(ສພຊ) ໃນຕອນເຊົ້າຂອງວັນພະຫັດທີ 18 ມັງກອນ 2024 ທີ່ສະພາແຫ່ງຊາດ ໄດ້ຈັດພິທີປາຖະກະຖາມູນເຊື້ອວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/01/1949-20/01/2024) ແລະ ວັນເກີດປະທານ ຄຳໄຕ ສີພັນດອນ ຄົບ ຮອບ 100 ປີ (08/02/1924-08/02/2024) ເພື່ອທົບທວນຄືນມູນເຊື້ອ ແລະ ຜົນງານອັນໃຫຍ່ຫຼວງທີ່ກອງທັບ ແລະ ປະ ຊາຊົນລາວ ຍາດມາໄດ້ຕະຫຼອດໄລຍະ 75 ປີທີ່ຜ່ານມາ, ຖືເອົາໂອກາດນີ້ ເປັນການສຶກສາອົບຮົມສະມາຊິກພັກ, ພະນັກງານ-ລັດຖະກອນ ໃຫ້ຍົກສູງນ້ຳໃຈຮັກຊາດ, ເສີມຂະຫຍາຍຄວາມສາມັກຄີ, ສ້າງສະຕິເປັນເຈົ້າຕົນເອງ, ເປັນເຈົ້າການເຂົ້າຮ່ວມໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ; ເພື່ອເປັນການລະນຶກເຖິງຄຸນງາມ ຄວາມດີ, ຜົນງານຂອງປະທານ ຄຳໄຕ ສີພັນດອນ ຜູ້ນຳຮຸ່ນທຳອິດຂອງການປະຕິວັດລາວ ທີ່ມີຕໍ່ປະເທດຊາດ ແລະ ຮໍ່າຮຽນເອົາແບບຢ່າງອັນດີງາມເພື່ອເຝິກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກທີ່ດີ, ສືບທອດພາລະກິດຂອງພັກ.

ໃນພິທີ, ໃຫ້ກຽດປາຖະກະຖາລະນຶກວັນເກີດຂອງປະທານ ຄໍາໄຕ ສິພັນດອນ ຄົບຮອບ 100 ປິ ໂດຍສະຫາຍ ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ເຊິ່ງໄດ້ຍົກໃຫ້ເຫັນເຖິງຊີວິດການກຳເນີດ ແລະ ການເຕີບໃຫຍ່ໃນແປວໄຟແຫ່ງການປະຕິວັດຂອງປະທານ ຄຳໄຕ ສີພັນດອນ; ແບບ ແຜນຊີ້ນຳ-ນຳພາ; ການອຸທິດຕົນຢ່າງສຸດກົກສຸດປາຍເພື່ອປະເທດຊາດ, ເພື່ອປະຊາຊົນ, ເພື່ອຄວາມມັ່ງຄັ່ງເຂັ້ມແຂງ ແລະ ຄວາມຈະເລີນວັດທະນາຂອງປະເທດຊາດ, ເພື່ອຄວາມຢູ່ດີກິນດີ ແລະ ຄວາມຮັ່ງມີຜາສຸກຂອງປະຊາຊົນລາວບັນດາເຜົ່າ. ປະ ທານ ຄໍາໄຕ ສິີພັນດອນ ແມ່ນໜຶ່ງໃນບັນດາຜູ້ນຳຮຸ່ນທໍາອິດຂອງການປະຕິວັດລາວ ໄດ້ຮ່ວມກັບຜູ້ນຳຄົນອື່ນໆນໍາພາພາລະກິດການຕໍ່ສູ້ປົດປ່ອຍປະເທດຊາດອອກຈາກແອກປົກຄອງຂອງຈັກກະພັດຕ່າງດ້າວ ກໍຄືພາລະກິດປົກປັກຮັກສາ ແລະ ສ້າງສາປະ ເທດຊາດ; ເພິ່ນເປັນຜູ້ນຳທີ່ມີນ້ຳໃຈຮັກຊາດອັນສູງສົ່ງ, ເສຍສະຫຼະທຸກສິ່ງທຸກຢ່າງ ອຸທິດສະຕິປັນຍາ ແລະ ກໍາລັງວັງຊາຢ່າງບໍ່ຮູ້ອິດຮູ້ເມື່ອຍ, ຄຽງບ່າຄຽງໄຫຼ່ກັບປະທານ ໄກສອນ ພົມວິຫານ ແລະ ຜູ້ນຳຄົນອື່ນໆ ຈັດຕັ້ງນໍາພາຂະບວນການປະຕິວັດເຕີບໃຫຍ່ຂະຫຍາຍຕົວ ແລະ ຍາດໄດ້ໄຊຊະນະຢ່າງຕໍ່ເນື່ອງ, ຍາດໄດ້ຜົນສໍາເລັດຢ່າງມີໄຊ ແລະ ພາປະເທດຊາດກ້າວຂຶ້ນສູ່ຈຸດໝາຍສັງຄົມນິຍົມເທື່ອລະກ້າວຢ່າງໜັກແໜ້ນ. ປະທານ ຄໍາໄຕ ສີພັນດອນ ຍາມໃດກໍໄດ້ຮັບຄວາມນັບຖືຮັກແພງ ແລະ ເຊື່ອໝັ້ນໄວ້ວາງໃຈຈາກໝູ່ຄະນະ ກໍຄືພະນັກງານນັກຮົບ ແລະ ປະຊາຊົນລາວບັນດາເຜົ່າ, ໄດ້ຮັບມອບໝາຍຫຼາຍໜ້າທີ່ສໍາຄັນເປັນລໍາດັບມາ; ຈາກຜູ້ແທນລັດຖະບານລາວອິດສະຫຼະປະຈໍາເຂດໃຕ້ລາວ, ເປັນປະທານຄະນະກໍາມະການຕໍ່ຕ້ານເຂດກາງ, ເປັນກໍາມະການສູນກາງແນວລາວອິດສະຫຼະ ແລະ ແນວລາວຮັກຊາດ, ເປັນກໍາມະການສູນກາງພັກ; ໄດ້ຮັບການປະດັບຊັ້ນພົນເອກ ແລະ ເປັນຜູ້ບັນຊາການສູງສຸດກອງທັບປົດປ່ອຍປະຊາຊົນລາວ ແລະ ກອງທັບປະຊາຊົນລາວໃນເວລາຕໍ່ມາ; ເປັນກໍາມະການກົມການ ເມືອງ ແລະ ຄະນະເລຂາທິການສູນກາງພັກ, ເປັນຮອງນາຍົກລັດຖະມົນຕີ, ເປັນລັດຖະມົນຕີກະຊວງປ້ອງກັນປະເທດ, ເປັນນາ ຍົກລັດຖະມົນຕີ ແລະ ເປັນຜູ້ນໍາສູງສຸດຂອງພັກ ແລະ ລັດເຮົາ.

