(ສພຊ) ສະພາແຫ່ງຊາດ (ສພຊ) ໄດ້ຈັດພິທີປາຖະກະຖາກ່ຽວກັບວັນສ້າງຕັ້ງເມືອງວຽງໄຊ ແຂວງຫົວພັນ ຖານທີ່ໝັ້ນຂອງການປະຕິວັດ ຄົບຮອບ 50 ປີ (ວັນທີ 30 ພະຈິກ 1968-30 ພະຈິກ 2018) ຂຶ້ນໃນ ວັນທີ 5 ພະຈິກ 2018 ທີ່ສະພາແຫ່ງຊາດ (ຫລັກ 6) ປາຖະກະຖາໂດຍ ທ່ານ ທອງສະຫວັດ ໄຂຄຳພິທູນ ອາດີດກຳມະການສູນກາງພັກ, ຫົວໜ້າຫ້ອງວ່າການສູນກາງພັກ ເຂົ້າຮ່ວມມີ ຄະນະບໍລິຫານພັກ, ຄະນະປະຈຳສະພາແຫ່ງຊາດ, ບັນດາຮອງປະທານກຳມາທິການ, ຄະນະ ສສຊ ເພດຍິງ, ຄະນະຮັບຜິດຊອບວຽກງານເຂດເລືອກຕັ້ງ, ສະຖາບັນຄົ້ນຄວ້ານິຕິກຳ, ຄະນະເລຂາທິການ, ຄະນະກົມ, ຄະນະສູນ ແລະ ສະມາຊິກພັກ, ພະນັກງານລັດຖະກອນ ທັງໝົດພາຍໃນສະພາແຫ່ງຊາດ.
ໂອກາດນີ້, ທ່ານ ທອງສະຫວັດ ໄຂຄຳພິທູນ ໄດ້ຍົກໃຫ້ເຫັນຄວາມໝາຍຄວາມສຳຄັນຂອງການສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວ ໃນການນຳພາການປະຕິວັດ, ເປັນການລະນຶກຈົດຈຳເຖິງໄຊຊະນະອັນຍິ່ງໃຫຍ່ຂອງກອງທັບ ແລະ ປະຊາຊົນລາວບັນດາເຜົ່າ ກໍຄືຜົນງານອັນລ້ຳເລີດ ແລະ ຄຸນງາມຄວາມດີອັນໃຫຍ່ຫລວງຂອງການນຳຮຸ່ນກ່ອນ ໂດຍສະເພາະ ປະທານ ໄກສອນ ພົມວິຫານ ແລະ ຜູ້ນຳອື່ນໆ ທີ່ໄດ້ນຳພາ ພາລະກິດປົດປ່ອຍຊາດ, ສ້າງເມືອງວຽງໄຊເປັນຖານທີ່ໝັ້ນອັນແຂງແກ່ນ ເພື່ອເຮັດສຳເລັດການປະຕິວັດຊາດ ປະຊາທິປະໄຕ ນຳເອົາປະເທດຊາດກ້າວຂຶ້ນສູ່ສັງກາດໃໝ່; ທັງນີ້ເພື່ອແນ່ໃສ່ສຶກສາອົບຮົມພະນັກງານ, ສະມາຊິກພັກ, ນັກຮົບ ແລະ ປະຊາຊົນລາວບັນດາເຜົ່າ ໂດຍສະເພາະແມ່ນຄົນຮຸ່ນໝຸ່ມໃຫ້ຮັບຮູ້-ເຂົ້າໃຈຢ່າງເລິກເຊິ່ງ ກ່ຽວກັບເສັ້ນທາງກ້າວເດີນ ອັນລະອິດລະອ້ຽວຂອງການປະຕິວັດ ມູນເຊື້ອມູນເຊື້ອຕໍ່ສູ້ອັນມີໄຊ ແລະ ການນຳພາອັນສະຫລາດສ່ອງໃສຂອງພັກປະຊາຊົນປະຕິວັດລາວ ກໍຄືການຄົ້ນຄວ້າຮ່ຳຮຽນເປັນແບບຢ່າງໃນຄຸນສົມບັດສິນທຳປະຕິວັດຈາກຜູ້ນໍາຮຸ່ນກ່ອນ. ສິ່ງສຳຄັນເປັນການເສີມຂະຫຍາຍມູນເຊື້ອພິລະອາດຫານຂອງກອງທັບ ແລະ ປະຊາຊົນບັນດາເຜົ່າ, ມູນເຊື້ອສາມັກຄີປອງດອງ ແລະ ໝູນເຊື້ອດຸໝັ່ນຂະຫຍັນພຽນໃນການອອກແຮງງານ ສ້າງສາພັດທະນາປະເທດຊາດ ເພື່ອກ້າວສູ່ຈຸດໝາຍສັງຄົມນິຍົມທີ່ກຳນົດໄວ້ຢ່າງມີໄຊ.
ໄຊໂສພາພອນ ມິ່ງມຸງຄຸນ