ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 12-14 ຕຸລາ 2022 ສະມາຊິກສະພາແຫ່ງຊາດ ພ້ອມດ້ວຍສະມາຊິກສະພາປະຊາຊົນປະຈຳແຂວງສະຫວັນະເຂດ ເຊິ່ງນຳໂດຍທ່ານ ຄຳຜັນ ຄູນສະຫວັນ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ທັງເປັນຮອງປະທານສະພາປະຊາຊົນແຂວງ, ພ້ອມບັນດາທ່ານ ສສຊ, ສສຂ ໄດ້ລົງຕິດຕາມ ການຈັດຕັ້ງປະຕິບັດມະຕິກອງປະຊຸມສະໄຫມສາມັນ ເທື່ອທີ 02, 03 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II, ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ຢູ່ເມືອງ ນອງ, ເຊໂປນວິລະບູລີ, ພີນ, ພະລານໄຊ ແລະ ດ່ານສາກົນແດນສະຫວັນ ໃຫ້ກຽດຕ້ອນຮັບໂດຍ ບັນດາທ່ານເຈົ້າເມືອງ, ຮອງເຈົ້າເມືອງ, ຄະນະປະຈຳພັກເມືອງ, ຫົວໜ້າດ່ານສາກົນແດນສະຫວັນ, ບັນດາໜ້າຫ້ອງການ ແລະ ພະນັກງານຫຼັກແຫຼ່ງຂອງເມືອງກ່ຽວຂ້ອງເຂົ້າຮ່ວມຢ່າງພ້ອມພຽງ.

   

ໃນແຕ່ລະເມືອງ ກໍໄດ້ຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງແຕ່ລະເມືອງ ໂດຍສັງເຂບ ຈາກນັ້ນ ປະທານກອງປະຊຸມກໍ່ໄດ້ເປີດໂອກາດໃຫ້ບັນດາທ່ານ ສສຊ, ສສຂ ຂອງແຕ່ລະຄະນະກໍາມະການທີ່ຕິດຕາມໃນຄະນະ ໄດ້ແລກປ່ຽນ ແລະ ເຈາະຈິ້ມຂອງແຕ່ລະຂົງເຂດເປັນຕົ້ນ:  ການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາມະຕິກອງປະຊຸມສະພາແຫ່ງຊາດ ແລະ ມະຕິກອງປະຊຸມສະພາປະຊາຊົນແຂວງ ທີ່ໄດ້ຮັບຮອງເອົາໃນກອງປະຊຸມ ໃຫ້ມີຜົນສໍາເລັດຕາມລະດັບຄາດຫມາຍທີ່ວາງໄວ້;  ການຊຸກຍູ້ ການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ບັນດາມະຕິຂອງສະພາແຫ່ງຊາດ ແລະ ສະພາປະຊາຊົນແຂວງ, ແຜນພັດທະນາເສດຖະກິດສັງຄົມ ແລະ ແຜນງົບປະມານແຫ່ງລັດຂອງແຂວງ ໃນໄລຍະຜ່ານມາ ແລະ ເກັບກໍາບັນຫາພົ້ນເດັ່ນຕ່າງໆ ທັງເປັນການລົງໃກ້ຊິດຕິດແທດກັບຮາກຖານ, ກໍາໄດ້ຂໍ້ມູນຕົວຈິງ ໃນການເຄື່ອນໄຫວປະຕິບັດໜ້າທີ່ວຽກງານ ຂອງພາກສ່ວນທີ່ກ່ຽວຂ້ອງ ຢູ່ບັນດາ 05 ເມືອງ; ພ້ອມທັງເປັນຂໍ້ມູນໃຫ້ແກ່ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ທີ 13 ແລະ ສະມາຊິກສະພາປະຊາຊົນແຂວງ ທີ່ຈະເຂົ້າຮ່ວມໃນກອງປະຊຸມສະໄຫມສາມັນ ເທື່ອທີ 04 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ທີ່ຈະໄດ້ຈັດຂຶ້ນໃນມໍ່ໆນີ້ ເພື່ອເຮັດໃຫ້ການຕິດຕາມກວດກາຢູ່ກອງປະຊຸມມີປະສິດທິຜົນ, ຮູ້ໄດ້ເຖິງສະພາບລວມ ດ້ານຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດ ຂອງແຂວງ ກໍຄືຢູ່ບັນດາ 05 ເມືອງ ໃຫ້ບັນລຸຕາມລະດັບຄາດໝາຍທີ່ກໍານົດໄວ້.