ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

     ຕອນເຊົ້າ ວັນທີ 1 ມິຖຸນາ 2022 ຜ່ານມານີ້ ສະພາປະຊາຊົນແຂວງເຊກອງ ໄດ້ຈັດພິທີສະເຫຼີມສະຫຼອງວັນເດັກນ້ອຍສາກົນ ຄົບຮອບ 98 ປີ ແລະ ວັນປູກຕົ້ນໄມ້ແຫ່ງຊາດ ຄົບຮອບ 42 ປີ ພາຍໃຕ້ຄຳຂວັນ “ ສ້າງອະນາຄົດທີ່ດີກວ່າເພື່ອເດັກທຸກຄົນ “ ໂດຍມີທ່ານ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ, ຮອງປະທານສະພາປະຊາຊົນແຂວງ, ມີບັນດາສະມາຊິກພັກ-ພະນັກງານ, ອົງການຈັດຕັ້ງມະຫາຊົນ ພ້ອມດ້ວຍນ້ອງນ້ອຍເຍົາວະຊົນ ແລະ ອະນຸຊົນເຂົ້າຮ່ວມຢ່າງເປັນຂະບວນຟົດຟື້ນ.
    ທ່ານ ນາງ ໄຮມະນີ ວົງໜໍ່ແກ້ວ ປະທານກໍາມະການວັດທະນະທໍາ-ສັງຄົມ ແລະ ບັນດາເຜົ່າ ສພຂ ໄດ້ເລົ່າຄືນປະຫວັດຄວາມເປັນມາຂອງວັນເດັກນ້ອຍສາກົນ ໂດຍຫຍໍ້ວ່າ: ວັນທີ 1 ມິຖຸນາ ແມ່ນວັນທີ່ກໍາເນີດມາຈາກຂະບວນການຕໍ່ສູ້ຢ່າງເນື່ອງນິດລຽນຕິດ ຂອງປະຊາຊົນເອື້ອຍນ້ອງແມ່ຍິງບັນດາເຜົ່າໃນທົ່ວໂລກ ຕ້ານລະບອບກົດຂີ່ຂູດຮີດອັນປ່າເຖື່ອນຂອງຈັກກະພັດນາຍທຶນ ເພື່ອຍາດເອົາສິດເສລີພາບ, ຄວາມເປັນເປັນທໍາມໃຫ້ແມ່ຍິງ ແລະ ເດັກນ້ອຍ ຊຶ່ງໃນເມືອກ່ອນກໍາມະກອນຊາວຜູ້ອອກແຮງງານເອື້ອຍນ້ອງແມ່ຍິງ ແລະ ເດັກນ້ອຍບໍ່ໄດ້ຮັບປະກັນທາງດ້ານສິດທິ, ດ້ານສຸຂະພາບ, ບໍ່ໄດ້ຮັບການສຶກສາ, ຊໍ້າບໍ່ພໍພວກເຂົາຍັງໄດ້ເຂັ່ນຂ້າຮາວີຢ່າງປ່າເຖື່ອນ, ຈົນມາຮອດເດືອນ 1 ປີ 1947 ເອື້ອຍນ້ອງແມ່ຍິງໃນຖັນແຖວກໍາມະກອນໄດ້ສາມັກຄີກັນກັບປະຊາຊົນທັງຊາດມາປະຊຸມກັນ ແລະ ລຸກຮື້ຂຶ້ນ ເພື່ອໂຄ່ນລົ້ມລະບອບເກົ່າ ແລະ ໄດ້ຕົກລົງເອົາວັນທີ 1 ມິຖຸນາຂອງທຸກໆປີ ເປັນວັນເດັກນ້ອຍສາກົນ.
       ການຈັດກິດຈະກຳສະເຫຼີມສະຫຼອງວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດປີນີ້ ແມ່ນເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິ X ຂອງອົງຄະນະພັກແຂວງເຊກອງ ກໍ່ຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ໃນການເພີ່ມເນື້ອທີ່ປ່າ (ເນື້ອທີ່ປົກຫຸ້ມສີຂຽວໃນທົ່ວປະເທດໃຫ້ກວມອັດຕາສູງຂຶ້ນ).          ພ້ອມດຽວກັນນັ້ນ ກໍເປັນການປູກຈິດສຳນຶກໃຫ້ນ້ອງນ້ອຍເຍົາວະຊົນ-ອະນຸຊົນຮຸ່ນສືບທອດ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າໃນການຟື້ນຟູ ແລະ ປົກປັກຮັກສາສະພາບແວດລ້ອມທາງທຳມະຊາດໃຫ້ມີຄວາມຍືນຍົງຂຽວສົດງົດງາມ, ຊຸ່ມຊື່ນ, ອຸດົມສົມບູນ, ທັງເປັນການຊ່ວຍຕ້ານ ແລະ ຫຼຸດຜ່ອນຜົນກະທົບທີ່ເກີດຈາກໄພພິບັດທຳມະຊາດ.

#ໂດຍ:ນັກຂ່າວເຂດທີ 16.