ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 8 ເມສາ 2022 ທີ່ຫ້ອງປະຊຸມທາງໄກ (ຊັ້ນ 2) ສະພາປະຊາຊົນແຂວງຜົ້ງສາລີ (ສພຂ) ທ່ານ ທອງສີ ເສົາສຸລິພົມ ປະທານສະພາປະຊາຊົນແຂວງຜົ້ງສາລີ, ບັນດາທ່ານຄະນະປະຈໍາສະພາປະຊາຊົນແຂວງຜົ້ງສາລີ (ຄປຈຂ), ມີຜູ້ຕາງໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ; ພະແນກແຜນການ ແລະ ການລົງທຶນແຂວງ; ພະແນກການເງິນແຂວງ; ພະແນກພະລັງງານ ແລະ ບໍ່ແຮ່ແຂວງ; ພະແນກກະສິກໍາ ແລະ ປ່າໄມ້ແຂວງ; ພະແນກອຸດສາຫະກໍາ ແລະ ການຄ້າແຂວງ; ພະແນກໂຍທາທິການ ແລະ ຂົນສົ່ງແຂວງ; ພະແນກຖະເເຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ; ກອງບັນຊາການຕໍາຫຼວດແຂວງ; ກອງບັນຊາການທະຫານແຂວງ; ສະພາການຄ້າ ແລະ ອຸດສາຫະກໍາແຂວງ ເຂົ້າຮ່ວມກອງປະຊຸມລະຫວ່າງ ຄະນະຮັບຜິດຊອບຊີ້ນໍາການປະເມີນການຈັດຕັ້ງປະຕິບັດກົດໝາຍ ກັບ ສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງຂັ້ນແຂວງ (ຮູບແບບກອງປະຊຸມທາງໄກ) ໂດຍການເປັນປະທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານກໍາມາທິການກົດໝາຍ, ຫົວໜ້າຄະນະຮັບຜິດຊອບປະເມີນການຈັດຕັ້ງປະຕິບັດກົດໝາຍ; ມີ ຕາງໜ້າຈາກບັນດາກະຊວງ, ສະມາຊິກສະພາແຫ່ງຊາດ, ຄຈປຂ, ຮອງເຈົ້າແຂວງຜູ້ຊີ້ນໍາວຽກງານເສດຖະກິດຂອງແຂວງ, ບັນດາພະແນກການ ແລະ ອົງການຈັດຕັ້ງລັດທີ່ກ່ຽວຂ້ອງຢູ່ຂັ້ນທ້ອງຖິ່ນ ໃນທົ່ວປະເທດເຂົ້າຮ່ວມ.

ທີ່ປະຊຸມໄດ້ຮັບຟັງ ທ່ານ ທັນຕາ ກອງຜາລີ ຮອງປະທານກໍາມາທິການແຜນການ, ການເງິນ ແລະ ການກວດສອບ, ກໍາມະການຄະນະຮັບຜິດຊອບປະເມີນການຈັດຕັ້ງປະຕິບັດກົດໝາຍ ຜ່ານມະຕິ ສະບັບເລກທີ 75/ຄປຈ, ລົງວັນທີ 25 ມີນາ 2022 ວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນໍາ ແລະ ກອງເລຂາປະເມີນຜົນການປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ; ຄໍາແນະນໍາ ສະບັບເລກທີ 03/ຄປຈ, ລົງວັນທີ 1 ເມສາ 2022 ວ່າດ້ວຍການການຕິດຕາມ ກວດກາການປະເມີນການຈັດຕັ້ງປະຕິບັດໝາຍ; ຮັບຟັງທ່ານ ພອນແກ້ ຕົ້ນວໍລະຈິດ ຫົວໜ້າກົມຕິດຕາມກວດກາ, ໂຄສະນາ ແລະ ຕິຄວາມໝາຍກົດໝາຍ, ຫົວໜ້າກອງເລຂາການປະເມີນການຈັດຕັ້ງປະຕິບັດກົດໝາຍ ຜ່ານ ແຜນການສະບັບເລກທີ 02/ຄປກໝ, ລົງວັນທີ 31 ມີນາ 2022 ກ່ຽວກັບການຕິດຕາມກວດກາ ແລະ ເກັບກໍາຂໍ້ມູນກ່ຽວກັບການປະເມີນການຈັດຕັ້ງປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ; ຄໍາເຈາະຈີ້ມຕໍ່ 4 ກົດໝາຍ ທີ່ຈະປະເມີນ ຄື: ກົດໝາຍວ່າດ້ວຍທີ່ດິນ, ກົດໝາຍວ່າດ້ວຍສົງເສີມການລົງທຶນ, ກົດໝາຍວ່າດ້ວຍຊັບສິນຂອງລັດ ແລະ ກົດໝາຍວ່າດ້ວຍແຮ່ທາດ.

ຈາກນັ້ນ, ຜູ້ແທນທີ່ເຂົ້າຮ່ວມກອງປະຊຸມຢູ່ຂັ້ນສູນກາງ ແລະ ທ້ອງຖິ່ນກໍໄດ້ຜັດປ່ຽນກັນແລກປ່ຽນຄວາມຄິດຄວາມເຫັນ ຢ່າງກົງໄປກົງມາ, ພາວະວິໄສ ຕໍ່ກັບກົດໝາຍ 4 ສະບັບ. ທັງນີ້ກໍເພື່ອເປັນຂໍ້ມູນໃຫ້ແກ່ການກະກຽມກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະໄຂຂຶ້ນໃນຕໍ່ໜ້າ ແລະ ເປັນຂໍ້ມູນພື້ນຖານໃຫ້ແກ່ການສ້າງ ແລະ ປັບປຸງກົດໝາຍໃນຕໍ່ໜ້າ, ໃຫ້ສາມາດຮັບປະກັນໄດ້ໃນການປົກປ້ອງສິດ, ຜົນປະໂຫຍດຂອງລັດ, ລວມໝູ່, ນິຕິບຸກຄົນ, ບຸກຄົນ ແລະ ທັງເປັນສ້າງເງື່ອນໄຂໃຫ້ແກ່ການດຶງດູດການລົງທຶນ ທັງພາຍໃນ ແລະ ຕ່າງປະເທດ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