ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 11-13 ກໍລະກົດ 2022 ທີ່ ບ້ານຫຼັງຄັງ ເມືອງບົວລະພາ ແຂວງຄໍາມ່ວນ  ສະພາປະຊາຊົນແຂວງຄໍາມ່ວນໄດ້ຈັດກອງປະຊຸມຝຶກອົບຮົມຍົກສູຂີດຄວາມສາມາດໃນດ້ານການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ແລະ ການຄົ້ນຄວ້າບັນຫາສຳຄັນຂອງທ້ອງຖິ່ນໃຫ້ສະມາຊິກສະພາປະຊາຊົນແຂວງ ຊຸດທີ II ແລະ ເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ໂດຍການເປັນປະທານຂອງ ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງ ເປັນກຽດເຂົ້າຮ່ວມ ແລະ ເປັນນັກວິທະຍາກອນ ໂດຍ ທ່ານ ສຸບັນ ສະວະບຸດ ກຳມະການຄະນະປະຈໍາສະພາແຫ່ງຊາດ ປະທານກຳມາທິການວຽກງານສະມາຊິກສະພາແຫ່ງຊາດ, ພ້ອມດ້ວຍ ທ່ານ ບຸນກວາງ ແກ້ວບຸນຍົງ ເຈົ້າເມືອງບົວລະພາ, ມີບັນທ່ານ ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງໃນທົ່ວແຂວງ, ນັກວິທະຍາກອນຈາກສູນກາງ ແລະ ເສນາທິການຊ່ວຍວຽກງານຂອງສະພາປະຊາຊົນແຂວງຄໍາມ່ວນເຂົ້າຮ່ວມທັງໝົດ 84 ທ່ານ, ຍິງ 28 ທ່ານ.ຈຸດປະສົງຂອງການຈັດຝຶກອົບຮົມໃນຄັ້ງນີ້ແມ່ນເພື່ອເພີ່ມຂີດຄວາມສາມາດໃຫ້ແກ່ສະມາຊິກສະພາປະຊາຊົນແຂວງ ແລະ ເສນາທິການຊ່ວຍວຽກ ຂອງສະພາປະຊາຊົນແຂວງຄໍາມ່ວນ ເປັນການຍົກລະດັບຄວາມຮູ້, ຄວາມສາມາດທັກສະຄວາມເຂົ້າໃຈເລິກເຊິ່ງໃນການຈັດຕັ້ງປະຕິບັດວຽກງານໃນສາມພາລະບົດບາດຕົ້ນຕໍຂອງຂອງສະພາປະຊາຊົນ ແຂວງທີ່ກົດໝາຍກຳນົດໄວ້: ດ້ານນິຕິກຳ, ດ້ານຕົກລົງບັນຫາສຳຄັນພຶ້ນຖານຂອງແຂວງ ແລະ ດ້ານຕິດຕາມກວດກາ; ໃນກອງປະຊຸມຕະຫຼອດ 3 ວັນຜູ້ເຂົ້າຮ່ວມໄດ້ຮັບຟັງການນຳສະເໜີ ແລະ ບັນຍາຍເນື້ອໃນເອກະສານຄື: ຫົວຂໍ້: ການປະເມີນຜົນບຸກຄະລາກອນ ທີ່ສະພາປະຊາຊົນຂັ້ນແຂວງ ເລືອກຕັ້ງ ແລະ ຮັບຮອງເອົາການສະເໜີແຕ່ງຕັ້ງ, ການຄົ້ນຄວ້າ ແລະ ການກະກຽມບົດປະກອບຄໍາເຫັນ ຢູ່ໃນກອງປະຊຸມສະພາປະຊາຊົນຂັ້ນແຂວງ, ມະຕິການຕິດຕາມກວດກາການຈັດຕັ້ງປະຕິບັດມະຕິກອງປະຊຸມສະພາປະຊາຊົນຂັ້ນແຂວງ ນຳສະເໜີໂດຍ: ທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ; ການຄົ້ນຄວ້າເນື້ອໃນກົດໝາຍ ແລະ ນິຕິກຳ ທີ່ພົວພັນກັບການຈັດຕັ້ງ ແລະ ການເຄື່ອນໄຫວຂອງສະພາປະຊາຊົນຂັ້ນແຂວງ ນຳສະເໜີໂດຍ: ທ່ານ ຄໍາສິງ ໄຊສົມແພງ ຮອງປະທານກຳມາທິການວຽກງານສະມາຊິກສະພາແຫ່ງຊາດ; ການຕົກລົງບັນຫາສຳຄັນຂອງທ້ອງຖິ່ນ ແລະ ການສ້າງຄໍາຖາມເຈາະຈີ້ມ ນຳສະເໜີໂດຍ: ທ່ານ ມະນີໂສ ຊາມູນຕີ ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ແລະ ການຕິດຕາມກວດກາ ການຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງ ແລະ ຂົງເຂດອື່ນໆ ພາຍໃນແຂວງ ນຳສະເໜີໂດຍ: ທ່ານ ທັນຕາ ກອງຜາລີ ຮອງປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດຈາກນັ້ນຜູ້ແທນເຂົ້າຮ່ວມກອງປະຊຸມກໍ່ໄດ້ຄົ້ນຄວ້າແລກປ່ຽນບົດຮຽນປະກອບຄໍາຄິດຄໍາເຫັນ ເຊິ່ງກັນ ແລະ ກັນ ໃຫ້ມີເນື້ອໃນບົດຮຽນ, ທັກສະທີ່ໝັກແໜ້ນໄດ້ພ້ອມກັນຍົກສູງຄວາມຮັບຜິດຊອບໜ້າທີ່ການເມືອງໂດຍສຸມໃສ່ການຕັ້ງຄໍາຖາມ ສົນທະນາແລກປ່ຽນໃນແຕ່ລະຫົວຂໍ້ ເຮັດໃຫ້ເຂົ້າສູ່ລວງເລິກ ແລະ ມີໝາກຜົນຫຼາຍຂຶ້ນ.

