ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ເພື່ອເປັນການເສີມຂະຫຍາຍພາລະບົດບາດ ສິດ ແລະ ໜ້າທີ່ຂອງອົງການນິຕິ ບັນຍັດ ໃນການຕິດຕາມກວດກາວຽກງານຕ່າງໆ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ, ໃນລະຫວ່າງວັນທີ 7-8 ເມສາ 2022 ນີ້ ທ່ານ ຄໍາຈັນ ໂສຕາປະເສີດ ຄະນະປະຈໍາ, ປະທານກໍາມາທິການບັນດາເຜົ່າ ສະພາແຫ່ງຊາດ ພ້ອມດ້ວຍຄະນະ ສົມທົບກັບ ສະພາປະຊາຊົນແຂວງວຽງຈັນ ໄດ້ລົງເຄື່ອນໄຫວຕິດຕາມກວດກາຜົນກະທົບຈາກ ການກໍ່ສ້າງເສັ້ນທາງລົດ ໄຟລາວ-ຈີນ ຢູ່ 3 ຈຸດຄື: ສະຖານນີ ເມືອງກາສີ, ເມືອງວັງວຽງ , ເມືອງໂພນໂຮງ ແລະ ບາງຈຸດຕາມຄໍາສະເໜີຂອງປະຊາຊົນ ໂດຍການເຂົ້າຮ່ວມຕິດຕາມ ຂອງທ່ານ ລໍາໄມ ກູດລາວົງ ຄະນະປະຈໍາ, ຮອງປະທານສະພາປະ ຊາຊົນແຂວງ ທັງເປັນປະທານຄະນະກໍາມະການເສດຖະກິດ, ແຜນການ ແລະ ການເງີນ ພ້ອມດ້ວຍຄະນະ, ນອກນັ້ນກໍຍັງມີຄະນະຮັບຜິດຊອບໄກ່ເກ່ຍສິ່ງກີດຂວາງ ທາງລົດໄຟລາວ-ຈີນ ຂັ້ນແຂວງ, ຂັ້ນເມືອງ , ຕາງໜ້າພະແນກການຂັ້ນແຂວງ, ອົງການປົກຄອງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.

ການລົງຕິດຕາມກວດກາຄັ້ງນີ້ ໄດ້ຮັບຟັງການລາຍງານການຈັດຕັ້ງປະຕິບັດວຽກງານການແກ້ໄຂ ການຊົດເຊີຍຜົນກະທົບຈາກການກໍ່ສ້າງເສັ້ນທາງລົດໄຟລາວ-ຈີນ ຈາກຄະນະຮັບຜິດຊອບທາງລົດໄຟຂັ້ນເມືອງ ຂອງແຕ່ລະເມືອງ, ພ້ອມທັງລົງກວດກາພື້ນທີ່ຕົວຈິງ ຢູ່ບັນດາຈຸດທີ່ມີຜົນກະທົບຈາກການກໍ່ສ້າງທາງລົດໄຟລາວ-ຈີນ ເປັນຕົ້ນ: ໂຄງການສ້າງແລວສາຍໄຟຟ້າແຮງສູງ 115 KV ທີ່ສະໜອງເຂົ້າທາງລົດໄຟລາວ-ຈີນ ທີ່ບ້ານຫ້ວຍງາມ ເມືອງວັງວຽງ

ນອກນັ້ນ, ທາງຄະນະໄດ້ເດີນທາງມາ ສະພາປະຊາຊົນແຂວງວຽງຈັນ ເພື່ອເຮັດວຽກຮ່ວມກັບ ຄະນະກອງບັນຊາການ ປກສ ແຂວງ ພ້ອມທັງຮັບຟັງບົດລາຍງານກ່ຽວກັບການຈັດຕັ້ງປະຕິບັດ ວາລະແຫ່ງຊາດດ້ວຍການແກ້ໄຂບັນຫາຢາເສບຕິດ ຢູ່ທີ່ຫ້ອງປະຊຸມສະພາປະຊາຊົນແຂວງວຽງຈັນ