ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສສຂ ເຂດເລືອກຕັ້ງເມືອງນາໝໍ້ ເຄື່ອນໄຫວ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງ ສພຊ ແລະ ສພຂ

ກ.ຍ. 30, 2022 | ເຂດ 4 ອຸດົມໄຊ

ເພື່ອປະຕິບັດຕາມພາລະບົດບາດ, ສິດ ແລະ ນາທີ່ ຂອງ ສະມາຊິກສະພາປະຊາຊົນແຂວງ ໃນນາມທີ່ເປັນຕົວແທນຂອງປະຊາຊົນບັນດາເຜົ່າ, ລະຫວ່າງ ວັນທີ 26-28 ກັນຍາ 2022 ທ່ານ ຄໍາເຜີຍ ງອນວັນຄໍາ ຮອງປະທານສະພາປະຊາຊົນແຂວງ ອຸດົມໄຊ, ທ່ານ ນ. ແສງອາລຸນ ປັນຍາລໍ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງນາໝໍ້ ແລະ ທ່ານ ພັນຕີ ເພັດສະຫວັນ ໄຊອຸ່ນຄໍາ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງນາໝໍ້, ແຂວງອຸດົມໄຊ ໄດ້ລົງພົບປະພົນລະເມືອງຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດ ຂອງກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ຊຸດທີ II ທີ່ເມືອງນາໝໍ້, ແຂວງອຸດົມໄຊ ໄດ້ 6 ຈຸດຄື: ບ້ານໄຊສໍາພັນ, ບ້ານນາໝໍ້ເໜືອ, ບ້ານຂວາງ, ບ້ານນາສະຫວ່າງ, ບ້ານນໍ້າໂມງ ແລະ ບ້ານໃໝ່ນາເຕົາ ມີຜູ້ເຂົ້າຮ່ວມຮັບທັງໝົດ 414 ຄົນ, ຍິງ 136 ຄົນ.
    ຈຸດປະສົງໃນການລົງເຄື່ອນໄຫວຄັ້ງນີ້ ເພື່ອຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຈິດໃຈຜົນສໍາເລັດ ຂອງກອງສອງປະຊຸມ ໃຫ້ປະຊາຊົນໄດ້ຮັບຮູ້ ແລະ ເຂົ້າໃຈ. ໂອກາດດັ່ງກ່າວ ຍັງໄດ້ຮັບຟັງການລາຍງານສະພາບການໂດຍຫຍໍ້ຂອງອົງປົກຄອງບ້ານແຕ່ລະບ້ານ ພ້ອມນີ້, ຍັງໄດ້ຮັບຟັງຄໍາຄິດຄໍາເຫັນ, ຄໍາສະເໜີຂອງປະຊາຊົນ ເຊິ່ງບັນດາຄໍາສະເໜີສ່ວນຫຼາຍແມ່ນວຽກງານການພັດທະນາ ແລະ ປັບປຸງພື້ນຖານໂຄງລ່າງ ເປັນຕົ້ນ: ບັນຫາເສັ້ນທາງເປເພ, ລະບົບນໍ້າລິນ-ນໍ້າໃຊ້, ປັບປຸງກໍ່ສ້າງອາຄານຮຽນ, ການປູກການລ້ຽງ (ບ່ອນທໍາການຜະລິດ) ແລະ ບັນຫາອື່ນທີ່ຕິດພັນກັບຊີວິດປະຈໍາວັນຂອງປະຊາຊົນ, ບັນດາຄໍາສະເໜີດັ່ງກ່າວ ສະມາຊິກສະພາປະຊາຊົນແຂວງ ກໍ່ໄດ້ອະທິບາຍ, ຊີ້ແຈງ ບາງບັນຫາກັບທີ່ ແລະ ໄດ້ສັງລວມ ເພື່ອຈະນໍາເອົາຂໍ້ສະເໜີສົ່ງໃຫ້ພາກສ່ວນທີ່ກ່ຽວຂ້ອງ ແກ້ໄຂຕາມພາລະບົດບາດ ແລະ ທັນກັບເວລາ. ການເຄື່ອນໄຫວໃນຄັ້ງນີ້, ທ່ານ ຄໍາເຜີຍ ງອນວັນຄໍາ ຫົວໜ້າຄະນະທິມງານ ຍັງໄດ້ ມີຄິດຄິດຄໍາເຫັນໂອ້ລົມຕໍ່ພໍ່ແມ່ປະຊາຊົນ, ກ່ອນອື່ນທ່ານ ໄດ້ສະແດງຄວາມຊົມເຊີຍຕໍ່ອົງການປົກຄອງ ທີ່ໄດ້ເອົາໃຈໃສ່ຕໍ່ໜ້າທີ່ຄວາມຮັບຊອບ, ປະກອບສ່ວນໃນການປົກປັກຮັກສາ, ພັດທະນາບ້ານ ກໍ່ຄື ການຍົກລະດັບຊີວິດການເປັນຢູ່ຂອງປະຊາຊົນດີຂຶ້ນເປັນກ້າວໆ ພ້ອມກັນນັ້ນ ຍັງໄດ້ເນັ້ນໜັກ ໃຫ້ບັນດາອົງການປົກຄອງບ້ານ ເພີ່ມທະວີຄວາມສາມັກຄີລະຫວ່າງຄະນະບ້ານກັບປະຊາຊົນ, ເປັນເຈົ້າໃນການພັດທະນາບ້ານ ໂດຍສະເພາະແມ່ນການປູກການລ້ຽງເປັນສິນຄ້າ, ຮັບປະກັນຄວາມສະຫງົບສຸກ, ວຽກງານການສຶກ, ວຽກງານສາທາລະນະສຸກ ແລະ ສືບຕໍ່ຮັກສາຮີດຄອງປະເພນີມູນເຊື້ອອັນດີງາມຂອງເຜົ່າ.
ພາບ ແລະ ຂ່າວ: ສີແຫວງ ສີບຸນເຮືອງ