ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ບັນດາສະມາຊິກສະພາປະຊາຊົນແຂວງອັດຕະປື ໄດ້ສຸມໃສ່ປະກອບຄໍາເຫັນຕໍ່ບົດລາຍງານຂອງອົງການປົກຄອງແຂວງ ກ່ຽວກັບຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ,ໃນວາລະຂອງການດໍາເນີນກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ແຂວງ ຊຸດທີ II ເມື່ອວັນທີ 16 ສິງຫາ 2022,ໂດຍສະມາຊິກສະພາປະຊາຊົນ ໄດ້ສະເໜີໃຫ້ອົງການປົກຄອງແຂວງ ກໍ່ຄືອົງການໄອຍະການປະຊາຊົນແຂວງ,ສືບຕໍ່ເອົາໃຈໃສ່ຢ່າງເຂັ້ມງວດໃນການສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍການສຸມໃສ່ 3 ຫຼັກການຕົ້ນຕໍ່ຄື: ຄວາມເດັດຂາດ,ຄວາມໂປ່ງໃສ ແລະ ຄວາມເປັນມືອາຊີບ.
ທ່ານ ສຸກສໍາລານ ໄຊຍະແສງ ຮອງປະທານສະພາປະຊາຊົນແຂວງ ໄດ້ຕາງໜ້າໃຫ້ຄະນະປະຈໍາສະພາປະຊາຊົນແຂວງ ປະກອບຄໍາເຫັນໃສ່ບົດລາຍງານດັ່ງກ່າວ ໂດຍໄດ້ສະເໜີໃຫ້ອົງການປົກຄອງແຂວງ ແລະ ອົງການໄອຍະການປະຊາຊົນແຂວງ ເພີ່ມທະວີການຍົກສູງຄວາມສາມາດ ໃນການນໍາພາ-ຊີ້ນໍາການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃຫ້ກາຍເປັນຄວາມຮັບຜິດຊອບໂດຍກົງ ຂອງຄະນະພັກ,ຄະນະນໍາແຕ່ລະຂັ້ນ ໂດຍຈະຕ້ອງສຸມໃສ່ 3 ຫຼັກການຕົ້ນຕໍຄືຄວາມເດັດຂາດ,ຄວາມໂປ່ງໃສ,ຄວາມເປັນມືອາຊີບ ແລະ ການຕິດຕາມກວດກາ ການນໍາໃຊ້ 7 ມາດຕະການສະກັດກັ້ນ ຂອງອົງການສືບສວນ-ສອບສວນ ຕາມມາດຕາ 136 ຂອງກົດໝາຍ ວ່າດ້ວຍການດໍາເນີນຄະດີອາຍາ ເພື່ອຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນສູງກວ່າເກົ່າ,ສືບຕໍ່ສ້າງຄວາມຮັບຮູ້ໃຫ້ສັງຄົມ ດ້ວຍການສຶກສາອົບຮົມ,ໂຄສະນາເຜີຍແຜ່ລະບຽບກົດໝາຍ,ຜົນຮ້າຍ ແລະ ຄວາມອັນຕະລາຍຂອງຢາເສບຕິດ ແລະ ຖືເອົາການແກ້ໄຂບັນຫາຢາເສບຕິດ ເປັນມາດຕະຖານເງື່ອນໄຂໜຶ່ງ ເຂົ້າໃນຂະບວນການແຂ່ງຂັນຮັກຊາດ ແລະ ພັດທະນາ,ສ້າງບ້ານປອດຢາເສບຕິດ,ສ້າງໜ່ວຍພັກປອດໃສ,ເຂັ້ມແຂງ ແລະ ໜັກແໜ້ນ ຢູ່ບັນດາບ້ານ,ສໍານັກງານ,ອົງການ,ສະຖາບັນການສຶກສາ,ໂຮງໝໍ,ໂຮງຈັກ-ໂຮງງານ ແລະ ບັນດາຫົວໜ່ວຍການຜະລິດ-ທຸລະກິດ ເພື່ອສ້າງໃຫ້ຄົນມີສະຕິລະວັງຕົວ,ມີລະບຽບວິໄນ,ມີຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍສັງຄົມ,ສືບຕໍ່ປັບປຸງກົນໄກ,ລະບຽບການທີ່ກົດໜ່ວງຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍສະເພາະແມ່ນການກໍານົດມາດຕະຖານໂທດ,ການແກ້ໄຂຂອງກາງ ຫຼື ວັດຖຸ,ຊັບສິນ ທີ່ໄດ້ມາຈາກການກະທໍາຜິດຢາເສບຕິດ,ບໍ່ປະໃຫ້ເປັນຊ່ອງວ່າງ ເພື່ອສວຍໃຊ້ໃນການຕໍ່ລອງ,ແກ້ໄຂຄວາມຊັກຊ້າໃນການກວດສອບ,ກວດກາ,ວິໃຈ ປະລິມານສານເສບຕິດ ເພື່ອຮັບປະກັນໃຫ້ແກ່ການແກ້ໄຂຄະດີຢາເສບຕິດ ມີຄວາມວ່ອງໄວ,ມີຄຸນນະພາບ,ມີຄວາມເດັດຂາດ,ໂປ່ງໃສ ແລະ ເປັນມືອາຊີບ ໃຫ້ມີປະສິດທິຜົນສູງກວ່າເກົ່າ,ເອົາໃຈໃສ່ຕໍ່ການບໍາບັດ-ປິ່ນປົວຜູ້ຕິດຢາເສບຕິດ ດ້ວຍການສົມທົບລະຫວ່າງການບໍາບັດ, ປິ່ນປົວ,ຟື້ນຟູສຸຂະພາບ ຂອງຜູ້ຕິດຢາເສບຕິດ ກັບການດັດສ້າງ ແລະ ຝຶກສີມື,ຝຶກອາຊີບໃຫ້ເຂົາເຈົ້າ ຊຶ່ງໃນປະຈຸບັນ ກໍຄືໃນຊຸມປີຕໍ່ໜ້າ ເຫັນວ່າຍັງມີຄວາມຈໍາເປັນ ຕ້ອງໄດ້ປັບປຸງສູນບໍາບັດ-ປິ່ນປົວ ແລະ ຝຶກວິຊາຊີບ,ເພື່ອຮັບໃຊ້ໃຫ້ແກ່ວຽກງານດັ່ງກ່າວ,ຄົ້ນຄວ້າປະກອບພາຫະນະ,ອຸປະກອນຮັບໃຊ້ທີ່ຈໍາເປັນ ແລະ ບຸກຄາລາກອນແພດໝໍ ກໍຄືວິຊາການດ້ານຕ່າງໆ ໃຫ້ມີຄວາມຮັບປະກັນຢ່າງເໝາະສົມ. ສ່ວນຄາດໝາຍຕໍ່ໄປແມ່ນຕ້ອງໄດ້ພະຍາຍາມເຮັດໃຫ້ຜູ້ຕິດຢາເສບຕິດຫຼຸດລົງເປັນກ້າວໆ ຊຶ່ງນັ້ນແມ່ນຕົວຊີ້ວັດໜຶ່ງ ທີ່ຊີ້ໃຫ້ເຫັນປະສິດທິຜົນໃນການແກ້ໄຂບັນຫາຢາເສບຕິດ ຢູ່ແຂວງເຮົາ,ເອົາໃຈໃສ່ແກ້ໄຂປະກົດການຫຍໍ້ທໍ້ ແລະ ຄວາມບໍ່ໂປ່ງໃສ ໃນການເຄື່ອນໄຫວປະຕິບັດໜ້າທີ່ ຂອງເຈົ້າໜ້າທີ່ກ່ຽວຂ້ອງ ຢ່າງເດັດຂາດ ແລະ ທັນການ,ຕ້ອງກໍານົດລະບອບລະບຽບການ,ກົນໄກ ແລະ ການຈັດຕັ້ງທີ່ເຂັ້ມແຂງ ກ່ຽວກັບບັນຫາທີ່ພົວພັນເຖິງການແຈ້ງຂໍ້ມູນຂອງກາງ,ຊັບສິນ,ການອາຍັດຊັບ,ການຢຶດຊັບ,ການຮິບວັດຖຸ ຈາກຜູ້ກະທໍາຜິດຢາເສບຕິດ ທີ່ອາດເປັນຊ່ອງວ່າງພາໃຫ້ເກີດປະກົດການຫຍໍ້ທໍ້,ພ້ອມທັງເອົາໃຈໃສ່ ການແກ້ໄຂກໍລະນີຕ່າງໆ ທີ່ບໍ່ຖືກຕ້ອງຕາມກົດໝາຍ ແລະ ຫຼັກສິນທໍາ ໃນການດໍາເນີນຄະດີຢາເສບຕິດ,ສືບຕໍ່ເພີ່ມທະວີຮ່ວມມືກັບສາກົນ,ກ່ຽວກັບຂະບວນການຜະລິດ,ຂົນສົ່ງ,ຄ້າຂາຍຢາເສບຕິດ ແລະ ກັບບັນດາແຂວງ,ປະເທດໃກ້ຄຽງໃນອະນຸພາກພື້ນໃຫ້ແໜ້ນແຟ້ນ,ເປັນລະບົບ,ຮັດກຸມ ເພື່ອສະກັດກັ້ນ ແລະປາບປາມຂະບວນການດັ່ງກ່າວໃຫ້ແຂງແຮງ,ມີຈຸດສຸມ ແລະມີປະສິດທິຜົນສູງ.

(ວິນັດ)