ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນບ່າຍ ຂອງວັນທີ 21 ກໍລະກົດ 2022 ທີ່ສະພາປະຊາຊົນ ແຂວງຫົວພັນ, ທ່ານ ຄຳຟອງ ກົ້ວມີໄຊ ກຳມະການຄະນະປະຈຳ, ເລຂາທິການ ສະພາປະຊາຊົນແຂວງ ໄດ້ຖະແຫລງຂ່າວ ກ່ຽວກັບການດຳເນີນກອງປະຊຸມສະ  ໄໝສາມັນ ເທື່ອທີ 3 ຂອງສະພາປະຊາຊົນແຂວງຫົວພັນຊຸດທີ II ວ່າ: ໂດຍປະຕິບັດຕາມມາດຕາ 60 ຂອງກົດໝາຍວ່າດ້ວຍ ສະພາປະຊາຊົນຂັ້ນແຂວງ ສະບັບປັບປຸງ ປີ2020ປະຕິບັດມະຕິຂອງຄະນະປະຈຳສະພາປະຊາຊົນ ແຂວງຫົວພັນ ສະບັບເລກທີ 299/ຄປຈຂ, ລົງວັນທີ3ມິຖຸນາ2022ແລະ ແຜນການກະກຽມ, ດຳເນີນກອງປະຊຸມສະໄໝສາມັນ ເທື່ອທີ 3ຂອງສະພາປະຊາຊົນແຂວງຫົວພັນຊຸດທີII,ສະພາປະຊາຊົນແຂວງຫົວພັນໄດ້ປະສານສົມທົບກັບອົງການປົກຄອງແຂວງ, ອົງການໄອຍະການປະຊາຊົນແຂວງ,ສານປະຊາຊົນແຂວງ,ແລະ ພະແນກການກ່ຽວຂ້ອງ ໃນການກະກຽມບັນດາເນື້ອໃນທີ່ກ່ຽວຂ້ອງກັບແຕ່ລະພາກສ່ວນ ເພື່ອຈະລາຍງານ ຕໍ່ກອງປະຊຸມສະໄໝສາມັນ ເທື່ອທີ 3ຂອງສະພາປະຊາຊົນ ແຂວງຫົວພັນ.

ຂ້າພະເຈົ້າຕາງໜ້າຄະນະປະຈຳສະພາປະຊາຊົນແຂວງຫົວພັນ ຖືເປັນກຽດຢ່າງສູງແຈ້ງມາຍັງບັນດາທ່ານການນຳຂອງແຂວງ, ການນໍາບັນດາເມືອງ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ນັກທຸລະກິດ, ພໍ່ຄ້າຊາວຂາຍ, ສື່ມວນຊົນຕ່າງໆ ແລະ ປະຊາຊົນບັນດາເຜົ່າທົ່ວແຂວງຫົວພັນ ໄດ້ຮັບຊາບກ່ຽວກັບການດຳເນີນກອງປະຊຸມສະໄໝສາມັນ ເທື່ອທີ 3ຂອງສະພາປະຊາຊົນ ແຂວງຫົວພັນ ຊຸດທີ IIຈະໄດ້ໄຂຂຶ້ນໃນລະຫວ່າງວັນທີ27-29 ກໍລະກົດ2022ທີ່ຫ້ອງປະຊຸມສະພາປະຊາຊົນແຂວງຫົວພັນ, ກອງປະຊຸມຈະໄດ້ດຳເນີນເປັນເວລາ3ວັນ.

           ກອງປະຊຸມສໄໝສາມັນ ເທື່ອທີ 3ຂອງສະພາປະຊາຊົນ ແຂວງຫົວພັນ ຈະໄດ້ຮັບຟັງການລາຍງານ, ພິຈາລະນາ ແລະ ຮັບຮອງເອົາບັນຫາສຳຄັນຟື້ນຖານຂອງແຂວງດັ່ງນີ້:

  1. ບົດລາຍງານໂດຍສັງເຂບຂອງທ່ານເຈົ້າແຂວງ ກ່ຽວກັບວຽກງານທີ່ພົ້ນເດັ່ນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022;
  2. ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ6 ເດືອນຕົ້ນປີ 2022 ແລະ ທິດທາງແຜນການ 6 ເດືອນທ້າຍປີ 2022;
  3. ບົດລາຍງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ;
  4. ບົດລາຍງານ ກ່ຽວກັບການຄຸ້ມຄອງການສຳຫຼວດ, ຂຸດຄົ້ນ ແລະ ການຂົນສົ່ງແຮ່ທາດ ຢູ່ແຂວງຫົວພັນ;
  5. ບົດລາຍງານ ກ່ຽວກັບການຈັດຕັ້ງປະຕິບັດການຄຸ້ມຄອງການສົ່ງເສີມ ທຸລະກິດຂະໜາດກາງ, ຂະໜາດນ້ອຍ SMEຢູ່ແຂວງຫົວພັນ;
  6. ບົດລາຍງານການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບການແກ້ໄຂຢາເສບຕິດ ຕາມມະຕິສະບັບເລກທີ 04/ສພຊ ແລະ ການຕິດຕາມການນໍາໃຊ້7 ມາດຕະການສະກັດກັ້ນ ຂອງອົງການສືບສ່ວນສອບສວ່ນ ຂອງອົງການໄອຍະການປະຊາຊົນ ແຂວງຫົວພັນ;
  7. ບົດລາຍງານກ່ຽວກັບການຈັດຕັ້ງປະຕິບັດແຜນການສ້າງຜູ້ພິພາກສາ ດີ – ເກັ່ງ ຂອງສານປະຊາຊົນແຂວງຫົວພັນ;
  8. ບົດລາຍງານການເຄື່ອນໄຫວວຽກງານ 6 ເດືອນຕົ້ມປີ ແລະ ທິດທາງແຜນການ6ເດືອນທ້າຍ ປີ 2022 ຂອງສະພາປະຊາຊົນ ແຂວງຫົວພັນ;
  9. ຮ່າງຂໍ້ຕົກລົງ ຂອງເຈົ້າແຂວງ ວ່າດ້ວຍການປະເມີນລາຄາທ່ີດິນ ຢູ່ແຂວງຫົວພັນ;
  10. ຮ່າງຂໍ້ຕົກລົງ ຂອງເຈົ້າແຂວງ ວ່າດ້ວຍນະໂຍບາຍສົ່ງເສີມການລົງທຶນກິດຈະກໍາການປູກ-ການລ້ຽງ ເປັນສິນຄ້າ ຢູ່ແຂວງຫົວພັນ

ເພື່ອຄວາມສະດວກໃຫ້ກັບພໍ່ແມ່ປະຊາຊົນບັນດາເຜົ່າ ທີ່ຢາກປະກອບຄຳຄິດເຫັນ ແລະ ຢາກສະເໜີບັນຫາຕ່າງໆ ເຂົ້າມາຍັງສະພາປະຊາຊົນແຂວງ ໃນໄລຍະທີ່ດຳເນີນກອງປະຊຸມສະໄໝສາມັນ ເທື່ອທີ 3ຄັ້ງນີ້,ຄະນະເລຂາທິການສະພາປະຊາຊົນແຂວງ ໄດ້ຕັ້ງໜ່ວຍງານຮັບຜິດຊອບສາຍດ່ວນ ເພື່ອຮັບເອົາຄຳຄິດເຫັນ, ຄໍາສະເໜີຂອງພໍ່ແມ່ປະຊາຊົນບັນດາເຜົ່າ ທ່ານສາມາດສົ່ງຄຳຄິດເຫັນ ແລະ ຄຳສະເໜີ ຂອງທ່ານມາຍັງກອງປະຊຸມໄດ້ຕາມວິທີລຸ່ມນີ້:

  • ໂທລະສັບສາຍດ່ວນບໍ່ໄດ້ເສຍຄ່າ ໝາຍເລກ 064 156
  • Facebookແຟນເພສ ( ສະພາປະຊາຊົນ ແຂວງຫົວພັນ )
  • ສົ່ງອີເມວ:sapha8@hotmail.com
  • ແຟັກ:064 312 878

ອີກເທື່ອໜຶ່ງ, ໃນນາມຕາງໜ້າ ຄະນະປະຈຳສະພາປະຊາຊົນ ແຂວງຫົວພັນ ຂ້າພະເຈົ້າຂໍເຊີນຊວນບັນດາທ່ານການນຳຂອງແຂວງ, ການນໍາບັນດາເມືອງ, ພະນັກງານ-ລັດຖະກອນ, ທະຫານ, ຕຳຫຼວດ, ນັກຮຽນ, ນັກສຶກສາ, ນັກທຸລະກິດ, ພໍ່ຄ້າຊາວຂາຍ, ກຳມະກອນຊາວຜູ້ອອກແຮງງານ, ສື່ມວນຊົນຕ່າງໆ ແລະ ປະຊາຊົນບັນດາເຜົ່າ ໃນທົ່ວແຂວງຫົວພັນ ຈົ່ງໄດ້ຕິດຕາມວາລະດຳເນີນກອງປະຊຸມສະໄໝສາມັນ ເທື່ອທີ 3ຂອງສະພາປະຊາຊົນແຂວງໃນວາລະດຳເນີນກອງປະຊຸມຄັ້ງນີ້ຈະມີການລາຍງານຂ່າວ ຜ່ານທາງວິທະຍຸ, ໂທລະພາບ, ໂທລະໂຄງ, ໜັງສືພິມ ສືອອນລາຍ (Facebook) ເພື່ອອຳນວຍຄວາມສະດວກໃຫ້ບັນດາທ່ານໄດ້ຕິດຕາມຮັບຟັງ, ຮັບຊົມ ພ້ອມກັນນີ້ຂໍຮຽກຮ້ອງມາຍັງທຸກພາກສ່ວນຈົ່ງໃຫ້ການສະໜັບສະໜູນ ແລະ ໃຫ້ຄວາມຮ່ວມມືໃນທຸກດ້ານ ເພື່ອເຮັດໃຫ້ກອງປະຊຸມສະໄໝສາມັນ ເທື່ອທີ 3ດຳເນີນໄປດ້ວຍຜົນສຳເລັດຢ່າງຈົບງາມ.