ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 10-14  ມີນາ 2022 ນີ້ ທ່ານ ຄຳຟອງ ອິນມານີ ຮອງລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງຫລວງນໍ້າທາ ພ້ອມດ້ວຍຄະນະ ແລະ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງວຽງພູຄາ ໄດ້ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງວຽງພູຄາ ແຂວງຫລວງນໍ້າທາ , ໃຫ້ກຽດເຂົ້າຮ່ວມຮັບຟັງມີເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານ-ລັດຖະກອນ, ຄະນະພັກຮາກຖານ, ອຳນາດການປົກຄອງບ້ານ ແລະ ປະຊາຊົນ, ເຊິ່ງໄດ້ລົງເຜີຍແຜ່ ແລະ ພົບປະປະຊາຊົນຜູ້ມີສິດປ່ອນບັດເລືອກຕັ້ງທັງໝົດ 5 ຈຸດ ຄື ສະໂມສອນເມືອງ, ບ້ານນ້ຳໂລະ, ບ້ານຫ້ວຍຫົກ-ທົ່ງລາດ, ບ້ານທົ່ງນາແປນ, ບ້ານພູໄຊທາ, ລວມທັງໝົດ 12 ບ້ານ,  ມີຜູ້ເຂົ້າຮ່ວມຮັບຟັງທັງໝົດ 361 ຄົນ,  ຍິງ 89 ຄົນ

ໃນໂອກາດດັ່ງກ່າວ ທ່ານ ມີໄຊ ມີວິໄລ ກຳມະການຄະນະປະຈຳສະພາປະຊາຊົນແຂວງ, ເລຂາທິການສະພາປະຊາຊົນແຂວງ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງວຽງພູຄາ ໄດ້ເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນເທື່ອທີ 2  ຂອງສະພາແຫ່ງຊາດ ຊຸດທີ IX, ຊຶ່ງກອງປະຊຸມໄດ້ພິຈາລະນາຮັບຮອງເອົາ 11 ບັນຫາໃຫຍ່ດັ່ງນີ້: ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນ, ຄາດຄະເນໝົດປີ 2021 ແລະ ແຜນການ ປະຈຳປີ 2022; ຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ 10 ເດືອນ ຄາດຄະເນໝົດປີ 2021 ແລະແຜນການ 1 ປີ 2022; ຮັບຮອງເອົາບົດລາຍງານຂອງລັດຖະບານ ກ່ຽວກັບຍຸດທະສາດພັດທະນາພະລັງງານໄຟຟ້າ ຂອງ ສປປ ລາວ (2021-2030); ບັນຫາທີ 4 ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບວິໄສທັດ 20 ປີ (2021-240) ຍຸດທະສາດ 10 ປີ (2021-2030)  ແລະ ແຜນພັດທະນາເສດຖະກິດດີຈິຕອນແຫ່ງຊາດ 5 ປີ (2021-2025) ແລະ ແຜນພັດທະນາເສດຖະກິດດີຈີຕອນ ແຫ່ງຊາດ ໄລຍະ 5 ປີ(2021-2025 ) ; ຮັບຮອງເອົາ ຜົນການກວດສອບບົດສະຫຼຸບຂາດຕົວ ງົບປະມານແຫ່ງລັດ ແລະ ຜົນການກວດສອບ ປະຈຳປີ 2020. ບົດສະຫຼຸບການເຄື່ອນໄຫວວຽກງານປະຈໍາປີ 2011 ແລະ ແຜນການປະ ຈຳປີ 2022 ຂອງອົງການກວດສອບແຫ່ງລັດ; ຮັບຮອງເອົາ ບົດລາຍງານຜົນການກວດກາຕາມຜົນການກວດສອບ ປະຈໍາປີ 2019, ບົດສະຫຼຸບການເຄື່ອນໄຫວວຽກງານປະຈໍາປີ 2021  ແລະ ທິດທາງແຜນການປະຈໍາປີ 2022 ຂອງອົງການກວດກາແຫ່ງລັດ; ຮັບຮອງເອົາບົດລາຍງານຂອງອົງການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2021 ແລະແຜນການ ປະຈໍາປີ 2022; ຮັບຮອງເອົາບົດລາຍງານຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດ ຊົມເຊີຍ ສານປະຊາຊົນສູງສຸດ; ກອງປະຊຸມຍັງໄດ້ຮັບຮອງເອົາແຜນການເຄື່ອນໄຫວວຽກງານຂອງສະພາແຫ່ງຊາດ ປະຈໍາປີ 2022 ຄັ້ງນີ້:ດ້ານນິຕິບັນຍັດ, ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ, ດ້ານການຕິດຕາມກວດກາ, ການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ, ການເຄື່ອນໄຫວວຽກງານຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ການເຄື່ອນໄຫວວຽກງານການຕ່າງປະເທດ

