ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໂດຍ​ປະ​ຕິ​ບັດ​ຕາມ​ແຈ້ງ​ການ​ຂອງ​ຄະ​ນະ​ເລ​ຂາ​ທິ​ການ​ສ​ະ​ພາ​ແຫ່ງ​ຊາດ ມາໃນວັນທີ 17 ພຶດສະພາ 2022 ທີ່ຫ້ອງປະຊຸມຮັບຮອງສະໂມສອນແຂວງ, ສະພາປະຊາຊົນແຂວງ ໄດ້ຈັດກອງປະຊຸມທາບທາມກົດໝາຍ ຈໍານວນ 2​ ສະບັບ ພາຍໃຕ້ການເປັນປະທານຂອງ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ, ມີທ່ານຮອງປະທານສະພາປະຊາຊົນ ພ້ອມດ້ວຍຄະນະປະຈໍາສະພາປະຊາຊົນແຂວງ, ຄະນະກໍາມະການ, ຄະນະເລຂາທິການ ສພຂ;  ມີຕາງໜ້າຈາກສານປະຊາຊົນແຂວງ, ອົງການໄອຍະການປະຊາຊົນແຂວງ, ກອງ​ບັນ​ຊາ​ການ​ປ້ອງ​ກັນ​ຄວາມ​ສະ​ຫງົບ​ແຂວງ, ກອງບັນຊາການທະຫານແຂວງ, ພະແນກຍຸຕິທໍາ, ອົງການກວດກາລັດແຂວງ, ພະ​ແນກ​ພາຍ​ໃນ, ພະນັກງານກ່ຽວຂ້ອງສພຂ ເຂົ້າຮ່ວມ.

        ກົດໝາຍວ່າດ້ວຍສານ​ປະ​ຊາ​ຊົນ (ສະບັບປັບປຸງ​ບາງ​ມາດ​ຕາ); ກົດ​ໝາຍ​ວ່າ​ດ້ວຍ​ການ​ຄຸ້ມ​ຄອງ​ອາ​ວຸດ​ເສິກ ​ແລະ ວັດ​ຖຸ​ລະ​ເບີດ ຊຶ່ງຜູ້ເຂົ້າຮ່ວມກອງປະຊຸມໄດ້ສຸ່ມໃສ່ຄົ້ນຄວ້າປະກອບຄໍາຄິດ, ຄໍາເຫັນ ຢ່າງກົງໄປກົງມາດ້ວຍເຫດຜົນ ແລະ ຍົກເອົາປະສົບການ, ບົດຮຽນ ໃນການປະຕິບັດວຽກງານຕົວຈິງມາແລກປ່ຽນຄຳຄິດ, ຄຳເຫັນ,ນຳກັນຕາມ​ເ​ນື້ອ​ໃນ​ການ​ເຈະ​ຈິ້ມຂອງບາງມາດຕາ ແລະ​ມາດ​ຕາ​ອື່ນໆ ທີ່​ມີ​ຄວາມ​ສົນ​ໃຈ; ທັງໝົດນີ້ຄະນະກໍາມະການຍຸຕິທໍາ ແລະປກຊ-ປກສ ສພຂ ຈະໄດ້ສັງລວມຄວາມຄິດເຫັນຂອງພາກສ່ວນກ່ຽວຂ້ອງ ເພື່ອເຮັດໃຫ້ກົດໝາຍທີ່ນໍາມາທາບທາມໃນຄັ້ງນີ້ ສາມາດນໍາເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 3 ສະພາແຫ່ງຊາດ ໃນຕໍ່ໜ້າ; ແນ​ໃສ່ ເພື່ອຮັບປະກັນໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ປະຊາຊົນສາມາດເຂົ້າເຖິງຂະບວນການຍຸຕິທຳຫຼາຍຂຶ້ນກວ່າເກົ່າ ເຮັດໃຫ້ການຄຸ້ມຄອງລັດຄຸ້ມຄອງສັງຄົມ ມີຄວາມຍຸຕິທຳ ແລະ ໂປ່ງໃສ.

(ໂດຍ ນາງ ຄັດສອນ ຮຸ່ງສະຫວ່າງ)