ໃນຕອນທ້າຍຂອງກອງປະຊຸມຝຶກອົບຮົມໃນຄັ້ງນີ້ ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງຄໍາມ່ວນ ໄດ້ມີຄໍາເຫັນສະຫຼຸບເນື້ອໃນວ່າ ກອງປະຊຸມຝຶກອົບຮົມ ຄັ້ງນີ້ເຖິງວ່າຈະດຳເນີນພຽງແຕ່ 3 ວັນກໍຕາມແຕ່ເຊື້ອໝັ້ນວ່າບັນດາທ່ານຜູ້ແທນ ແລະ ເສນາທິການຂອງສະພາປະຊາຊົນແຂວງຄໍາມ່ວນທີ່ເຂົ້າຮ່ວມກອງປະຊຸມຍົກສູງຂີດຄວາມສາມາດຄັ້ງນີ້ຈະນຳເອົາເນື້ອໃນບົດຮຽນ ແລະ ທັກສະຄັ້ງນີ້ນຳໄປຈັດຕັ້ງປະຕິບັດໜ້າທີ່ວຽກງານຕາມພາລະບົດບາດຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນກ່ວາເກົ່າ.

ພ້ອມນັ້ນໂອກາດຽວກັນ ທ່ານ ຍັງໄດ້ສະແດງຄວາມຊົມເຊີຍ ແລະ ຂອບໃຈຕໍ່ຜູ້ໃຫ້ທຶນຈັດກອງປະຊູມຝຶກອົບຮົມໃນເທື່ຶອນີ້ ເຊິ່ງໄດ້ຮັບການສະໜັບສະໜູນໂດຍ: ຈາກແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ການສ້າງລັດ ທີ່ປົກຄອງດ້ວຍກົດໝາຍ (ແຜນງານເຊກາ – CEGGA ).

ໂດຍ: ເອື້ອ ມະໂນສິງ.