ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 17-21 ກຸມພາ 2022 ນີ້ ສະພາປະຊາຊົນແຂວງຫລວງນໍ້າທາ ໄດ້ລົງພົບປະຢ້ຽມຢາມພໍ່ແມ່ປະຊາຊົນບັນດາເຜົ່າ ແລະ ເຜີຍແຜ່ເນື້ອໃນຜົນສຳເລັດກອງປະຊຸມສະໄໝສາມັນເທື່ອທີ2 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຢູ່ເມືອງນາແລ ແລະ ເມືອງລອງ ແຂວງຫລວງນໍ້າທາ, ເມືອງນາແລ ນຳໂດຍທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ເມືອງລອງ ນຳໂດຍທ່ານ ຈັນທະສຸລິນ ໝັ້ນປະດິດ  ຄະນະປະຈຳສະພາປະຊາຊົນແຂວງ, ປະທານຄະນະກຳມະການຍຸຕິທຳ ແລະ ປກຊ-ປກສ ພ້ອມດ້ວຍຄະນະ, ເມືອງນາແລລວມທັງໝົດ 8 ຈຸດຄື: ສະໂມສອນເມືອງນາແລ, ບ້ານຕະເຄີງ, ບ້ານຕະລຸຍ, ບ້ານຈອມສີ, ບ້ານເປື່ອນ,ບ້ານນາແລ, ບ້ານສະແກນ, ບ້ານສາຍນ້ຳທິບ ເເລະ ເມືອງລອງ ທັງໝົດ 6 ຈຸດຄື: ສະໂມສອນເມືອງລອງ, ບ້ານສົມປານໃໝ່, ບ້ານສົມປານເກົ່າ, ບ້ານຈ່າຄຳຕັນ, ບ້ານຈ່າຄຳລື, ບ້ານຜາງົວ, ໂດຍມີຮອງເລຂາພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ຄະນະພັກຮາກຖານ, ອຳນາດການປົກຄອງບ້ານ, ພ້ອມດ້ວຍພໍ່ແມ່ປະຊາຊົນບັນດາເຜົ່າພາຍໃນບ້ານເຂົ້າຮ່ວມຢ່າງພ້ອມພຽງ.

ເພື່ອເປັນຕົວແທນແຫ່ງສິດ ແລະ ຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ໃນການລົງພົບປະຢ້ຽມຢາມພໍ່ແມ່ປະຊາຊົນໃນຄັ້ງນີ້ ສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ໄດ້ນຳເອົາເນື້ອໃນຈິດໃຈຜົນສຳເລັດຂອງກອງປະຊຸມສະໄໝສາມັນເທື່ອທີ 2  ຂອງສະພາແຫ່ງຊາດ ຊຸດທີ IX, ຊຶ່ງກອງປະຊຸມໄດ້ພິຈາລະນາຮັບຮອງເອົາ 11 ບັນຫາໃຫຍ່ສຳຄັນພື້ນຖານຂອງປະເທດຊາດ ແລະ ນຳເອົາເນື້ອໃນຜົນສໍາເລັດ ກອງປະຊຸມສະໄໝສາມັນເທື່ອທີ 2 ສະພາປະຊາຊົນແຂວງ ຊຸດທີ II, ກອງປະຊຸມໄດ້ພິຈາລະນາຮັບຮອງເອົາ 6 ບັນຫາສໍາຄັນຂອງແຂວງ; ພ້ອມດຽວກັນ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ຍັງໄດ້ມີຄຳເຫັນໂອ້ລົມຕໍ່ຜູ້ເຂົ້າຮ່ວມ ເປັນຕົ້ນ: ການຈັດຕັ້ງປະຕິບັດລະບຽບກົດໝາຍຂອງພັກ-ລັດ, ລະບຽບການຂອງບ້ານ, ເມືອງ,ໃຫ້ເຂັ້ມງວດ, ຮຽກຮ້ອງໃຫ້ຮັກແພງສາມັກຄີຊ່ວຍເຫລືອເຊິ່ງກັນ ແລະ ກັນ, ພ້ອມກັນພັດທະນາເສດຖະກິດຄອບຄົວ, ປະກອບສ່ວນພັດທະນາປະເທດຊາດໃຫ້ມີຄວາມຈະເລີນສີວິໄລຂຶ້ນຢ່າງບໍ່ຢຸດຢັ້ງ.

ນອກນັ້ນ ຍັງເປີດໂອກາດໃຫ້ຜູ້ເຂົ້າຮ່ວມສະເໜີບັນຫາຕ່າງໆທີ່ຍັງພົບຄວາມຫຍຸ້ງຍາກພາຍໃນບ້ານ, ເມືອງ, ເປັນຕົ້ນບັນຫາພື້ນຖານໂຄງລ່າງຕ່າໆ ເພື່ອນຳສະເໜີຫາພາກສ່ວນທີ່ກ່ຽວຂ້ອງປຶກສາຫາລືຄົ້ນຄວ້າແກ້ໄຂຕາມຄວາມເໝາະສົມໃຫ້ດີຂຶ້ນກວ່າເກົ່າ.

ໂອກາດລົງພົບປະຢ້ຽມຢາມພໍ່ແມ່ປະຊາຊົນບັນດາເຜົ່າ ແລະ ເຜີຍແຜ່ເນື້ອໃນຈິດໃຈຜົນສຳເລັດກອງປະຊຸມດັ່ງກ່າວ, ສະພາປະຊາຊົນແຂວງຍັງໄດ້ນຳເອົາ ເຄື່ອງຊ່ວຍເຫລືອ, ເຄື່ອງກິລາ ມອບໃຫ້ປະຊາຊົນ ແລະ ໂຮງຮຽນແຕ່ລະບ້ານພາຍໃນເມືອງນາແລ ແລະ ເມືອງລອງ ເຊິ່ງປະກອບມີຜ້າອັດປາກຈຳນວນ 4.300 ກັບ, ເຈວລ້າງມື 24  ກັບ, ປື້ມຈຳນວນ 1.200 ຫົວ, ຫມາກບຸ້ນ 4 ຊຸດ, ກະຕໍ້ຫວາຍ 5 ຊຸດ, ບານສົ່ງ 5 ຊຸດ, ບານເຕະ 5 ຊຸດ ແລະ ຕູ້ລຳໂພງ, ລວມມູນຄ່າທັງຫມົດ 16.000.000 ກວ່າລ້ານກີບ.