ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

                  ໃນວັນທີ 16 ສິງຫາ 2022 ນີ້, ສະພາປະຊາຊົນແຂວງ ເຊກອງ (ສພຂ) ໄດ້ເປີດກອງປະຊຸມສະໄໝສາມັນເທື່ອທີ 3 ຂອງຕົນຂຶ້ນ ຢູ່ທີ່ສະໂມສອນສະພາປະຊາຊົນແຂວງ ໂດຍການເປັນປະທານກ່າວເປີດຂອງທ່ານ ດົງເພັດ ພະຍົນ ຮອງເລຂາພັກແຂວງ, ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມໂດຍທ່ານ ເຫລັກໄຫລ ສີວິໄລ ເລຂາພັກແຂວງ, ເຈົ້າແຂວງ ເຊກອງ, ມີບັນດາການນຳພັກ-ລັດ ຂັ້ນແຂວງ, ອະດີດການນຳຂອງແຂວງ, ຄະນະສະມາຊິກ ສະພາແຫ່ງຊາດ ປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດ ແລະ ແຂກຖືກເຊີນເຂົ້າຮ່ວມ 100 ກວ່າທ່ານ.
             ທ່ານ ດົງເພັດ ພະຍົນ ປະທານສະພາປະຊາຊົນແຂວງ ໄດ້ກ່າວສູນທອນພົດເປີດກອງປະຊຸມຢ່າງເປັນທາງການວ່າ: ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຈະໄດ້ດຳເນີນໄປຈົນເຖິງວັນທີ 18 ສິງຫາ 2022 ຈິ່ງຈະສໍາເລັດ, ກອງປະຊຸມຈະໄດ້ຮັບຟັງ ແລະ ພິຈາລະນາ, ຮັບຮອງບັນດາເນື້ອໃນທີ່ສໍາຄັນພື້ນຖານຂອງທ້ອງຖິ່ນດັ່ງນີ້: ຮັບຟັງການລາຍງານໂດຍສັງເຂບຂອງ ທ່ານ ເຈົ້າແຂວງ ກ່ຽວກັບສະພາບທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ ແລະ ແຜນງົບປະມານແຫ່ງລັດປະຈໍາ 06 ເດືອນຕົ້ນປີ 2022 ແລະ ແຜນການ 06 ເດືອນທ້າຍປີ 2022; ຮັບຟັງບົດລາຍງານຂອງທ່ານ ຮອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂອງແຂວງ 06 ເດືອນຕົ້ນປີ 2022 ແລະ ແຜນການ 06 ເດືອນທ້າຍປີ 2022; ຮັບຟັງ ການລາຍງານຂອງພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ກ່ຽວກັບການເຊົ່າ-ສໍາປະທານທີ່ດິນ, ການອອກໃບຕາດິນ ແລະ ການເສຍພາສີທີ່ດິນ; ຮັບຟັງ ການລາຍງານຂອງພະແນກສຶກສາທິການ ແລະ ກິລາ ແຂວງ ກ່ຽວກັບການຈັດຕັ້ງປະຕິບັດຄາດໝາຍສູ້ຊົນໃນຂົງເຂດການສຶກສາ, ການປັບປຸງຄຸນນະພາບລະບົບການຮຽນ-ການສອນທຸກຊັ້ນ, ທຸກສາຍ ໃນໄລຍະໃໝ່; ຮັບຟັງ ການລາຍງານຈາກ ທ່ານ ຮອງເຈົ້າແຂວງ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ຮັບຟັງ ການລາຍງານຈາກ ກອງບັນຊາການປ້ອງກັນຄວາມສະຫງົບສຸກ ແຂວງ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານບັນຫາຢາເສບຕິດ; ຮັບຟັງການສະເໜີ ແລະ ພິຈາລະນາ ຮັບຮອງເອົາການສ້າງ ແລະ ປັບປຸງນິຕິກໍາໃຕ້ກົດໝາຍ 01 ສະບັບຄື: ຂໍ້ຕົກລົງວ່າດ້ວຍການກໍານົດເຂດປະເມີນລາຄາທີ່ດິນ ໃນຂອບເຂດ 04 ຕົວເມືອງ ຂອງແຂວງ ເຊກອງ (ສະບັບປັບປຸງ); ຮັບຟັງ ແລະ ພິຈາລາ ແລະ ຮັບຮອງ ເອົາບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບສະພາບການເຄື່ອນໄຫວວຽກງານນັບແຕ່ກອງປະຊຸມສະໄໝສາມັນ ເທື່ອທີ 02 ຮອດກອງປະຊຸມສະໄໝສາມັນ ເທື່ອທີ 03 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 04 ຂອງສະພາປະຊາຊົນແຂວງ ຊຸດທີ II.
              ທ່ານໄດ້ກ່າວຕື່ມອີກວ່າ: ບັນດາເນື້ອໃນທີ່ນໍາມາຄົ້ນຄວ້າ, ພິຈາລະນາ ແລະ ຮັບຮອງໃນຄັ້ງນີ້ ລ້ວນແຕ່ເປັນບັນຫາທີ່ສໍາຄັນ ເຊິ່ງກວມເອົາຫຼາຍວຽກງານ ແຕ່ໄລຍະການດໍາເນີນກອງປະຊຸມແມ່ນມີຂີດຈໍາກັດ. ສະນັ້ນບົນຈິດໃຈເສີມສ້າງຄວາມສາມັກຄີ ດ້ວຍຄວາມຮັບຜິດຊອບສູງ ຂໍຮຽກຮ້ອງມາຍັງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 16 ແຂວງເຊກອງ ແລະ ສະມາຊິກສະພາປະຊາຊົນຂັ້ນແຂວງທຸກສະຫາຍ ຈົ່ງໄດ້ຍົກສູງຄວາມຮັບຜິດຊອບການເມືອງຂອງຕົນເຂົ້າໃນການຄົ້ນຄວ້າ, ພິຈາລະນາ ແລະ ປະກອບຄໍາຄິດເຫັນຢ່າງມີປະຊາທິປະໄຕ, ເລິກເຊິ່ງ, ມີຈຸດສຸມ ແລະ ຮັບປະກັນໄດ້ຄວາມຖືກຕ້ອງສອດຄ່ອງຕາມລະບຽບກົດໝາຍ ເພື່ອເຮັດໃຫ້ເນື້ອໃນທີ່ນໍາມາພິຈາລະນາ ແລະ ຮັບຮອງໃນກອງປະຊຸມຄັ້ງນີ້ມີຄຸນນະພາບ ແລະ ສາມາດນໍາໄປຈັດຕັ້ງປະຕິບັດຢ່າງເປັນຮູບປະທໍາ.
#ໂດຍ: ນາລີວັນ