ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 14 ມິຖຸນາ 2022 ນີ້ ຢູ່ທີ່ຫ້ອງປະຊຸມສະໂມສອນແຂວງ ສພຂສາລະວັນ ໄດ້ຈັດພິທີປາຖະກະຖາເລົ່າມູນເຊື້ອວັນສ້າງຕັ້ງອົງການກວດກາພັກ-ລັດ ຄົບຮອບ 40 ປີ (16 /2/1982-16/2/2022) ໂດຍໃຫ້ກຽດເຂົ້າຮ່ວມປະຖາກະຖາ ຂອງ ທ່ານ ນາງ ສູນໄຖ ໄຊຍະແສງ ກໍາມະການພັກແຂວງ ຮອງປະທານສພຂ, ມີຄະນະກຳມະ ການ, ຄະນະເລຂາທິການ, ຫົວໜ້າ-ຮອງຂະແໜງ, ພະນັກງານວິຊາການ ພາຍໃນສພຂເຂົ້າຮ່ວມ.

ໃນພິທີ ຮອງປະທານ ສພຂ ໄດ້ຍົກໃຫ້ເຫັນກ່ຽວກັບວັນສ້າງຕັ້ງ ແລະປະຫວັດແຫ່ງການກຳເນີດ ການເຕີບໃຫ່ຍຂະຫຍາຍຕົວຂອງອົງກວດກາພັກ-ລັດ ໃນການປະກອບສ່ວນພາລະກິດປະຕິວັດຂອງແຕ່ລະໄລຍະ ມູນເຊື້ອອັນດີງາມ 40 ປີຂອງອົງການກວດກາພັກ-ລັດ ເຊິ່ງເປັນຂີດໝາຍທີ່ສໍາຄັນ ໃນຂະບວນວິວັດ ເພີ່ມທະວີພາລະບົດບາດການນໍາພາຂອງພັກໃນການຄຸ້ມຄອງລັດຄຸ້ມຄອງເສດຖະກິດ-ສັງຄົມ ພັກເຮົາຍາມໃດກໍ່ຖືສໍາຄັນໃນວຽກງານກວດ ກາ ເຊິ່ງເຫັນໄດ້ວ່າກ່ອນກ້າວໄປເຖິງວັນສ້າງຕັ້ງພັກຢ່າງເປັນທາງການ ໃນວັນທີ 22 ມີນາ 1955 ພາຍໃຕ້ການຊີ້ນໍາຂອງປະທານໄກສອນ ພົມວິຫານ ກໍ່ຄືບັນດາທ່ານການນໍາທີ່ເປັນແກ່ນສານໃນເວລານັ້ນ ກໍໄດ້ມີການຊີ້ນໍາການກວດກາສະມາຊິກພັກ ກອມມູນິດອິນດູຈີນສັງກັດຄະນະພັກແຄວ້ນລາວ ຈໍານວນ 600 ສະຫາຍ ເພື່ອກັ່ນກອງສະມາຊິກພັກທີ່ຍັງຄົບມາດຖານເງື່ອນໄຂ, ນັບແຕ່ມື້ໄດ້ຮັບການສ້າງຕັ້ງເປັນຕົ້ນມາ ພັກໄດ້ຖືເອົາວຽກງານກວດກາພາຍໃນພັກເປັນໜຶ່ງໃນພາລະບົດບາດນໍາພາທີ່ຂາດບໍໄດ້ ໂດຍຍືນໝັ້ນທັດສະນະທີ່ວ່າການນໍາພາຕ້ອງຕິດພັນກັບການກວດກາ ຖ້າບໍມີການກວດກາກໍ່ເໝືອນບໍມີການນໍາພາ ພາຍຫຼັງຢຶດອໍານາດການປົກຄອງໃນທົ່ວປະເທດ ວັນທີ 2 ທັນວາ 1975 ການເພິ່ມທະວີການກວດກາມີຄວາມຈໍາເປັນຕ້ອງກວດກາຕໍ່ການຄຸ້ມຄອງບໍລິຫານຂອງບັນດາອົງການລັດ ແລະທົ່ວລະບົບການເມືອງ, ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ II ປີ 1980 ໄດ້ກໍານົດວ່າ ຕ້ອງຈັດຕັ້ງຄະນະກວດກາຂຶ້ນທັນທີ ເພື່ອຊ່ວຍສູນກາງພັກ, ລັດຖະບານ ແລະ ສະພາປະຊາຊົນສູງສຸດ ໃນການກວດກາການປະຕິບັດມະຕິຂອງພັກ, ກົດໝາຍ ແລະຂໍ້ກໍານົດຕ່າງໆຂອງລັດ ໂດຍອີງໃສ່ມະຕິດັ່ງກ່າວ ສູນກາງພັກສູນກາງພັກປະຊາຊົນປະຕິວັດລາວ, ຄະນະປະຈໍາສະພາສູງສຸດ ແລະສະພາລັດຖະມົນຕີສ ປປ ລາວ ໄດ້ອອກລໍາລັດ 02 ລົງວັນທີ 16 ກຸມພາ 1982  ກໍານົດໃຫ້ສ້າງຕັ້ງຄະນະກໍາມະການກວດກາພັກ-ລັດ ຂຶ້ນຂັ້ນສູນກາງ, ແຂວງ ແລະເມືອງ , ແບ່ງກໍາມະການຮັບຜິດຊອບ ແລະໄດ້ມີມະຕິຕົກລົງຮັບຮອງເອົາວັນທີ 16 ກຸມພາ 1982 ເປັນວັນສ້າງຕັ້ງອົງການກວດກາພັກ-ລັດ. ການປາຖະກະຖາໃນຄັ້ງນີ້ ເພື່ອເຮັດໃຫ້ພະນັກງານ-ລັດຖະກອນ ພາຍໃນສພຂ ເຫັນໄດ້ມູນເຊື້ອປະຫວັດຄວາມເປັນມາແຫ່ງການເຕີບໃຫຍ່ຂະຫຍາຍຕົວ ຂອງວັນສ້າງຕັ້ງອົງການກວດກາພັກ-ລັດ ຕະຫຼອດໄລຍະ 40 ປີ ແລະ ເປັນການປູກຈິດສໍານຶກໃຫ້ແກ່ພະນັກງານ ໄດ້ຮັບຮູ້ ແລະ ເຂົ້າໃຈເນື້ອໃນວັນສໍາຄັນດັ່ງກ່າວຢ່າງເລິກເຊິ່ງເຖິງຖອງ.

ໃນຕອນທ້າຍ ກໍຍັງໄດ້ຜ່ານຂໍ້ຕົກລົງຄະນະຊີ້ນໍາ ແລະຄະນະຮັບຜິດຊອບ ການກະກຽມ ແລະດໍາເນີນກອງປະຊຸມສະໄໝສາມັນເທື່ອທີ 3 ​ຂອງສພຂ ຊຸດທີ II  ເພື່ອເປັນການຫ້າງຫາກະກຽມແຕ່ຫົວທີ ຕໍ່ກັບບັນດາໜ້າວຽກທີ່ຈະຕ້ອງໄດ້ຈັດຕັ້ງປະຕິບັດ ເພື່ອເຮັດໃຫ້ກອງປະຊຸມມີຜົນສໍາເລັດຢ່າງຈົບງາມ.

(ຂ່າວ: ນາງ ຄັດສອນ ຮຸ່ງສະຫວ່າງ; ພາບ: ດີລໍາພົນ ພົມມະຈັນ)