ສະຫຼຸບແລ້ວ, ປະທານ ຄໍາໄຕ ສີພັນດອນ ແມ່ນຜູ້ໜຶ່ງໃນບັນດາຜູ້ນຳຮຸ່ນກໍ່ຕັ້ງຂະບວນການ ແລະ ບຸກເບີກເສັ້ນທາງການປະຕິວັດຢູ່ປະເທດເຮົາ ເຊິ່ງຍາມໃດກໍໜັກແໜ້ນທາງດ້ານການເມືອງ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງຕໍ່ໜ້າທີ່ທີ່ໄດ້ຮັບມອບໝາຍ; ເລີ່ມຈາກພະນັກງານທຳມະດາ ກາຍເປັນຜູ້ຊີ້ນຳ-ບັນຊາ ແລະ ນຳພາຂະບວນການຕໍ່ສູ້ປົດປ່ອຍຊາດ, ຄຽງບ່າຄຽງໄຫຼ່ກັບປະທານ ໄກສອນ ພົມວິຫານ, ປະທານ ສຸພານຸວົງ ແລະ ຜູ້ນໍາອື່ນໆຂອງແນວລາວສ້າງຊາດ ໄດ້ຮັບໄຊຊະນະ, ສະຖາປະນາ ສປປລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975; ຕໍ່ຈາກນັ້ນ, ກໍໄດ້ປະກອບສ່ວນຄົ້ນຄວ້າ ແລະ ກຳນົດທິດທາງຍຸດທະສາດໃນການປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງແນວທາງປ່ຽນແປງໃໝ່ຢ່າງຖືກຕ້ອງ, ສອດຄ່ອງ ທັງນຳພາ-ຊີ້ນຳການຈັດຕັ້ງປະຕິບັດໄດ້ຮັບຜົນສຳເລັດໃນຫຼາຍດ້ານ.

