ໃນວັນທໍາອິດຂອງກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ IX, ທ່ານ ບຸນຕາ ເທບພະວົງ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 1 ນະຄອນຫຼວງວຽງຈັນ ໄດ້ປະກອບຄຳເຫັນຕໍ່ບົດລາຍງານຂອງລັດຖະບານ ເຊິ່ງມີບາງຕອນວ່າ: ຮີບຮ້ອນຜັນຂະຫຍາຍມະຕິຂອງກົມການເມືອງສູນກາງພັກວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ສະບັບເລກທີ 04/ກມສພ, ລົງວັນທີ 11 ເມສາ 2024 ອອກເປັນແຜນວຽກແຜນງານລະອຽດ ເພື່ອໃຫ້ປະຊາຊົນລາວບັນດາເຜົ່າ,​ ພາກທຸລະກິດ ກໍາໄດ້ ແລະ ພ້ອມກັນຜັນຂະ ຫຍາຍ ແລະ ເຮັດໄປລວງດຽວກັນ, ​ສັງຄົມກໍຈະໄດ້ຊ່ວຍລັດຖະບານໃນການພັດທະນາເສດຖະກິດໄປຄຽງຄູ່ກັນ.

ກ່ຽວກັບແຮ່ທາດ ຄວນແບ່ງຄວາມຮັບຜິດຊອບໃຫ້ທ້ອງຖິ່ນຄຸ້ມຄອງຢ່າງເດັດຂາດ, ທາງສູນກາງ ກໍຄືລັດຖະ ບານ ມີພຽງແຕ່ກວດກາ ແລະ ຊ່ວຍທາງດ້ານວິຊາການ.

ວຽກງານການສຶກສາ ແມ່ນສໍາຄັນທີ່ສຸດ ເພາະການພັດທະນາຊັບພະຍາກອນມະນຸດ, ການສ້າງຄົນ ເປັນບັນຫາກົກຂອງປະເທດຊາດ. ການສ້າງເດັກນ້ອຍໃນມື້ນີ້ໃຫ້ເປັນຄົນດີຄົນເກ່ງ ຈະຊ່ວຍໃຫ້ຊາວໜຸ່ມເປັນຄົນດີຄົນເກ່ງໃນມື້ໜ້າ, ສ້າງຊາວໜຸ່ມເປັນຄົນດີຄົນເກ່ງ ເຮົາກໍຈະໄດ້ພະນັກງານທີ່ເປັນຄົນດີຄົນເກ່ງໃນມື້ໜ້າ, ພະນັກງານເປັນຄົນດີຄົນເກ່ງ ເຮົາກໍຈະໄດ້ຄະນະພັກ, ຄະນະນໍາແຕ່ລະຂັ້ນທີ່ເປັນຄົນດີຄົນເກ່ງ. ມອບຂາດຕົວໃຫ້ທ້ອງຖິ່ນປະຕິຮູບການສຶກສາຕາມສີສັນຂອງທ້ອງຖິ່ນນັ້ນໆ, ກະຊວງຄຸ້ມຄອງດ້ານວິຊາການ ແລະ ຕ້ອງຊ່ວຍດ້ານໃດດ້ານໜຶ່ງ; ແຕ່ວ່າສີສັນຂອງແຕ່ລະແຂວງມັນຈະບໍ່ຄືກັນ, ຕ້ອງມີການສ້າງຫຼັກສູດໃດໜຶ່ງທີ່ເໝາະສົມສຳລັບແຂວງນັ້ນໆ ແລະ ອີກຢ່າງໜຶ່ງ ປະຕິຮູບລະ ບົບການສຶກສາໃຫ້ສັ້ນລົງ, ປັດຈຸບັນນີ້ ແມ່ນຮອດ ມ7 ເຫັນວ່າຮຽນຫຼາຍໂພດ ບາງເທື່ອກໍໃຫ້ສັ້ນລົງຮອດແຕ່ ມ6 ຫຼື ມ5 ກໍໄດ້ ບາງປະເທດເຂົາເຈົ້າກໍຮຽນແຕ່ໜ້ອຍດຽວ, ແຕ່ຫຼັກສູດຕ້ອງເພີ່ມວິຊາຊີບເຂົ້າຕື່ມ.

ດ້ານແຮງງານ ກໍຄືເຮົາຮູ້ນໍາກັນ ມີໄລຍະໜຶ່ງ 100 ໂດລາ/9 ແສນກີບ ແຕ່ດຽວນີ້ 2 ລ້ານກວ່າກີບ, ຄ່າແຮງງານຂັ້ນຕໍ່າ 1.6 ລ້ານກີບ ຈະຢູ່ປະມານ 178 ໂດລາ ໃນຕອນນັ້ນ, ແຕ່ດຽວນີ້ 178 ໂດລາ ຈະຢູ່ປະມານ 3.9 ລ້ານກີບ; ເຫັນບັນຫາເງິນຂຶ້ນ ແຕ່ວ່າຄ່າແຮງງານຍັງຕໍ່າ, ດັ່ງນັ້ນ ຄວນຍົກຄ່າແຮງງານຂັ້ນຕໍ່າຂຶ້ນ ໃຫ້ເປັນ 2.8 ລ້ານກີບ ຈຶ່ງຈະພໍຢູ່ລອດ.