ຕອນແລງ ວັນທີ 19 ມັງກອນ 2024 ນີ້, ສະພາປະຊາຊົນ ແຂວງຫົວພັນ ໄດ້ຈັດກອງປະຊຸມສະຫຼຸບ ຖອດຖອນບົດຮຽນ ການກະກຽມ ແລະ ດໍາເນີນ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ໂດຍການເປັນປະທານຂອງ ທ່ານ ຄອນປະພັນ ເລືອງສີຈັນທອງ ຮອງປະທານ ສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານຄະນະກໍາມະການ, ຄະນະເລຂາທິການ ຕະຫລອດຮອດ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ.

          ໃນກອງປະຊຸມ, ໄດ້ຮັບຟັງ ຮ່າງບົດສະຫຼຸບ ຖອດຖອນບົດຮຽນ ການກະກຽມ ແລະ ດໍາເນີນ ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II ຈາກທ່ານ ສຸກມີໄຊ ສິງບຸນເຮືອງ ຮອງເລຂາທິການສະພາປະຊາຊົນແຂວງ ເຊິ່ງຍົກໃຫ້ເຫັນດ້ານດີ, ດ້ານອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ເປັນຕົ້ນແມ່ນ ການກະກຽມດ້ານເນື້ອໃນ, ດ້ານບໍລິການຮັບໃຊ້ ໃນໄລຍະດຳເນີນກອງປະຊຸມ ທີ່ໄຂຂຶ້ນໃນລະຫວ່າງ ວັນທີ 2-4 ມັງກອນ 2024 ເປັນເວລາ 3 ວັນເຕັມ ຜ່ານມານີ້. ຫຼັງຈາກນັ້ນ, ປະທານກອງປະຊຸມໄດ້ມີຄໍາເຫັນເຈາະຈີ້ມບາງບັນຫາ ຕໍ່ມາ ບັນດາທ່ານຜູ້ເຂົ້າຮ່ວມກອງປະຊຸມ ກໍ່ໄດ້ປະກອບຄໍາຄິດຄໍາເຫັນ ຕໍ່ ຮ່າງບົດສະຫຼຸບດັ່ງກ່າວ ຢ່າງກົງໄປກົງມາ, ມີການແລກປ່ຽນບົດຮຽນ ແລະ ມີຂໍ້ສະເໜີຈໍານວນໜຶ່ງ ເພື່ອເປັນບ່ອນອີງນຳໄປຈັດຕັ້ງປະຕິບັດໃນການປັບປຸງແກ້ໄຂ, ເພື່ອເປັນບົດຮຽນ ແລະ ສ້າງຄວາມເຂັ້ມແຂງ ແນໃສ່ເຮັດໃຫ້ການກະກຽມ ແລະ ດໍາເນີນກອງປະຊຸມ ໃນຄັ້ງຕໍ່ໄປ ມີປະສິດຕິພາບ ແລະ ປະສິດທິຜົນສູງ.

              ຕອນທ້າຍ ປະທານກອງປະຊຸມ ໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ພະນັກງານ-ລັດຖະກອນ ພາຍໃນສະພາປະຊາຊົນແຂວງ ທີ່ໄດ້ເອົາໃຈໃສ່ເຮັດໜ້າທີ່ຂອງຕົນ ຕາມການມອບໝາຍ ເຂົ້າໃນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ແຂວງຫົວພັນ ຊຸດທີ II ມີຜົນສຳເລັດອັນຈົບງາມ; ພ້ອມທັງຮຽກຮ້ອງໃຫ້ພະນັກງານ-ລັດຖະກອນທັງໝົດ ສືບຕໍ່ຜັນຂະຫຍາຍດ້ານດີຜົນງານ, ພະຍາຍາມປັບປຸງແກ້ໄຂບັນຫາ ທີ່ຍັງຄົງຄ້າງ ເປັນຕົ້ນ: ເພີ່ມທະວີຄວາມເປັນເຈົ້າການໃນການກະກຽມເນື້ອໃນກອງປະຊຸມໃຫ້ທັນກຳນົດເວລາ, ກົນໄກການປະສານງານນຳອົງການປົກຄອງແຂວງ, ຂະແໜງການທີ່ກ່ຽວຂ້ອງໃຫ້ມີຄວາມຄ່ອງຕົວ ແລະ ອື່ນໆ ເພື່ອເປັນບົດຮຽນໃຫ້ແກ່ການດຳເນີນກອງປະຊຸມຄັ້ງຕໍ່ໄປ ໃຫ້ຮັບປະກັນທາງດ້ານເນື້ອໃນ, ມີຄຸນນະພາບດີຂື້ນກວ່າເກົ່າ.

ພາບ ແລະ ຂ່າວໂດຍ ນັກຂ່າວ ສພຂ.