ໃນວັນທີ 2 ເມສາ  2024 ນີ້. ທ່ານ ແສງອາລຸນ ກຸນລະວົງ ຮອງເລຂາທິການສະພາປະຊາຊົນແຂວງ ພ້ອມຄະນະ ໄດ້ຕາງໜ້າສະພາປະຊາຊົນແຂວງ ນຳເອົາກະຕ່າຂອງຂັວນ ເຂົ້າອວຍພອນ ຄະນະພັກ, ຄະນະນຳ ກອງບັນຊາການ ປ້ອງກັນຄວາມສະຫງົບ ແຂວງອັດຕະປື ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 63 ປີ ( ວັນທີ 5 ເມສາ  1961 – 5 ເມສາ  2024 ). ໂດຍການຕ້ອນຮັບຂອງທ່ານ  ພັອ ປອ ບຸນຊູ ສຸລິນັນທອງ ຮອງກອງບັນຊາການ ປກສ ແຂວງອັດຕະປື ພ້ອມຄະນະ.

ໂອກາດດັ່ງກ່າວ, ທ່ານ ແສງອາລຸນ ກຸນລະວົງ ໄດ້ກ່າວຄຳອວຍພອນໄຊອັນປະເສີດມາຍັງ ທ່ານ  ພັອ ປອ ບຸນຊູ ສຸລິນັນທອງ ພ້ອມດ້ວຍຄະນະພັກ-ຄະນະບັນຊາ ກອງບັນຊາການ ປກສ ແຂວງ, ຕະຫຼອດຮອດ ນາຍ ແລະພົນຕຳຫຼວດ ທົ່ວກຳລັງປ້ອງກັນຄວາມສະຫງົບ ແຂວງອັດຕະປື ຈົ່ງມີສຸຂະພາບແຂງແຮງ ມີພະລານາໄມສົມບູນ ເຮັດສໍາເລັດໜ້າທີ່ການເມືອງຕາມຄາດໝາຍທີ່ວາງໄວ, ພ້ອມນັ້ນ ທ່ານຍັງໄດ້ສະແດງຄວາມຂອບໃຈ  ຄະນະພັກ-ຄະນະນໍາກອງບັນຊາການປ້ອງກັນຄວາມສະຫງົບແຂວງ  ໃນການຊີ້ນຳ-ນຳພາ ຂົງເຂດກຳລັງປ້ອງກັນຄວາມສະຫງົບໃນການພົວພັນ, ປະສານສົມທົບ ກັບ ຫ້ອງວ່າການແຂວງ ແລະ ພາກສ່ວນຕ່າງໆ ໃນການບໍລິການຮັບໃຊ້ການນຳ ແລະ ປະຊາຊົນ ກໍຄື ວຽກງານວິຊາສະເພາະ ຄຽງຄູ່ກັບການປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍ ຢູ່ໃນສັງຄົມ ຢ່າງແຂງແຮງ. ແລະ ການອວຍພອນນີ້ ຍັງເປັນການສະແດງເຖິງຄວາມຮູ້ບຸນຄຸນຕໍ່ກຳລັງປ້ອງກັນຄວາມສະຫງົບປະຊາຊົນ ມູນເຊື້ອແຫ່ງການນຳພາອັນປີຊາສາມາດສະຫຼາດສ່ອງໃສຂອງພັກເຮົາ ໃນພາລະກິດ ການປະຕິວັດປົດປ່ອຍຊາດໃນເມື່ອກ່ອນ ກໍຄື ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃນປັດຈຸບັນ.

ພ້ອມນີ້ ທ່ານ  ພັອ ປອ ບຸນຊູ ສຸລິນັນທອງ ກ່າວສະແດງຄຳຂອບໃຈ ນຳສະພາປະຊາຊົນແຂວງ ທີ່ເຫັນໄດ້ຄວາມໝາຍຄວາມສຳຄັນ ທາງປະຫວັດສາດ ຂອງວຽກງານກຳລັງ ປກສ ທີ່ໄດ້ນຳພາຄະນະມາອວຍພອນໃນວັນສຳຄັນວັນສ້າງຕັ້ງກຳລັງ ປກສ ຄົບຮອບ 63 ປີ ຄັ້ງນີ້ ແລະ ຂໍອ່ວຍພອນໄຊໃຫ້ບັນດາທ່ານພາຍໃນສະພາປະຊາຊົນແຂວງ ຕະຫຼອດຮອດປະຊາຊົນລາວບັນດາເຜົ່າ ຈົ່ງມີແຕ່ຄວາມຜາສຸກໃນຊີວິດສ່ວນຕົວ ແລະ ຄອບຄົວ ພ້ອມກັນປະກອບສ່ວນຈັດຕັ້ງປະຕິບັດໜ້າທີ່ວຽກງານໃນການປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືແຂວງອັດຕະປື ໃຫ້ມີຜົນສໍາເລັດເປັນກ້າວໆ.

(ວິນັດ ສີສຸລາດ)