(ສພຊ) ໃນວັນທີ 27 ກັນຍາ 2019 ທີ່ຫ້ອງປະຊຸມໂຮງແຮມດອນຈັນພາເລດ ນະຄອນຫລວງວຽງຈັນ ສະພາແຫ່ງຊາດລາວ-ຫວຽດນາມ ໄດ້ຈັດກອງປະຊຸມສໍາມະນາ ກ່ຽວກັບການຈັດຕັ້ງປະຕິບັດບົດບາດຕິດຕາມກວດກາການພັດທະນາສີມືແຮງງານ ແລະ ການພິຈາລະນາການຮ້ອງຂໍຄວາມເປັນທໍາ ໂດຍການເປັນປະທານຮ່ວມຂອງສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ແລະ ສະຫາຍ ນາງ ຫງວຽນ ທິ ກິມ ເງິນ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສສ.ຫວຽດນາມ ມີບັນດາສະຫາຍຄະນະປະທານ ຄະນະປະຈໍາສະພາແຫ່ງຊາດ ສປປລາວ, ປະທານ-ຮອງປະທານກໍາມາທິການຕ່າງໆຂອງສະພາແຫ່ງຊາດ, ເລຂາ-ຮອງເລຂາທິການ, ປະທານ-ຮອງປະທານຄະນະສະມາຊິກສະພາແຫ່ງຊາດເພດຍິງ, ຄະນະຮັບຜິດຊອບວຽກງານເຂດເລືອກຕັ້ງ, ສະຖາບັນຄົ້ນຄວ້ານິຕິກໍາ, ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 1 ນະຄອນຫລວງວຽງຈັນ, 10 ແຂວງວຽງຈັນ ແລະ 11 ແຂວງບໍລິຄໍາໄຊ, ຫົວໜ້າ-ຮອງຫົວໜ້າກົມ, ສູນ ແລະ ພະນັກງານລັດຖະກອນພາຍໃນສະພາແຫ່ງຊາດ ສປປລາວ, ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ແຂກຖືກເຊີນຕາງໜ້າຈາກພາກສ່ວນກ່ຽວຂ້ອງ ແລະ ຄະນະຜູ້ແທນຂັ້ນສູງຈາກສະພາແຫ່ງຊາດ ສສ.ຫວຽດນາມເຂົ້າຮ່ວມ.

ການຈັດກອງປະຊຸມສໍາມະນາໃນຄັ້ງນີ້ ເພື່ອເປັນການປຶກສາຫາລືແລກປ່ຽນບົດຮຽນໃນຫົວຂໍ້ຕ່າງໆ ເປັນຕົ້ນວຽກງານການພັດທະນາສີມືແຮງງານ, ການສ້າງວຽກເຮັດງານທໍາ ການພິຈາລະນາແກ້ໄຂຄໍາຮ້ອງຂໍຄວາມເປັນທໍາຂອງປະຊາຊົນ ແນໃສ່ວຽກງານດັ່ງກ່າວໃຫ້ນັບມື້ນັບດີຂຶ້ນ.

ຜູ້ແທນກອງປະຊຸມ ໄດ້ຮັບຟັງຄໍາເຫັນກ່າວໄຂກອງປະຊຸມສໍາມະນາຂອງສະຫາຍປະທານສະພາແຫ່ງຊາດ ສປປລາວ, ຄໍາເຫັນຕໍ່ກອງປະຊຸມຂອງສະຫາຍປະທານສະພາແຫ່ງຊາດ ສສ.ຫວຽດນາມ, ການສະເໜີບົດຮຽນກ່ຽວກັບການສຶກສາວິຊາຊີບ ແລະ ການແກ້ໄຂວຽກເຮັດງານທໍາ ຢູ່ ສສ.ຫວຽດນາມ, ບົດຮຽນກ່ຽວກັບນະໂຍບາຍທາງດ້ານກົດ ໝາຍ ແລະ ການປະຕິບັດກົດໝາຍ ກ່ຽວກັບການສຶກສາວິຊາຊີບ ແລະ ການແກ້ໄຂວຽກເຮັດງານທໍາຢູ່ ສສ.ຫວຽດນາມ, ການພັດທະນາສີມືແຮງງານ ແລະ ການສ້າງວຽກເຮັດງານທໍາໃຫ້ແກ່ຊາວໜຸ່ມລາວ, ການພັດທະນາສີມືແຮງງານ ແລະ ການສ້າງວຽກເຮັດງານທໍາໃຫ້ແກ່ຊາວໜຸ່ມລາວ, ບົດຮຽນກ່ຽວກັບການປະສານງານລະຫວ່າງບັນດາອົງການຂອງສະພາແຫ່ງຊາດ ແລະ ລັດຖະບານ, ບັນດາກະຊວງ ແລະ ຂະແໜງການກ່ຽວຂ້ອງໃນການພິຈາລະນາຄໍາຮ້ອງຂໍຄວາມເປັນທໍາຂອງປະຊາຊົນຫວຽດນາມ, ການຄົ້ນຄວ້າ ແລະ ພິຈາລະນາຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ ສປປລາວ ຈາກຄະນະຜູ້ແທນລາວ-ຫວຽດນາມ ຈາກນັ້ນ, ຜູ້ແທນກອງປະຊຸມໄດ້ແລກປ່ຽນຄໍາຄິດຄໍາເຫັນເພື່ອແລກປ່ຽນບົດຮຽນຮ່ວມກັນ.

ຈາກນັ້ນ, ຜູ້ແທນກອງປະຊຸມຍັງໄດ້ເຂົ້າຮ່ວມພິທີປະດັບຫລຽນໄຊເອກະລາດຊັ້ນ I , ຊັ້ນ II ແລະ ຊັ້ນ III, ຫລຽນໄຊມິດຕະພາບ ແລະ ຫລຽນກາມິດຕະພາບ ຂອງ ສສ.ຫວຽດນາມ ໃຫ້ແກ່ກົມກອງລວມໝູ່ ແລະ ບຸກຄົນ ຂອງສະພາແຫ່ງຊາດ ແຫ່ງ ສປປ ລາວ.

(ສອນສັກ ວັນວິໄຊ)