ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ສະພາປະຊາຊົນແຂວງ ຫລວງນ້ຳທາ ຝຶກອົບຮົມຍົກສູງຂີດຄວາມສາມາດທາງດ້ານໄອທີ ໃຫ້ພະນັກງານ-ລັດຖະກອນ ທີ່ເປັນເສນາທິການສະພາປະຊາຊົນແຂວງ ຂຶ້ນໃນຕອນເຊົ້າຂອງວັນທີ 24 ມິຖຸນາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ໂດຍການເປັນປະທານຂອງທ່ານ ມີໄຊ ມີວິໄລ ກຳມະການຄະນະປະຈຳ, ເລຂາທິການສະພາປະຊາຊົນແຂວງ, ມີຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍວິຊາການພາຍໃນສະພາປະຊາຊົນແຂວງເຂົ້າຮ່ວມທັງໝົດ 30 ກວ່າຄົນ

.

ຈຸດປະສົງໃນການຝຶກອົບຮົມຄັ້ງນີ້ ເພື່ອຍົກສູງຄຸນນະພາບ, ຄວາມຮູ້, ຄວາມສາມາດໃນວຽກງານຂໍ້ມູນຂ່າວສານ ແລະ ໄອທີ ຂອງພະນັກງານວິຊາການພາຍໃນສະພາປະຊາຊົນແຂວງ ໃນການໝູນໃຊ້ເຂົ້າໃນວຽກງານວິຊາສະເພາະຂອງຕົນ ໃຫ້ມີຄວາມສະດວກ, ວ່ອງໄວ ແລະ ທັນກັບຍຸກສະໄໝໃນປັດຈຸບັນ.

ໂອກາດນີ້ທ່ານ ມີໄຊ ມີວິໄລ ເລຂາທິການສະພາປະຊາຊົນແຂວງ ໄດ້ມີຄຳເຫັນ ແລະ ກ່າວເປີດກອງປະຊຸມຝຶກອົບຮົມ ຂຶ້ນຢ່າງເປັນທາງການ ກ່ອນອື່ນທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ກັບການເປີດກອງປະຊຸມຝຶກອົບຮົມໃນຫົວຂໍ້ ຍົກລະດັບຂີດຄວາມສາມາດທາງດ້ານໄອທີໃຫ້ແກ່ພະນັກງານໃນຄັ້ງນີ້ ແລະ ຮຽກຮ້ອງໃຫ້ນັກສຳມະນາກ່ອນທຸກທ່ານຈົ່ງເອົາໃຈໃສ່ຮ່ຳຮຽນເອົາຄວາມຮູ້ໃນຫົວຂໍ້ຕ່າງໆ ທີ່ໄດ້ຝຶກອົບຮົມ ເພື່ອນຳເອົາບົດຮຽນມາໝູນໃຊ້ເຂົ້າໃນວຽກງານວິຊາສະເພາະຂອງຕົນໃຫ້ເກີດປະໂຫຍດສູງສຸດຮັບປະກັນການເປັນເສນາທິການໃຫ້ແກ່ສະພາປະຊາຊົນແຂວງ ໃຫ້ມີຄວາມສະດວກ, ວ່ອງໄວ, ທັນສະໄໝ ແລະ ມີຄຸນນະພາບດີຂຶ້ນກວ່າເກົ່າ.

 

ຊຶ່ງຫົວຂໍ້ທີ່ນຳມາຝຶກອົບຮົມໃນຄັ້ງນີ້ປະກອບມີຄື: ການເເນະນຳກ່ຽວກັບການສ້າງຈີເມວ Gmail ແລະ ການສະມັກຊື່ເຂົ້າໃນບັນຊີ Google (Google account); ແນະນໍາການນໍາໃຊ້ GoogleForm; ຝຶກສ້າງແບບຟອມ ແລະ ນໍາໃຊ້ຕົວຈິງ; ແນະນໍາກ່ຽວກັບການແປງຟາຍເອກະສານຈາກ PDF ເປັນ Word (Convert PDF to Word) ດ້ວຍ Google Lens ແລະ Google drive; ແນະນໍາກ່ຽວກັບການນໍາໃຊ້ລະບົບຈັດເກັບ ແລະ ຄົ້ນຫາເອກະສານ ຂອງສະພາປະຊາຊົນແຂວງ (Electronic document); ແນະນໍາກ່ຽວກັບການນໍາໃຊ້ສະມາດບອດ, ການສ້າງ ແລະ ເຂົ້າຮ່ວມກອງປະຊຸມທາງອອນລາຍ (Video Conference ) ໂດຍນຳໃຊ້ Zoom, google, Meet, True Conf ພ້ອມດຽວກັນ ນັກວິທະຍາກອນ ແລະ ສໍາມະນາກອນ ໄດ້ແລກປ່ຽນສົນທະນາບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອຄວາມຮູ້, ຄວາມເຂົ້າໃຈຕໍ່ກັບບົດຮຽນ; ກອງປະຊຸມໄດ້ດຳເນີນເປັນເວລາ 1 ວັນເຕັມດ້ວຍຜົນສຳເລັດຕາມລະດັບຄາດໝາຍ.

ໂດຍ: ວັນນີ ແຝງບົວວັນ