ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ເພື່ອຮັບປະກັນຮອບດ້ານ ໃນການເປັນເຈົ້າພາບທີ່ດີ ຮອງຮັບໃຫ້ແກ່ການກະກຽມຈັດກອງປະຊຸມສຳມະນາກ່ຽວກັບການປົກປ້ອງ ແລະ ສົ່ງເສີມວຽກງານດ້ານສິດທິມະນຸດ ແລະ ວຽກງານການຕ່າງປະເທດ ໃຫ້ແກ່ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ 4 ແຂວງພາກໃຕ້ ທີ່ຈະຈັດຂຶ້ນໃນລະຫວ່າງວັນທີ 1-2 ກັນຍາ ທີ່ຈະມາເຖິງໃຫ້ມີຜົນສຳເລັດ; ດັ່ງນັ້ນ,ໃນຕອນເຊົ້າຂອງວັນທີ 30 ສິງຫາ 2022 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງ (ສພຂ) ສາລະວັນ ໄດ້ຈັດກອງປະຊຸມປຶກສາຫາລືຮ່ວມກັບພາກສ່ວນທີ່ກ່ຽວຂ້ອງ, ໂດຍການເປັນປະທານກອງປະຊຸມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ, ເຂົ້າຮ່ວມມີີ ເລຂາທິການ ສພຂ, ຕາງໜ້າຈາກກົມກອງ, ຫ້ອງວ່າການ ແລະ ພະແນການທີ່ກ່ຽວຂ້ອງ ພ້ອມດ້ວຍພະນັກງານພາຍໃນ ສພຂ ເຂົ້າຮ່ວມ.

ຕາມແຜນຂອງກຳມາທິການຕ່າງປະເທດ ສະພາແຫ່ງຊາດ ໄດ້ເລືອກເອົາແຂວງສາລະວັນ ເປັນບູລິມະສິດທີ່ເໝາະສົມ ໃນການເປັນເຈົ້າພາບຈັດກອງປະຊຸມສຳມະນາ ໃຫ້ແກ່ ສສຊ, ສສຂ ໃຊ້ເວລາ 2 ວັນ ໃນລະຫວ່າງວັນທີ 1-2 ກັນຍາ 2022 ຢູ່ທີ່ຫ້ອງປະຊຸມສະໂມສອນຂອງແຂວງສາລະວັນ, ໂດຍການເປັນປະທານຂອງທ່ານ ສັນຍາ ປຣະເສີດ ກຳມະການຄະນະປະຈໍາສະພາແຫ່ງຊາດ ທັງເປັນປະທານກຳມາທິການການຕ່າງປະເທດ ຂອງສະພາແຫ່ງຊາດ, ຈະໄດ້ເຊີນ ສສຊ, ສສຂ ຈາກສະພາປະຊາຊົນ 4 ແຂວງພາກໃຕ້ຄື: ແຂວງສາລະວັນ ເຈົ້າພາບ, ແຂວງຈຳປາສັກ, ແຂວງເຊກອງ ແລະ ແຂວງອັດຕະປື ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມສຳມະນາໃນຄັ້ງນີ້ ປະມານ 70 ກວ່າທານ; ສຳລັບເນື້ອໃນທີ່ຈະນຳມາສຳມະນາ ປະກອບມີ 5 ຫົວຂໍ້ຫຼັກຄື: 1).ຄວາມຮູ້ພື້ນຖານກ່ຽວກັບວຽກງານສິດທິມະນຸດ ແລະ ການເຄື່ອນໄຫວວຽກງານໃນຂົງເຂດດັ່ງກ່າວຂອງ ສປປລາວ ໃນເວທີພາກພື້ນ ແລະ ສາກົນ; 2).ກົດໝາຍ ວ່າດ້ວຍສົນທິສັນຍາ ແລະ ສັນຍາສາກົນ; 3).ພາລະບົດບາດຂອງສະພາແຫ່ງຊາດຕໍ່ກັບການຮັບຮອງ, ໃຫ້ສັດຕະຍາບັນ ແລະ ການເຂົ້າຮ່ວມເປັນພາຄີຂອງສົນທິສັນຍາ, ການຕິດຕາມການຈັດຕັ້ງປະຕິບັດພັນທະ ພາຍໃຕ້ສົນທິສັນຍາສາກົນ; 4).ການຮ່ວມມືກັບອົງການລັດຖະສະພາພາກພື້ນ,ສາກົນ ແລະ ກະກຽມດ້ານຕ່າງໆໃຫ້ແກ່ຄະນະຜູ້ແທນສະພາແຫ່ງຊາດລາວ ໃນການເຂົ້າຮ່ວມກອງປະຊຸມອົງການລັດຖະສະພາພາກພື້ນ ແລະ ສາມກົນ; 5).ການຮ່ວມມືກັບລັດຖະສະພາຕ່າງປະເທດ, ການຕ້ອນຮັບຄະນະຜູ້ແທນຕ່າງປະເທດ ແລະ ການກະກຽມຮອບດ້ານໃຫ້ແກ່ຄະນະຜູ້ແທນສະພາແຫ່ງຊາດລາວ ໃນການເດີນທາງໄປເຮັດວຽກ ແລະ ພົບປະຢ້ຽມຢາມຢູ່ບັນດາປະເທດຕ່າງໆ ໃນກອບສອງຝ່າຍ.

