ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 9 ພຶດສະພາ 2022 ນີ້, ຢູ່ທີ່ສະໂມສອນຂອງເມືອງເລົ່າງາມ ແຂວງສາລະວັນ ສະພາປະຊາຊົນແຂວງ (ສພຂ) ສາລະວັນ ໄດ້ເປີດກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ ສະມາຊິກສະພາປະຊາຊົນແຂວງ (ສສຂ) ແລະ ພະນັກງານ-ລັດຖະກອນ ທີ່ສັງກັດຢູ່ໃນຄະນະກຳມະການເສດຖະກິດ,ແຜນການແລະການເງິນ (ຄສຜງ) ຂຶ້ນຢ່າງເປັນທາງການ (ດ້ວຍຮູບແບບກອງປະຊຸມເຊິ່ງໜ້າ ແລະ ແບບວີດີໂອທາງໄກ); ໂດຍໃຫ້ກຽດເປັນປະທານຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ, ເຂົ້າຮ່ວມມີຄະນະປະຈໍາ ສພຂ, ຄະນະກຳມະການເສດຖະກິດ,ແຜນການແລະການເງິນ, ຄະນະເລຂາທິການ, ຜູ້ປະສານງານໂຄງການ, ສສຂ ທີ່ສັງກັດຢູ່ ຄສຜງ, ມີບັນດາທ່ານວິທະຍາກອນຈາກສູນກາງ ແລະ ພາຍໃນແຂວງ ພ້ອມດ້ວຍສຳມະນາກອນເຂົ້າຮ່ວມຝຶກອົບຮົມໃນຄັ້ງນີ້.


ການຝຶກຄັ້ງນີ້ ນັກວິທະຍາກອນ ຈະໄດ້ຮຽນຮູ້ໃນຫົວຂໍ້ທີ່ສໍາຄັນໆ ຄື: ກ່ຽວກັບການຕິດຕາມກວດກາແຜນງົບປະມານ ແລະ ແຜນພັດທະນາເສດຖະກິດ-ສັງຄົມ; ການຄົ້ນຄວ້າແຜນພັດທະນາເສດຖະກິດ-ສັງຄົມ ທີ່ຕິດພັນກັບບັນດາຄາດໝາຍມະຫາພາກ, ການຈັດສັນງົບປະມານ ແລະ ການລົງທຶນໃນຂົງເຂດເສດຖະກິດ; ຂະບວນການສ້າງແຜນການລົງທຶນຂັ້ນແຂວງ ປະຈໍາປີ; ການພິຈາລະນາຮັບຮອງເອົາແຜນການລົງທຶນຂອງ ສພຂ; ຫົວຂໍ້: ວິທີການຄິດໄລ່ລວມຍອດຜະລິດຕະພັນພາຍໃນ (GDP) ແລະ ການຄິດໄລ່ລວມຍອດລາຍໄດ້ແຫ່ງຊາດ (GIN); ພ້ອມກັນນັ້ນຈະໄດ້ລະດົມຄວາມຄິດເຫັນໃສ່ຮ່າງຂໍ້ຕົກລົງ ວ່າດ້ວຍກົນໄກການພົວພັນປະສານງານລະຫວ່າງຄະນະກຳມະການ ເສດຖະກິດ,ແຜນການແລະການເງິນກັບບັນດາພະແນກການທີ່ກ່ຽວຂ້ອງ, ທັງເຜີຍແຜ່ມະຕິ ຂອງຄະນະປະຈໍາ ສພຂ ວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງຄະນະກຳມະການເສດຖະກິດ,ແຜນການ ແລະ ການເງິນ ສພຂ.


ການຝຶກອົບຮົມດັ່ງກ່າວ ແມ່ນເປັນການຍົກສູງປະສິດທິພາບໃນການປະຕິບັດໜ້າທີ່ວຽກງານຂອງ ສສຂ ສັງກັດຢູ່ ຄສຜງ ແລະ ພະນັກງານ-ລັດຖະກອນ; ເພື່ອສ້າງທາງດ້ານຫຼັກການ, ສ້າງຄວາມເປັນເອກະພາບຕໍ່ເນື້ອໃນຕ່າງໆ ເພື່ອໃຫ້ໄດ້ຮັບໝາກຜົນຕາມລະດັບຄາດໝາຍທີ່ວາງໄວ້ ແລະ ສາມາດນຳໄປໃຊ້ໃນໜ້າທີ່ວຽກງານຕົວຈິງ.
ກອງປະຊຸມຈະໄດ້ດຳເນີນໃນລະຫວ່າງວັນທີ 9-10 ພຶດສະພາ 2022 ເປັນເວລາ 2 ວັນ ທີ່ສະໂມສອນຂອງເມືອງເລົ່າງາມ ແຂວງສາລະວັນ;
ກອງປະຊຸມຝຶກອົບຮົມໃນຄັ້ງນີ້ໄດ້ຮັບການສະໜັບສະໜູນຈາກ ແຜນງານການມີສ່ວນຮ່ວມຂອງປະຊາຊົນຕໍ່ວຽກງານປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ).

ຂ່າວ: ດີລຳພົນ ພົມມະຈັນ ແລະ ພາບ: ຄັດສອນ ຮຸ່ງສະຫວ່າງ