ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສສຊ ເຂດ 7 ລົງຊຸກຍູ້ການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ

ໃນວັນທີ 16 ພຶດສະພາ 2022 ຜ່ານມາ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 7 ແລະສະມາຊິກສະພາປະຊາຊົນແຂວງໄຊຍະບູລີ ໄດ້ລົງຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດ ມະຕິກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ບັນດາພະແຜນການ, ອົງການ, ກົມກອງ ອ້ອມຂ້າງແຂວງ ເຊີ່ງໄດ້ຈັດຕັ້ງເປັນ 3 ຄະນະ ລົງເຄື່ອນໄຫວຢູ່ ພະແນກຍຸຕິທໍາແຂວງ; ອົງການໄອຍະການປະຊາຊົນແຂວງ; ພະແນກອຸດສາຫະກໍາ ແລະ ການຄ້າແຂວງ; ອົງການກວດກາລັດແຂວງ; ພະແນກສຶກສາທິການ ແລະ ກິລາແຂວງ; ພະແນກແຮງງານ ແລະ ສະຫວັດດີການສັງຄົມແຂວງ.
ໂອກາດດັ່ງກ່າວ, ຄະນະໄດ້ຮັບຟັງລາຍງານການຈັດຕັ້ງປະຕິບັດວຽກງານ ໃນໄລຍະ 3 ເດືອນຜ່ານມາ ທີ່ຕິດພັນກັບບັນດາຄາດໝາຍທີ່ລະບຸໄວ້ຢູ່ໃນມະຕິຂອງກອງປະຊຸມສະພາແຫ່ງຊາດ ຊຸດທີ IX ກໍ່ຄືສະພາປະຊາຊົນແຂວງ ຊຸດທີ II ຈາກນັ້ນ, ກໍ່ໄດ້ແລກປ່ຽນຄໍາຄິດຄໍາເຫັນກ່ຽວກັບດ້ານອອ່ນຂໍ້ຄົງຄ້າງ ແລະ ວິທີແກ້ໄຂໃນຕໍ່ໜ້າ, ພ້ອມດຽວກັນຍັງໄດ້ຮັບຟັງການຊີ້ແຈ້ງຂອງຂະແໜງການດັ່ງກ່າວຕໍ່ກັບຄໍາສະເໜີຂອງປະຊາຊົນບັນດາເຜົ່າ ທີ່ສະເໜີຜ່ານສະພາປະຊາຊົນແຂວງ ໃນໄລຍະຜ່ານມາ ຕື່ມອີກ.
ທັ້ງນີ້, ກໍເພື່ອເປັນການຊຸກຍູ້ການຈັດຕັ້ງຜັນຂະຫຍາຍບັນດາມະຕິກອງປະຊຸມສະໄໝສາມັນ ເທື່ອທີ 2 ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II; ເພື່ອຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດ, ລັດຖະທໍາມະນຸນ, ກົດໝາຍ ແລະ ນິຕິກໍາໃຕ້ກົດໝາຍ ແລະ ທັງເປັນການກະກຽມຂໍ້ມູນພື້ນຖານ ເພື່ອລາຍງານຕໍ່ກອງປະຊຸມສະໄໝສາມັນ ເທື່ອທີ3 ຂອງສະພາແຫ່ງຊາດ ຊຸດທີIX ທີ່ຈະເປີດຂຶ້ນໃນຕໍ່ໜ້ານີ້.
(ພາບ-ຂ່າວ: ນີ່ຕູ່, ອິນທີ)