ໂດຍປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາປະຊາຊົນແຂວງ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ເພື່ອເປັນການໂຄສະນາ, ຜັນຂະຫຍາຍເນື້ອໃນສໍາຄັນຕ່າງໆ ທີ່ໄດ້ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ IX ແລະ ສພຂ ຊຸດທີ II, ລະຫວ່າງວັນທີ 29-31 ສິງຫາ 2023 ຜ່ານມານີ້, ທ່ານ ຄໍາເຜີຍ ງອນວັນຄໍາ ຮອງປະທານສະພາປະຊາຊົນແຂວງ ແລະ ທ່ານ ນາງ ບົວພອນ ແກ້ວມະນີ ຫົວໜ້າຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ ເມືອງນາໝໍ້ ໄດ້ພົບປະເຜີຍແຜ່ ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຊົນແຂວງ ຊຸດທີ II ຢູ່ທີ່ເມືອງນາໝໍ້, ແຂວງອຸດົມໄຊ. ການລົງເຜີຍແຜ່ໃນຄັ້ງນີ້ ລວມທັງໝົດໄດ້ 6 ຈຸດຄື: ບ້ານໂຮມໄຊ, ບ້ານຫ້ວຍອອນ, ບ້ານນາໝໍ້ໃຕ້, ບ້ານນໍ້າວຶນເໜືອ, ບ້ານນາທົ່ງ ແລະ ຫ້ອງວ່າການເມືອງນາໝໍ້ ມີຈໍານວນພົນລະເມືອງຜູ້ມີສິດເລືອກຕັ້ງ ເຂົ້າຮ່ວມທັງໝົດ 474 ຄົນ, ຍິງ 174 ຄົນ.
ໃນການລົງເຜີຍແຜ່ໃນແຕ່ລະຈຸດ ໄດ້ຮັບຟັງການລາຍງານສະພາບພົ້ນເດັ່ນໂດຍຫຍໍ້ຈາກອົງການປົກຄອງບ້ານ ແລະ ເມືອງ. ເນື້ອໃນການເຜີຍແຜ່ປະກອບມີ: 2 ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II. ພາຍຫລັງເຜີຍແຜ່ເອກະສານສໍາເລັດ ຍັງໄດ້ເປີດໂອກາດໃຫ້ຜູ້ມີສິດເລືອກຕັ້ງໄດ້ປະກອບຄໍາຄິດຄໍາເຫັນ ແລະ ຄໍາສະເໜີຕ່າງໆ, ບັນຫາທີ່ພໍ່ແມ່ປະຊາຊົນສົນໃຈ ແລະ ການສະເໜີສ່ວນຫລາຍແມ່ນ: ບັນຫາການປັບປຸງຊີວິດການເປັນຢູ່ຂອງປະຊາຊົນ (ວຽກງານພື້ນຖານໂຄງລ່າງ), ເສັ້ນທາງທາງລົດ, ເສັ້ນທາງໄປຫາເຂດທໍາການຜະລິດ, ການປູກ – ການລ້ຽງ, ບັນຫາຜົນກະທົບ-ການຊົດເຊີຍຕໍ່ກັບການລົງທຶນພາຍໃນ ແລະ ຕ່າງປະເທດ, ປະກົດການຫຍໍ້ທໍ້ຕ່າງໆ, ວຽກງານສາທາລະນະສຸກ, ການຄຸ້ມຄອງລາຄາສິນຄ້າຕ່າງໆ ແລະ ການສຶກສາ. ຈາກນັ້ນ, ສະມາຊິກສະພາປະຊາຊົນແຂວງ ກໍໄດ້ ອະທິບາຍ ແລະ ຊີ້ແຈງບາງບັນຫາທີ່ຜູ້ມີສິດເລືອກຕັ້ງສະເໜີ ພ້ອມທັງລວບລວມບັນດາຄໍາສະເໜີ ເພື່ອຈະນໍາເຂົ້າ ໃນກອງປະຊຸມຂອງ ຄະນະປະຈໍາສະພາປະຊາຊົນແຂວງ ເພື່ອຄົ້ນຄວ້າ, ປຶກສາຫາລືບັນຫາດັ່ງກ່າວ ແລ້ວມອບໃຫ້ພາກສ່ວນທີ່ກ່ຽວຂ້ອງແກ້ໄຂຕາມພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ທັນກັບເວລາ.
ໃນໂອກາດດັ່ງກ່າວ, ທ່ານ ຄໍາເຜີຍ ງອນວັນຄໍາ ໃນນາມຫົວໜ້າຄະນະທິມງານ ໄດ້ສະແດງຄວາມຊົມເຊີຍຕໍ່ອົງການປົກຄອງບ້ານ ແລະ ເມືອງ ຕໍ່ກັບການຈັດຕັ້ງປະຕິບັດໜ້າທີ່, ພ້ອມກັນສຸມໃສ່ເຫື່ອແຮງປະກອບສ່ວນເຂົ້າໃນການພັດທະນາບ້ານ, ພັດທະນາທ້ອງຖິ່ນຂອງຕົນ ເຮັດໃຫ້ບ້ານມີຄວາມສະຫງົບໂດຍພື້ນຖານ ປະຊາຊົນພາຍໃນບ້ານມີຊີວິດການເປັນຢູ່ດີຂຶ້ນເທື່ອລະກ້າວ; ພ້ອມດຽວກັນນັ້ນ, ທ່ານ ຍັງໄດ້ໃຫ້ທິດຊີ້ນໍາ, ໂອ້ລົມ ໃຫ້ແກ່ອົງການປົກຄອງບ້ານ ແລະ ເມືອງ ຕະຫລອດຮອດພໍ່ແມ່ປະຊາຊົນ ຈົ່ງພ້ອມກັນເພີ່ມທະວີຄວາມສາມັກຄີ ໃຫ້ເປັນຈິດໜຶ່ງໃຈດຽວ, ພ້ອມກັນຕ້ານບັນຫາປະກົດການຫຍໍ້ທໍ້ຕ່າງໆ, ການເຝົ້າລະວັງການລະບາດຂອງພະຍາດຕ່າງໆ ເຊັ່ນ: ພະຍາດໄຂ້ຍຸງ ແລະ ພະຍາດອື່ນໆ, ເສີມຂະຫຍາຍຮີດຄອງປະເພນີອັນດີງາມ, ສ້າງເສດຖະກິດໃນຄອບຄົວຂອງຕົນໃຫ້ເຂັ້ມແຂງ, ການປູກ-ການລ້ຽງໃຫ້ເປັນສິນຄ້າ ເພື່ອເຮັດໃຫ້ຊີວິດການເປັນຢູ່ໃຫ້ນັບມື້ດີຂຶ້ນໄປເລື້ອຍໆ.
ຂ່າວ: ສະພາປະຊາຊົນແຂວງ.