ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

             ໂດຍປະຕິບັດຕາມພາລະບົດບາດສິດ ແລະ ໜ້າທີ່ຂອງສະມາຊິກສະພາແຫ່ງຊາດ ປະຈຳເຂດເລືອກຕັ້ງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດ ຂອງປະຊາຊົນບັນດາເຜົ່າໃນທົ່ວແຂວງ, ເພື່ອເຮັດໃຫ້ ພະນັກງານ-ລັດຖະກອນ ແລະ ປະຊາຊົນຜູ້ທີ່ມີສິດເລືອກຕັ້ງ ໄດ້ຮັບຮູ້ເຂົ້າໃຈຕໍ່ແນວທາງນະໂຍບາຍ ຂອງພັກ, ລະບຽບກົດໝາຍ ແລະ ແຜນພັດທະນາເສດຖະກິດ – ສັງຄົມ ແຫ່ງຊາດ ໃນລະຫວ່າງວັນທີ 29 ມັງກອນ – 3 ກຸມພາ 2022 ນີ້ ທ່ານ ຄຳແພງ ວິລະພັນ ກຳມະການຄະນະປະຈຳ, ປະທານກຳມາທິການຍຸຕິທຳ ສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ລົງພົບປະ ແລະ ເຜີຍແຜ່ຜົນສຳເລັດ ກອງປະຊຸມສະໄໝສາມັນ ເທື່ອທີ 2 ສະພາແຫ່ງຊາດ ຊຸດທີ IX ຢູ່ 2 ເມືອງ ຄື: ເມືອງ ຊຽຄໍ້ ແລະ ເມືອງ ສົບເບົາ ລວມທັງໝົດ 5 ຈຸດຄື: ຈຸດ ບ້ານແກ່ວແວ່ນ, ບ້ານ ບາວ, ເທດສະບານ (ເມືອງຊຽງຄໍ້) ບ້ານເມືອງຮັງ ແລະ ຈຸດເທດສະບານ ( ເມືອງສົບເບົາ) ມີຜູ້ເຂົ້າຮ່ວມຮັບຟັງທັງໝົດ 622 ຄົນ, ຍິງ 301 ຄົນ.
              ການລົງເຄື່ອນໄຫວເຜີຍແຜ່ຜົນສໍາເລັດຄັ້ງນີ້ໄດ້ນໍາເອົາເນືິ້ອໃນຜົນສຳເລັດສຳຄັນຕົ້ນຕໍທີ່ ກອງປະຊຸມໄດ້ພິຈາລະນາຮັບຮອງເປັນຕົ້ນ ມະຕິ ຂອງກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ – ສັງຄົມແຫ່ງຊາດ, ແຜນງົບປະມານແຫ່ງລັດ, ສອງວາລະແຫ່ງຊາດກ່ຽວກັບການແກ້ໄຂຂໍ້ຄວາມຫຍຸ້ງຍາກດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ແລະ ເອກະສານສຳຄັນອີກຈຳນວນໜຶ່ງ ນຳມາເຜີຍແຜ່. ນອກນັ້ນກໍ່ໄດ້ເປີດໂອກາດໃຫ້ຜູ້ທີ່ເຂົ້າຮ່ວມສະເໜີຂໍ້ຂັດຂ້ອງໝອງໃຈ, ຄວາມມຸ້ງມາດປາຖະຫນາ ແລະ ບັນຫາຕ່າງໆທີ່ຕິດພັນກັບການດຳລົງຊີວິດທີ່ຍັງພົບຄວາມຫຍຸ້ງຍາກ ເພື່ອເປັນຂໍ້ມູນໃຫ້ສະມາຊິກສະພາ        ແຫ່ງຊາດ ໄປຄົ້ນຄວ້າພິຈາລະນາ ແລະ ປະສານສົບທົບນຳພາກສ່ວນທີ່ກ່ຽວຂ້ອງແກ້ໄຂ ເພື່ອຊອກຫາທາງອອກ ຈາກນັ້ນ ທ່ານ ຄຳແພງ ວິລະພັນ ກໍໄດ້ມີຄຳເຫັນອະທິບາຍຊີ້ແຈງໃຫ້ພໍ່ແມ່ພີ່ນ້ອງປະຊາຊົນເຂົ້າໃຈເລິກເຊິ່ງຕື່ມ ແລະ ທ່ານຍັງໄດ້ເນັ່ນໃຫ້ພໍ່ແມ່ປະຊາຊົນ ຈົ່ງພ້ອມກັນສູ້ຊົນ ເອົາໃຈໃສ່ ຈັດຕັ້ງປະຕິບັດ ສອງວາລະແຫ່ງຊາດໃຫ້ປະກົດຜົນເປັນຈິງ, ຮັກສາຄວາມສາມັກຄີທີ່ເປັນມູນເຊື້ອ, ຊ່ວຍເຫຼືອເບິ່ງແຍງເຊິ່ງກັນ ແລະ ກັນ ດຳລົງຊີວິດແບບໃຫມ່ຢ່າງມີສະຕິ ເພື່ອຕ້ານ ແລະ ສະກັດກັ້ນພະຍາດລະບາດໂຄວິດ -19 ທີ່ກຳລັງລະບາດຢູ່ພາຍໃນປະເທດ, ແຂວງ, ເມືອງ ແລະ ບ້ານ ຂອງພວກເຮົາໃນປະຈຸບັນຢ່າງເຂັ້ມງວດ ພ້ອມກັນຕີຕ້ານປະກົດການຫຍໍ້ທໍ້ຕ່າງໆທີ່ຈະເກີດຂຶ້ນໃນສັງຄົມກໍຄືພາຍໃນບ້ານໃຫ້ໝົດໄປຢ່າງຂາດຕົວ, ສືບຕໍ່ສ້າງເສດຖະກິດຄອບຄົວ ຂອງຕົນເອງໃຫ້ມີຄວາມຮັ່ງມີ ເຂັ້ມແຂງ ເພື່ອເຮັດໃຫ້ຊີວິດການເປັນຢູ່ໃຫ້ນັບມື້ນັບດີຂຶ້ນ ໂອກາດດຽວກັນນີ້ທ່ານ ຍັງໄດ້ນຳເອົາເຄື່ອງນຸ່ງຫົ່ມຈຳນວນຫນຶ່ງ ມອບໃຫ້ນັກຮົບປະຕິວັດ, ພະນັກງານອາວຸໂສບຳນານ ແລະ ມອບໃຫ້ໂຮງໝໍ ທັງສອງເມືອງ ລວມມູນຄ່າທັງໝົດ 11.500.000 ກີບ(ສິບເອັດລ້ານຫ້າແສນກີບ).
າບ ແລະ ຂ່າວ: ເວີນ ແກ້ວບຸນມີ