ກອງປະຊຸມໄດ້ຫາລື ແລະ ເປັນເອກະພາບຕາມຄາດໝາຍຮ່ວມກັນຢ່າງຕັ້ງໜ້າ ຕໍ່ກັບວຽກງານການເມືອງຕາມຂອບເຂດຄວາມຮັບຜິດຊອບຂອງແຕ່ລະພາກສ່ວນ, ໂດຍມອບໝາຍໃຫ້ເລຂາທິການ ສພຂ ເປັນໃຈກາງ ກະກຽມອອກແຈ້ງການເຊີນເປົ້າໝາຍພາກສ່ວນທີ່ກ່ຽວຂ້ອງໃຫ້ສຳເລັດ, ສ້າງສິ່ງອຳນວຍຄວາມສະດວກໃນດ້ານພິທີການ ແລະ ສະຖານທີ່, ມອບໃຫ້ພາກສ່ວນທີ່ກ່ຽວຂ້ອງ ກະກຽມດ້ານເນື້ອໃນທີ່ຈະລາຍງານຕາມວາລະກອງປະຊຸມ, ລະດົມທຸກພາກສ່ວນ ອອກແຮງານອະນາໄມລວມໃຫ້ມີຄວາມສະອາດງາມຕາເປັນລະບຽບຮຽບຮ້ອຍໃນເທດສະບານ,  ຮັບປະກັນການຮັກສາຄວາມສະຫງົບພາຍໃນໃຫ້ເປັນປົກກະຕິ, ປະສານສົມທົບກັບຜູ້ປະກອບການໂຮງແຮມບ້ານພັກ ປັບປຸງດ້ານການບໍລິການ ແລະ ອາຫານໃຫ້ເໝາະສົມ; ຖືໂອກາດທີ່ດີທີ່ຈະໄດ້ໂຄສະນາປະຊາສຳພັນໃຫ້ເປັນທີ່ຮູ້ຈັກ ແຫຼ່ງທ່ອງທ່ຽວຕາມແຫ່ງຕ່າງໆຂອງແຂວງ ພິເສດໃກ້ຈະມາເຖິງນີ້ກໍ່ເປັນເທດສະການບຸນຊ່ວງເຮືອປະເພນີປະຈໍາປີ 2022 ຂອງແຂວງສາລະວັນ ເພື່ອເປັນການດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທຽວໃຫ້ຫຼາຍຂຶ້ນ ເພື່ອສ້າງເສດຖະກິດພາຍໃນແຂວງສາລະວັນໃຫ້ດີຂຶ້ນກວ່າເກົ່າ.

ພາບ-ຂ່າວ: ດີລຳພົນ ພົມມະຈັນ