ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນວັນທີ 24 ພຶດສະພາ 2022 ນີ້; ຢູ່ທີ່ຫ້ອງປະຊຸມສະໂມສອນຂອງແຂວງສາລະວັນ ສະພາປະຊາຊົນແຂວງ(ສພຂ) ສາລະວັນ ຈັດກອງປະຊຸມທາບທາມຮ່າງກົດໝາຍ ຈຳນວນ 4 ສະບັບ; ໂດຍການເປັນປະທານຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ, ມີທ່ານ ນາງ ສູນໄຖ ໄຊຍະແສງ ກຳມະການພັກແຂວງ ຮອງປະທານ ສພຂ, ມີປະທານ-ຮອງປະທານຄະນະຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສພຂ, ບັນດາທ່ານຕາງໜ້າຈາກພະແນກການ, ກົມກອງອ້ອມຂ້າງແຂວງ ທີ່ກ່ຽວຂ້ອງເຂົ້າຮ່ວມທາບທາມໃນຄັ້ງນີ້.


ຮ່າງກົດໝາຍທີ່ນຳມາທາບທາມໃນຄັ້ງນີ້ ປະກອບມີ: ຮ່າງກົດໝາຍ ວ່າດ້ວຍການແກ້ໄຂຄຳຮ້ອງທຸກ (ສະບັບປັບປຸງ) ມີທັງໝົດ VIII ພາກ, 49 ມາດຕາ , ຮ່າງກົດໝາຍ ວ່າດ້ວຍ ວິຈິດສິນ (ສະບັບສ້າງໃໝ່) ມີທັງໝົດ XI ພາກ, 87 ມາດຕາ, ຮ່າງກົດໝາຍ ວ່າດ້ວຍຊັບສິນຂອງລັດ (ສະບັບປັບປຸງ) ມີທັງໝົດ VIII ພາກ, 65 ມາດຕາ ແລະ ຮ່າງກົດໝາຍ ວ່າດ້ວຍ ຄວາມປອດໄພຂອງເຂື່ອນ (ສະບັບສ້າງໃໝ່) ມີທັງໝົດ X ພາກ, 72 ມາດຕາ; ບັນດາກົດໝາຍທີ່ນຳມາທາບທາມຄັ້ງນີ້ລ້ວນແຕ່ມີຄວາມສຳຄັນຕໍ່ສະພາບເສດຖະກິດ-ສັງຄົມ, ປົກປັກຮັກສາ ແນ່ໃສ່ສ້າງລັດປົກຄອງດ້ວຍກົດໝາຍ;


ກອງປະຊຸມດັ່ງກ່າວ ພາຍຫຼັງໄດ້ຮັບຟັງການນຳສະເໜີຮ່າງກົດໝາຍແລ້ວ ຜູ້ແທນກອງປະຊຸມໄດ້ສຸມໃສ່ຄົ້ນຄວ້າ ແລະ ປະກອບຄຳຄິດຄຳເຫັນ ເຂົ້າໃສ່ແຕ່ລະໝວດ ແຕ່ລະມາດຕາ ຂອງກົດໝາຍ ຈຳນວນ 4 ສະບັບ ດັ່ງກ່າວຢ່າງເປັນເຈົ້າການ ທັງນີ້ເພື່ອຮັບປະກັນຄວາມເປັນເອກະພາບເນື້ອໃນມີຄວາມຖືກຕ້ອງ, ຄົບຖ້ວນ, ເທດເໝາະກັບສະພາບຄວາມເປັນຈິງ ແລະ ສອດຄ່ອງກັບກົດໝາຍອື່ນ, ທັງຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ (ສພຊ) ຊຸດທີ IX ທີ່ຈະຈັດຂຶ້ນໃນລະຫວ່າງເດືອນມິຖຸນາທີ່ຈະເຖິງນີ້.

ພາບ ແລະ ຂ່າວ: ດີລຳພົນ ພົມມະຈັນ