ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           ປະຕິບັດຕາມມະຕິ ຂອງຄະນະປະຈຳ ສະພາປະຊາຊົນແຂວງ ວ່າດ້ວຍການຮັບຮອງເອົາການແຕ່ງຕັ້ງ ກຳມະການຄະນະປະຈຳ ປະທານຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ ສະພາປະຊາຊົນ ແຂວງຫົວພັນ ສະບັບເລກທີ 405/ຄປຈຂ. ຫພ, ລົງວັນທີ 10 ສິງຫາ 2022.
ວັນທີ12 ສິງຫາ 2022 ຜ່ານມານີ້ ສະພາປະຊາຊົນແຂວງຫົວພັນ ໄດ້ຈັດພິທີມອບ – ຮັບໜ້າທີ່ປະທານຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ ລະຫວ່າງທ່ານ ພັທ ທອງພັນ ພັດທະວົງ ປະທານຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ (ຜູ້ເກົ່າ) ໄປຮັບໜ້າທີ່ໃໝ່ຢູ່ກອງບັນຊາການທະຫານ ແຂວງຫົວພັນ ແລະ ທ່ານ ປອ ສົມສັກ ຈັນມາລີ ຮອງປະທານຄະນະກຳມະການເສດຖະກິດ ແຜນການ ແລະ ການເງິນ ຂຶ້ນນເປັນ ປະທານຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບສະພາປະຊາຊົນ ແຂວງຫົວພັນ (ຜູ້ໃໝ່).ໂດຍໃຫ້ກຽດເຂົ້າຮ່ວມຂອງທ່ານ ນາງ ອຳໄພວອນ ລ້ອມບຸນແພງກຳມະການສຳຮອງສູນກາງ, ຮອງເລຂາພັກແຂວງ, ປະທານສະພາປະຊາຊົນແຂວງ, ມີຮອງປະທານ, ຄະນະປະຈຳ, ຄະນະກຳມະການ, ຄະນະເລຂາທິການສະພາປະຊາຊົນແຂວງ, ສະມາຊິກສະພາປະຊາຊົນແຂວງ ທີ່ປະຈຳການ ຢູ່ເທດສະບານເມືອງຊຳເໜືອ ແລະ ຜູ້ຕາງໜ້າ ຈາກພາກສ່ວນທີ່ກ່ຽວຂ້ອງ ຕະຫລອດຮອດພະນັກງານ – ລັດຖະກອນພາຍໃນສະພາເຂົ້າຮ່ວມ.
               ໃນພິທີ ທ່ານ ພັທ ທອງພັນ ພັດທະວົງ ໄດ້ລາຍງານກ່ຽວກັບສະພາບການເຄື່ອນໄຫວ ການຈັດຕັ້ງປະຕິບັດໜ້າທີ່ວຽກງານທີ່ຕົນຮັບຜິດຊອບຢູ່ສະພາປະຊາຊົນແຂວງຕະຫລອດໄລຍະຜ່ານມາ ແລະ ໜ້າວຽກທີ່ຈະຕ້ອງໄດ້ສືບຕໍ່ແກ້ໄຂໃນຕໍ່ໜ້າ; ໂອກາດເຂົ້າຮ່ວມພິທີອັນມີຄວາມໝາຍຄວາມສຳຄັນນີ້ ທ່ານ ນາງ ອຳໄພວອນ ລ້ອມບຸນແພງ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສຳເລັດທີ່ປະທານຄະນະກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ ຜູ້ເກົ່າຍາດມາໄດ້ໃນໄລຍະທີ່ຜ່ານມາ ພ້ອມດຽວກັນນີ້ທ່ານຍັງໄດ້ມີຄໍາເຫັນເນັ້ນໜັກ ຊີ້ນຳ ໃຫ້ປະທານກຳມະການຍຸຕິທຳ ແລະ ປ້ອງກັນຊາດ – ປ້ອງກັນຄວາມສະຫງົບ ຜູ້ເກົ່າ ແລະ ຜູ້ໃຫມ່ ເອົາໃຈໃສ່ ແລະ ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງ ຂອງຕົນ ໃນການນໍາພາ-ຊີ້ນຳແລະ ການເປັນເສນາທິການໃຫ້ແກ່ ກົມກອງຂອງຕົນສັງກັດ ແລະ ສະພາປະຊາຊົນແຂວງ ໃນການປະຕິບັດໜ້າທີ່ຕາມສິດ, ພາລະບົດບາດຂອງຕົນ ໃຫ້ມີຜົນສຳເລັດຕາມການຈັດຕັ້ງຂັ້ນເທິງມອບໝາຍ.
ຂ່າວ: ສພຂ