ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ຕອນເຊົ້າຂອງວັນທີ 20 ກຸມພາ 2022 ນີ້, ສະຫາຍ ໂຮ່ ດ້າຍ ນາມ ກຳມະການປະຈຳພັກແຂວງ, ຫົວໜ້າຄະນະໂຄສະນາ-ສຶກສາແຂວງກວາງຈິ ແຫ່ງ ສສ ຫວຽດນາມ ໃນໂອກາດທີ່ສະຫາຍເດີນທາງມາພົບປະຢ້ຽມຢາມ ແລະ ເຮັດວຽກຢູ່ແຂວງສາລະວັ ຖືໂອກາດເຂົ້າພົບ ແລະ ເຮັດວຽກກັບ ສະຫາຍ ຮອງເລຂາພັກແຂວງ ປະທານ ສະພາປະຊາຊົນແຂວງ (ສພຂ)ສາລະວັນ ແຫ່ງ ສປປລາວ; ໂດຍໃຫ້ການຕ້ອນຮັບຂອງ ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ ສາລະວັນ ແຫ່ງ ສປປລາວ, ເຂົ້າຮ່ວມມີ ສະຫາຍ ຂັນໄຊ ລັດຖະເຮົ້າ ຄະນະປະຈຳພັກແຂວງ ຮອງປະທານ ສພຂ; ສະຫາຍ ຈັນສະໝອນ ພົມມະແສງ ຄະນະປະຈໍາພັກແຂວງ ຫົວໜ້າຄະນະໂຄສະນາອົບຮົມແຂວງ ພ້ອມດ້ວຍຄະນະ, ມີຄະນະປະຈໍາ ສພຂ; ພ້ອມດ້ວຍເລຂາທິການ ສພຂ ເຂົ້າຮ່ວມໃນຄັ້ງນີ້.

ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ ສາລະວັນ ໄດ້ກ່າວສະແດງຄວາມປິຕິຍິນດີເປັນຢ່າງສູງ ທີ່ ສະຫາຍ ໂຮ່ ດ້າຍ ນາມ ກຳມະການປະຈຳພັກແຂວງ, ຫົວໜ້າຄະນະໂຄສະນາ-ສຶກສາແຂວງກວາງຈິ ແຫ່ງ ສສ ຫວຽດນາມ ທີ່ໄດ້ເດີນທາງມາພົບປະຢ້ຽມຢາມ ແລະ ເຮັດວຽກຢູ່ແຂວງສາລະວັນ, ພ້ອມນັ້ນກໍ່ໄດ້ລາຍງານສະພາບເສດຖະກິດ-ສັງຄົມພາຍໃນແຂວງສາລະວັນ ແລະ ວຽກງານການເຄື່ອນໄຫວຂອງ ສພຂ ສາລະວັນ ຮອບດ້ານ ໃນໄລຍະທີ່ຜ່ານມາ;

ໂອກາດດຽວກັນ ສະຫາຍ ໂຮ່ ດ້າຍ ນາມ ກຳມະການປະຈຳພັກແຂວງ, ຫົວໜ້າຄະນະໂຄສະນາ-ສຶກສາແຂວງກວາງຈິ ແຫ່ງ ສສ ຫວຽດນາມ ກໍ່ໄດ້ສະແດງຄວາມຂອບໃຈເປັນຢ່າງສູງ ທີ່ທາງ ສພຂ ສາລະວັນ ພ້ອມດ້ວຍຄະນະ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ສະຫາຍໄດ້ສະເໜີຈຸດປະສົງຂອງຄະນະການນຳຂັ້ນສູງທີ່ເດີນທາງມາເຄື່ອນໄຫວເຮັດວຽກຢູ່ແຂວງສາລະວັນໃນຄັ້ງນີ້, ນອກນັ້ນສະຫາຍ ກໍ່ໄດ້ລາຍງານສະພາບໂດຍລວມ ຈຸດພິເສດການພັດທະນາເສດຖະກິດຂອງແຂວງກວາງຈິ ແຫ່ງ ສສ ຫວຽດນາມ ແລະ ສະພາບສາຍພົວພັນຫັດແໜ້ນຄວາມສາມັກຄີທີ່ດີລະຫວ່າງສອງແຂວງກວາງຈິ ແຫ່ງ ສສ ຫວຽດນາມ ແລະ ແຂວງສາລະວັນ ແຫ່ງ ສປປລາວ ຕະຫຼອດມາ ແລະ ພ້ອມທັງແລກປ່ຽນບາງບົດຮຽນແບບເຊິ່ງໜັາກັນ ແລະ ກັນ ດ້ວຍໄມຕີຈິດອັນອົບອຸ່ນ ທີ່ເຕັມໄປດ້ວຍເນື້ອໃນອຸດົມສົມບູນ ບົນພື້ນຖານສາຍພົວພັນຮ່ວມມື ແລະ ຄວາມສາມັກຄີພິເສດ.

ຕອນທ້າຍ ສະຫາຍ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ ກໍ່ໄດ້ມອບຮູບພາບອະດີດຜູ້ນຳ ອົງແກ້ວ ເພື່ອເປັນຂອງຂວັນທີ່ລະນຶກ ມອບໃຫ້ສະຫາຍ ໂຮ່ ດ້າຍ ນາມ ກຳມະການປະຈຳພັກແຂວງ, ຫົວໜ້າຄະນະໂຄສະນາ-ສຶກສາແຂວງກວາງຈິ ແຫ່ງ ສສ ຫວຽດນາມ.

 

ພາບ ແລະ ຂ່າວ: ດີລຳພົນ ພົມະຈັນ