ໃນລະຫວ່າງວັນທີ 21-24 ມີນາ 2022 ນີ້ ທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ, ຮອງປະທານສະພາປະຊາຊົນແຂວງຫລວງນໍ້າທາ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ແລະ ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນໍ້າທາ ປະທານຄະນະກຳມະການວັດທະນະທຳ-ສັງຄົມ ແລະບັນດາເຜົ່າ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ພ້ອມດ້ວຍຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ໄດ້ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງສິງ ແຂວງຫລວງນໍ້າທາ , ໃຫ້ກຽດເຂົ້າຮ່ວມຮັບຟັງມີເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານ-ລັດຖະກອນ, ຄະນະພັກຮາກຖານ, ອຳນາດການປົກຄອງບ້ານ ແລະ ປະຊາຊົນ, ເຊິ່ງໄດ້ລົງເຜີຍແຜ່ ແລະ ພົບປະປະຊາຊົນຜູ້ມີສິດປ່ອນບັດເລືອກຕັ້ງທັງໝົດ 10 ຈຸດຄື ສະໂມສອນເມືອງ, ກຸ່ມບ້ານກົກມ່ວງ, ກຸ່ມບ້ານທົ່ງໃໝ່, ກຸ່ມບ້ານນ້ຳແກ້ວຫລວງ, ກຸ່ມບ້ານພູດອນທັນ, ກຸ່ມບ້ານມອມ, ກຸ່ມບ້ານນາຄຳ, ກຸ່ມບ້ານຈຽງອິນ, ກຸ່ມບ້ານຂວາງ ແລະ ກຸ່ມບ້ານຊຽງແຂງ, ລວມທັງໝົດ 66 ບ້ານ, ມີຜູ້ເຂົ້າຮ່ວມຮັບຟັງທັງໝົດ 628 ຄົນ, ຍິງ 300 ຄົນ.

ໃນໂອກາດດັ່ງກ່າວ ທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ, ຮອງປະທານສະພາປະຊາຊົນແຂວງຫລວງນໍ້າທາ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ໄດ້ເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ IX, ຊຶ່ງກອງປະຊຸມໄດ້ພິຈາລະນາຮັບຮອງເອົາ 11 ບັນຫາໃຫຍ່

ພ້ອມນັ້ນ ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນໍ້າທາ ປະທານຄະນະກຳມະການວັດທະນະທຳ-ສັງຄົມ ແລະບັນດາເຜົ່າ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ໄດ້ເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງ ຊຸດທີ II ກອງປະຊຸມໄດ້ພິຈາລະນາຮັບຮອງເອົາ 6 ບັນຫາສໍາຄັນຂອງແຂວງ ຮັບຮອງເອົາ ຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນສັງຄົມສົງເຄາະ ເຊີ່ງປະກອບມີທັງໝົດ 9 ໝວດ 40 ມາດຕາ;

ພ້ອມນັ້ນ ນີ້ ທ່ານ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ, ຮອງປະທານສະພາປະຊາຊົນແຂວງຫລວງນໍ້າທາ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ແລະ ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫລວງນໍ້າທາ ປະທານຄະນະກຳມະການວັດທະນະທຳ-ສັງຄົມ ແລະບັນດາເຜົ່າ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ພ້ອມດ້ວຍຄະນະສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງສິງ ໄດ້ໂອ້ລົມ ຮຽກຮ້ອງໃຫ້ຍົກສູງວຽກງານການເມືອງແນວຄິດໃນທຸກຂົງເຂດ, ເອົາໃຈໃສ່ປັບປຸງກົງຈັກການຈັດຕັ້ງ ແລະ ບຸກຄະລາກອນ ຕິດພັນກັບການປັບປຸງແບບແຜນວິທີເຮັດວຽກໃນຂັ້ນຕ່າງໆໃຫ້ມີຄວາມໜັກແໜ້ນເຂັ້ມແຂງ ພ້ອມທັງ ເນັ້ນໜັກໃຫ້ປະຊາຊົນ ຈົ່ງຕັ້ງໜ້າສ້າງເສດຖະກິດຄອບຄົວ ໂດຍອີງໃສ່ທ່າແຮງບົ່ມຊ້ອນຂອງແຕ່ລະຄອບຄົວ, ແຕ່ລະທ້ອງຖິ່ນ ພ້ອມທັງຮຽກຮ້ອງໃຫ້ທຸກພາກສ່ວນຈົ່ງຍົກສູງສະຕິລະວັງຕົວ ເພື່ອກຽມພ້ອມຮັບມືຕໍ່ສະພາບການປ່ຽນແປງໃໝ່ຂອງພາກພື້ນ ແລະ ສາກົນ, ເພີ່ມສະຕິລະວັງຕົວຕໍ່ກົນອຸບາຍມ້າງເພຂອງຄົນບໍຫວັງດີ ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມໃຫ້ຫລຸດລົງ, ເພີ່ມທະວີຄວາມສາມັກຄີ ຄວາມເປັນລະບຽບຮຽບຮ້ອຍຂອງສັງຄົມ.
ໃນໂອກາດດັ່ງກ່າວ ສະພາປະຊາຊົນແຂວງໄດ້ນຳເອົາເຄື່ອງຊ່ວຍເຫລືອ ເຊິ່ງມີ ເຄື່ອງໃຊ້ໃນຄົວເຮືອນ ແລະ ເຄື່ອງກິລາ ມອບໃຫ້ປະຊາຊົນ ແລະ ໂຮງຮຽນແຕ່ລະບ້ານ ລວມມູນຄ່າທັງໝົດ 3,000,000 ກວ່າກີບ

ໂດຍ: ນາງ ອຳພອນ ສີປະເສີດ