ພ້ອມນັ້ນ ທ່ານ ບຸນຊົງ ວາໄຊຢີ ຮອງເລຂາພັກເມືອງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງວຽງພູຄາ ໄດ້ເຜີຍແຜ່ເນື້ອໃນຜົນສໍາເລັດ ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງ ຊຸດທີ II ກອງປະຊຸມໄດ້ພິຈາລະນາຮັບຮອງເອົາ 6 ບັນຫາສໍາຄັນຂອງແຂວງ ດັ່ງນີ້: ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2021 ແລະ ແຜນການປະຈຳປີ 2022 ຂອງແຂວງ; ກອງປະຊຸມຍັງໄດ້ຮັບຮອງທິດທາງແຜນພັດທະນາເສດຖະກິດ-ສັງຄົມ ປະຈໍາປີ 2022 ຕາມການສະເໜີຂອງອົງການປົກຄອງແຂວງຫຼວງ​ນ້ຳ​ທາ; ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານ ປະຈຳປີ 2021 ແລະ ແຜນການປະຈຳປີ 2022 ກອງປະຊຸມເຫັນ​ດີ​ເປັນ​ເອກະ​ພາບ​ຕໍ່ບົດ​ລາຍ​ງານ​ຂອງ​ອົງການ​ປົກຄອງແຂວງ ທີ່​ໄດ້​ເອົາ​ໃຈ​ໃສ່​ຊີ້ນໍາ​​ໃນການຈັດຕັ້ງປະຕິບັດ​ແຜນ​ງົບປະມານ​ແຫ່ງ​ລັດ ປະຈຳປີ 2021; ຮັບຮອງເອົາ ບົດລາຍງານຂອງອົງການກວດສອບແຂວງກ່ຽວກັບການເຄື່ອນໄຫວວຽກງານປະຈຳປີ 2021 , ແຜນການປະຈຳປີ 2022 ແລະ ຜົນການຕິດຕາມກວດກາຕາມຜົນຂອງການກວດສອບປີ 2019; ບົດລາຍງານຂອງອົງການກວດສອບປະຈຳພາກເໜືອກ່ຽວກັບການເຄື່ອນໄຫວວຽກງານປະຈຳປີ 2021, ແຜນການປະຈຳປີ 2022 ແລະ ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານຂອງແຂວງຫຼວງນໍ້າທາປະຈຳປີ 2020; ຮັບຮອງເອົາ ບົດລາຍງານກ່ຽວກັບການຈັດຕັ້ງປະຕິບັດແຜນກາເຄື່ອນໄຫວວຽກງານ ປະຈໍາປີ 2021 ແລະ ແຜນການປະຈຳປີ 2022 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ; ຮັບຮອງບົດລາຍງານການເຄື່ອນໄຫວວຽກງານ ປະຈຳປີ 2021 ແລະ ແຜນປະຈຳປີ 2022; ຮັບຮອງເອົາ ຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນສັງຄົມສົງເຄາະ ເຊີ່ງປະກອບມີທັງໝົດ 9 ໝວດ 40 ມາດຕາ

ພ້ອມນັ້ນ ທ່ານ ຄຳຟອງ ອິນມານີ ຮອງລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງຫລວງນໍ້າທາ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 3 ແຂວງຫລວງນໍ້າທາ ໄດ້ໂອ້ລົມ ແລະ ເນັ້ນໜັກບັນຫາທີ່ເຫັນວ່າເປັນປາກົດການຫຍໍ້ທໍ້້ໃນສັງຄົມ, ຮຽກຮ້ອງໃຫ້ເປັນເຈົ້າການໃນການຈັດຕິບັດລະບຽບກົດໝາຍໃຫ້ເຂັ້ມງວດ, ພ້ອມກັນສ້າງເສດຖະກິດຄອບຄົວ ເພື່ອເຮັດໃຫ້ຊີວິດການເປັນຢູ່ດີຂຶ້ນເທື່ອລະກ້າວ, ພ້ອມທັງເປີດໂອກາດໃຫ້ຜູ້ເຂົ້າຮ່ວມສະເໜີບັນຫາຕ່າງໆທີ່ຍັງພົບຄວາມຫຍຸ້ງຍາກພາຍໃນເມືອງ, ບ້ານ  ເພື່ອນຳສະເໜີຫາພາກສ່ວນທີ່ກ່ຽວຂ້ອງປຶກສາຫາລືຄົ້ນຄວ້າແກ້ໄຂຕາມຄວາມເໝາະສົມໃຫ້ດີຂຶ້ນກວ່າເກົ່າ.

ໃນໂອກາດດັ່ງກ່າວ ສະພາປະຊາຊົນແຂວງໄດ້ນຳເອົາເຄື່ອງຊ່ວຍເຫລືອ ເຊິ່ງມີ ເຄື່ອງໃຊ້ໃນຄົວເຮືອນ ແລະ ເຄື່ອງກິລາ ມອບໃຫ້ປະຊາຊົນ ແລະ ໂຮງຮຽນແຕ່ລະບ້ານ ລວມມູນຄ່າທັງໝົດ 3,000,000 ກວ່າກີບ

 

ໂດຍ: ນາງ ອຳພອນ ສີປະເສີດ