ຫຼັງຈາກນັ້ນ, ສະຫາຍ ພົທ. ສຸວອນ ເລືອງບຸນມີ ກຳມະການສູນກາງພັກ, ຮອງປະທານສະພາແຫ່ງຊາດ ໄດ້ຍົກໃຫ້ເຫັນປະຫວັດມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວຕະຫຼອດໄລຍະ 75 ປີ, ຜົນງານອັນພິລະອາດຫານຂອງທີ່ນັກຮົບຮຸ່ນເກົ່າໄດ້ດຳເນີນການຕໍ່ສູ້ກູ້ຊາດຕ້ານພວກຈັກກະພັດຕ່າງດ້າວທີ່ມາຮຸກຮານ ແລະ ກົດຂີ່ຂູດຮີດ ຈົນເຮັດໃຫ້ປະຊາຊົນລາວມີນໍ້າໃຈຄຽດແຄ້ນ ບໍ່ຍອມຈຳນົນຕໍ່ພວກລ່າເມືອງຂຶ້ນທັງແບບເກົ່າ ແລະ ແບບໃໝ່; ດ້ວຍຄວາມທໍລະ ມານດັ່ງກ່າວ ຈຶ່ງໄດ້ສ້າງຕັ້ງກອງທັບປະຊາຊົນລາວຂຶ້ນໃນວັນທີ 20 ມັງກອນ 1949 ນັບແຕ່ນັ້ນມາ ກອງທັບປະຊາຊົນລາວໄດ້ເຕີບໃຫຍ່ເຂັ້ມແຂງພາຍໃຕ້ການຊີ້ນຳ-ນຳພາຂອງພັກປະຊາຊົນປະຕິວັດລາວ ນຳພາຕໍ່ສູ້ກູ້ຊາດຈົນຍາດມາໄດ້ໄຊຊະນະຢ່າງລຽນ ຕິດ ສາມາດຊີ້ນຳ-ນຳພາປະຊາຊົນລາວບັນດາເຜົ່າ ປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາ ສາທາລະນະລັດ ປະ ຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975. ການຫວນຄືນມູນເຊື້ອວັນສຳຄັນດັ່ງກ່າວຄັ້ງນີ້ ເພື່ອສະແດງຄວາມເຄົາລົບຮັກ, ກະຕັນຍູຮູ້ບຸນຄຸນຕໍ່ຜົນງານອັນໃຫຍ່ຫຼວງຂອງກອງທັບປະຊາຊົນລາວ ເພື່ອເປັນການປຸກລະ ດົມເຮັດໃຫ້ພະນັກງານ-ລັດຖະກອນ, ສະມາຊິກພັກ ແລະ ປະຊາຊົນທຸກຊັ້ນຄົນ ມີຈິດໃຈຮັກຊາດ ຮັກບ້ານເກີດເມືອງນອນ ຮັກຜືນແຜ່ນດິນອັນຄົບຖ້ວນ ຮັກລະບອບໃໝ່, ສ້າງຄວາມສາມັກຄີໃຫ້ເປັນປຶກແຜ່ນ ສ້າງສະຕິເປັນເຈົ້າຕົນເອງເພິ່ງຕົນເອງ, ມີສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງອິດທິກຳລັງປໍລະປັກ ແລະ ເປັນເຈົ້າການເຂົ້າຮ່ວມປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກ ທັງເປັນການໂຄສະນາສຶກສາອົບຮົມນໍ້າໃຈປະຕິວັດ, ຄວາມກະຕັນຍູຮູ້ບຸນຄຸນ ແລະ ຮ່ຳຮຽນເອົາແບບຢ່າງຄຸນສົມບັດສິນທຳປະຕິວັດ, ຄຸນງາມຄວາມດີຂອງປະທານ ຄຳໄຕ ສີພັນດອນ ກໍຄືບັນດາຜູ້ນຳຮຸ່ນກ່ອນ ແລະ ພະນັກງານປະຕິວັດ ຜູ້ທີ່ໄດ້ເສຍສະຫຼະຊີວິດ, ຜູ້ເສຍອົງຄະ, ຄອບຄົວຜູ້ທີ່ມີຜົນງານທີ່ໄດ້ປະ ກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະ 75 ປີຜ່ານມາ ຈົນມີຄວາມຈະເລີນເຂັ້ມແຂງຮອດປັດຈຸບັນ.

ເຂົ້າຮ່ວມພິທີປາຖະກະຖາໃນຄັ້ງນີ້ ມີຄະນະບໍລິຫານງານພັກສະພາແຫ່ງຊາດ, ຄະນະພັກຮາກຖານ, ໜ່ວຍພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກພັກ ແລະ ພະນັກງານ-ລັດຖະກອນ ທົ່ວສະພາແຫ່ງຊາດ.

(ຂ່າວ ແລະ ພາບ: ນາງ ກຸກກິກ ບຸດດາໄຊ)