ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ໂດຍປະຕິບັດຕາມພາລະບົດບາດສິດ ແລະ ໜ້າທີ່ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳ ຂອງປະຊາຊົນບັນດາເຜົ່າໃນທົ່ວແຂວງ, ເພື່ອເຮັດໃຫ້ປະຊາຊົນຜູ້ທີ່ມີສິດເລືອກຕັ້ງ ໄດ້ຮັບຮູ້ເຂົ້າໃຈຕໍ່ແນວທາງນະໂຍບາຍ ຂອງພັກ, ລະບຽບກົດໝາຍ ແລະ  ແຜນພັດທະນາເສດຖະກິດ – ສັງຄົມ ແຫ່ງຊາດ

ໃນລະຫວ່າງວັນທີ 7 – 10  ມີນາ 2022 ນີ້ ນຳໂດຍ ທ່ານ ປອ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ພ້ອມຄະນະເລຂາທິການ ແລະ ການນຳ ຂອງເມືອງລົງພົບປະ, ຢ້ຽມຢາມ ແລະ ເຜີຍແຜ່ຜົນສຳເລັດ ຂອງກອງປະຊຸມສະໄໝສາມັນ ເທື່ອທີ 2 ສະພາແຫ່ງຊາດ ຊຸດທີ IX ຢູ່ 4 ເມືອງ ຄື: ເມືອງ ຊຳເໜືອ, ເມືອງ ວຽງໄຊ , ເມືອງ ຊຳໃຕ້ ແລະ ເມືອງກັວນ ລວມທັງໝົດ 4 ຈຸດ 4 ບ້ານ: ບ້ານໂພນໄຊ (ເມືອງຊຳເໜືອ), ບ້ານ ນໍ້າໂສຍ  ( ເມືອງວຽງໄຊ), ບ້ານ ເຕົ້າ ( ເມືອງຊຳໃຕ້) ແລະ ບ້ານ ນາໜັງ (ເມືອງກັວນ ).

ການລົງເຄື່ອນໄຫວເຜີຍແຜ່ຜົນສໍາເລັດຄັ້ງນີ້ໄດ້ນໍາເອົາ ເນື້ອໃນ ທີ່ສຳຄັນຕົ້ນຕໍທີ່ ກອງປະຊຸມໄດ້ພິຈາລະນາຮັບຮອງໄປແລ້ວນັ້ນເປັນຕົ້ນແມ່ນ ມະຕິ ຂອງກອງປະຊຸມ ສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ສອງວາລະແຫ່ງຊາດກ່ຽວກັບການແກ້ໄຂຂໍ້ຄວາມຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ນຳໄປເຜີຍແຜ່ ໃຫ້ພໍ່ແມ່ປະຊາຊົນໃນບ້ານດັ່ງກ່າວ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ. ນອກນັ້ນກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມສະເໜີຂໍ້ຂັດຂ້ອງໝອງໃຈ ແລະ ບັນຫາຕ່າງໆທີ່ຕິດພັນກັບການດຳລົງຊີວິດທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາແຫ່ງຊາດ ໄປຄົ້ນຄວ້າ  ແລະ ປະສານສົບທົບນຳພາກສ່ວນທີ່ກ່ຽວຂ້ອງແກ້ໄຂ ໃນຕໍ່ໜ້າ

ຈາກນັ້ນ ການນຳເມືອງ ແລະ ທ່ານ ສສຊ ກໍໄດ້ພັດປ່ຽນກັນ ອະທິບາຍພ້ອມທັງຊີ້ແຈງ ບາງຄຳສະເໜີ ຂອງພໍ່ແມ່ປະຊາຊົນ ແລະ ໄດ້ເນັ່ນໃຫ້ພໍ່ແມ່ປະຊາຊົນ ພ້ອມກັນສູ້ຊົນ ເອົາໃຈໃສ່ ຈັດຕັ້ງປະຕິບັດ ສອງວາລະແຫ່ງຊາດນັ້ນໃຫ້ປະກົດຜົນເປັນຈິງ ໃນໂອກາດທີ່ ລົງເຜີຍແຜ່ຄັ້ງນີ້ ທັງທີມງານຍັງໄດ້ລົງຢ້ຽມຢາມ ສູນບໍລິການເຕັກນິກຫ້ວຍສາ ( ວຽງໄຊ)  ເບິ່ງທ່າແຮງການທຳການຜະລິດ ຂອງປະຊາຊົນຢູ່ ບ້ານນໍ້ຳໂສຍ ເມືອງວຽງໄຊ ແລະ ລົງຢ້ຽມຢາມ ດ່ານປະເພນີ ນໍ້າໄຕ ເມືອງ ຊຳໃຕ້ ຕື່ມອີກ.

ພາບ ແລະ ຂ່າວ:  ເວີນ ແກ້ວບຸນມີ