ, ລູກຫລານບໍ່ໄດ້ເຂົ້າຮຽນ ແລະ ບໍ່ໄດ້ຮັບການປິ່ນປົວຢ່າງທົ່ວເຖິງ; ຍ້ອນຄວາມເອົາໃຈໃສ່ຂອງພັກ-ລັດຂັ້ນເທິງ, ມາຮອດປີ 2009 ກົມການເມືອງສູນກາງພັກຈຶ່ງໄດ້ຮັບຮອງປະກາດສ້າງຕັ້ງເມືອງໄຊຈຳພອນ ພາຍໃຕ້ການຊີ້ນຳ-ນຳພາ ຂອງອົງຄະນະພັກເມືອງແຕ່ລະສະໄໝ ບວກກັບມູນເຊື້ອດຸໝັ່ນຂະຫຍັນພຽນຂອງປະຊາຊົນ ມາຮອດປັດຈຸບັນສອງບ້ານແມ່ນມີເສັ້ນທາງເຂົ້າເຖິງ ສາມາດທຽວໄດ້ 1 ລະດູ, ມີໄຟຟ້າ, ມີຮງຮຽນປະຖົມສົມບູນ, ມີຮງຮຽນມັດທະຍົມຕອນຕົ້ນ, ສຸກສາລາ, ປະຊາຊົນແມ່ນຍຶດຖືອາຊີບເຮັດນາ, ປູກຝັງລ້ຽງສັດໃຫຍ່ເປັນສິນຄ້າ ເພື່ອເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນນັບມື້ຍັບດີຂຶ້ນເທື້ອລະກ້າວ.
ຄຽງຄູ່ກັບການເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນແຂວງບໍລິຄຳໄຊ ຊຸດທີ I ຄັ້ງນີ້, ສສຊ ແລະ ສສຂ ໄດ້ມີໂອກາດຮັບຟັງຄຳຄິດຄຳເຫັນ ແລະ ຄຳສະເໜີຂອງປະຊາຊົນ ຕໍ່ການພັດທະນາຊີວິດການເປັນຢູ່ຂອງປະຊາຊົນຢູ່ຂອບເຂດບ້ານເມືອງຈຳ ແລະ ບ້ານໂພນເມືອງ ເຊິ່ງທັງສອງບ້ານແມ່ນບ້ານທີ່ທຸກຍາກ, ຫ່າງໄກຂອງເມືອງໄຊຈຳພອນ ເຊິ່ງທຸກບັນຫາທີ່ປະຊາຊົນທັງສອງບ້ານສະເໜີ ແມ່ນສອດຄ່ອງກັບຄວາມເປັນຈິງ ແລະ ສສຊ, ສສຂ ທີ່ໄປພົບປະກັບປະຊາຊົນຄັ້ງນີ້ ຈະສືບຕໍ່ປະສານສົມທົບກັບຂະແໜງການທີ່ກ່ຽວຂ້ອງຂອງເມືອງ, ຂອງແຂວງ ເພື່ອສືບຕໍ່ແກ້ໄຂ, ສ້າງໃຫ້ສອງບ້ານຫລຸດພົ້ນອອກຈາກຄວາມທຸກຍາກ.