ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                   ດ້ວຍຄວາມເປັນຫ່ວງເປັນໃຍ ຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 8 ແຂວງຫົວພັນ ແລະ ສະມາຊິກສະພາປະຊາຊົນແຂວງຕໍ່ປະຊາຊົນບັນດາເຜົ່າຊາວ ແຂວງຫົວພັນ ເວົ້າລວມ, ເວົ້າສະເພາະ ບັນດາຄອບຄົວທີ່ປະສົບເຄາະຮ້າຍ ຈາກອຸທົກກະໄພ, ນ້ຳເຊາະເຈື່ອນ ຍ້ອນຝົກຕົກໜັກ ຢູ່ເມືອງ ຊຽງຄໍ້ ໃນລະຫວ່າງວັນທີ 25-26 ສິງຫາ 2022 ຜ່ານມາ.
ວັນທີ 30 ສິງຫາ 2022 ນີ້ ສສຊ ແລະ ສສຂ ຫົວພັນ ນຳໂດຍ ທ່ານ ແກ້ວຈະເລີນ ເຊ່ຍຢີ້ງຢ່າງ ຮອງປະທານກຳມາທິການບັນດາເຜົ່າ ສະພາແຫ່ງຊາດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ, ທ່ານ ແທງ ວິໄລພອນ ປະທານ ຄະນະກຳມະການເສດຖະກິດແຜນການ ແລະ ການເງິນ ທັງເປັນສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງຊຽງຄໍ້ ແລະ ທ່ານ ພອນສຸກ ຈື່ເນັ່ງຈ່າງ ຕາງໜ້າບໍລິສັດ ລາວພັດທະນາເສດຖະກິດສາກົນ ບໍ່ແຮ່ຈຳກັດ ໄດ້ນຳເອົາເຄື່ອງຊ່ວຍເຫຼືອໄປມອບໃຫ້ ບ້ານ ແລະ ຄອບຄົວ ຢູ່ບ້ານຫ້ວຍປິດ ເມືອງຊຽງຄໍ້ ແຂວງຫົວພັນ ທີ່ຖືກເຄາະຮ້າຍຈາກນ້ຳເຊາະເຈື່ອນ ໃນທ້າຍເດືອນ ສິງຫາ 2022 ຜ່ານມາໄດ້ເຮັດໃຫ້ເຮືອນໃຫ່ຍ 2 ຫຼັງ ແລະ ເຮືອນຄົວ 2 ຫຼັງ ຖືກກະແສນ້ຳພັດໄປ ເຮັດໃຫ້ ເປ່ເພ ເສຍຫາຍ ນອກນີ້ ຍັງມີ ໜອງປາ, ໄຮ່ນາ, ຮົ້ວສວນ, ສັດລ້ຽງຂອງພໍ່ແມ່ປະຊາຊົນພາຍໃນພາຍບ້ານກໍ່ຖືກນ້ຳເຊາະເຈື່ອນເສຍຫາຍເປັນຈຳນວນຫຼາຍ; ເຄື່ອງທີ່ນຳມາຊ່ວຍເຫຼືອຄັ້ງນີ້ມີ ກະຕ່າເຫຼັກໃສ່ຫີນ ເພື່ອກັນນ້ຳ, ເຄື່ອງນຸ່ງຫົ່ມ, ອາຫານແຫ້ງ ແລະ ອຸປະກອນການຮຽນຈຳນວນໜຶ່ງລວມມູນຄ່າທັງໝົດ 11.112.000ກີບ (ສິບເອັດລ້ານໜຶ່ງແສນສິບສອງພັນກີບ), ຈໍານວນເຄື່ອງດັ່ງກ່າວ ແມ່ນໄດ້ມາຈາກການລະດົມນຳບຸກຄົນ, ນິຕິບຸກຄົນ, ບໍລິສັດ ແລະ ຫ່າງຮ້ານຕ່າງໆພາຍໃນແຂວງ ແລະ ຕ່າງແຂວງ. ໂອກາດດຽວກັນນີ້ສະມາຊິກສະແຫ່ງຊາດ, ສະມາຊິກສະພາປະຊາຊົນແຂວງ ຍັງສະແດງຄວາມເສຍໃຈຕໍ່ເຫດການດັ່ງກ່າວທີ່ເກີດຂຶ້ນ ແລະ ຮຽກຮ້ອງມາຍັງປະຊາຊົນພາຍໃນບ້ານ ໃຫ້ມີສະຕິຕໍ່ໄພທຳມະຊາດທີ່ຈະເກີດຂື້ນ,ແລະ ຮຽກຮ້ອງໃຫ້ອຳນາດການປົກຄອງບ້ານຈົ່ງສືບຕໍ່ຊ່ວຍເຫຼືອເບິ່ງແຍງບັນດາຄອບຄົວຜູ້ທີ່ຖືກເຄາະຮ້າຍ, ຈັດສັນບ່ອນຢູ່ອາໄສໃໝ່ ໃຫ້ຮັບປະກັນ ແລະ ມີຄວາມປອດໄພພ້ອມກັນສືບຕໍ່ສ້າງເສດຖະກິດຄອບຄົວໃຫ້ນັບມື້ນັບດີຂຶ້ນ.
ຂ່າວ: ສພຂ ຫົວພັນ