ເພື່ອສະຫຼຸບຕີລາຄາຜົນສໍາເລັດການກະກຽມ ແລະ ດໍາເນີນ ກອງປະຊຸມສະໄໝສາມັນ ເທື່ອທີ 7 ແລະ ທິດທາງແຜນການກະກຽມກອງປະຊຸມສະໄໝສາມັນ ເທື່ອທີ 08 ຂອງສະພາປະຊາຊົນແຂວງ ຊຸດທີ II ແລະ ການກະກຽມດໍາເນີນກອງປະຊຸມຄົບຄະນະປະຈຳປີ 2024 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ໃນຕອນເຊົ້າວັນທີ 11 ພະຈິກ 2024ນີ້ ທີ່ຫ້ອງປະຊຸມຊັ້ນ 4 ຫ້ອງວ່າການປົກຄອງແຂວງສະຫວັນນະເຂດ ຄະນະປະຈໍາສະພາປະຊາຊົນແຂວງ ຮ່ວມກັບອົງການປົກຄອງແຂວງໄດ້ຈັດກອງປະຊຸມຂຶ້ນໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງເຈົ້າແຂວງສະຫວັນນະເຂດ, ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ,ມີຄະນະປະຈຳພັກແຂວງ,ຄະນະປະຈຳສະພາປະຊາຊົນແຂວງ ສະມາຊິກສະພາປະຊາຊົນແຂວງ,ມີບັນດາຫົວໜ້າພະແນກການ,ຮອງຫົວໜ້າພະແນກການອ້ອມຂ້າງແຂວງເຂົ້າຮ່ວມ.
ທ່ານ ຂັນທອງ ຄົມທິລາດ ຮອງເລຂາທິການ ສະພາປະຊາຊົນແຂວງ ກໍ່ໄດ້ຜ່ານບົດສະຫຼຸບຕີລາຄາການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 07 ຂອງສະພາປະຊາຊົນແຂວງ ຊຸດທີ II ໄດ້ພິຈາລະນາ ແລະ ຮັບຮອງເອົານິຕິກຳໃຕ້ກົດໝາຍ 2 ສະບັບຄື: ຂໍ້ຕົກ ຂອງທ່ານເຈົ້າແຂວງໆສະຫວັນນະເຂດ ວ່າດ້ວຍ ການຄຸ້ມຄອງກອງທຶນໄພພິບັດ ແຂວງສະຫວັນນະເຂດ (ສະບັບສ້າງໃໝ່) ແລະ ຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດ ວ່າດ້ວຍ ການຄຸ້ມຄອງ ແລະ ນໍາໃຊ້ທີ່ດິນກະສິກໍາ (ສະບັບສ້າງໃໝ່) ແລະ ໄດ້ພິຈາລະນາ, ຮັບຮອງເອົາ ຂໍ້ຕົກລົງຂອງທ່ານເຈົ້າແຂວງ ຈໍານວນ 02 ສະບັບ, ຮັບຮອງເອົາວຽກງານສະພາປະຊາຊົນແຂວງໃນລະຫວ່າງສອງກອງປະຊຸມ, ຮັບຮອງເອົາແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 06 ຕົ້ນປີ ແລະ ທິດທາງແຜນການ 06 ເດືອນທ້າຍປີ 2024 ແລະ ພິຈາລະນາ, ຮັບຮອງເອົາ ກ່ຽວກັບ ການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໃນໄລຍະຜ່ານມາ ແລະ ທິດທາງແຜນການ ໃນປີ 2024. ພ້ອມນີ້ກໍໄດ້ຜ່ານແຜນການກະກຽມ ແລະ ດໍາເນີນກອງປະຊຸມສະໄໝສາມັນ ເທື່ອທີ 08 ຂອງສະພາປະຊາຊົນແຂວງ ຊຸດທີ II ຊຶ່ງຄາດວ່າຈະຈັດຂຶ້ນໃນເດືອນ ທັນວາ 2024 ນີ້ .ພາຍຫຼັງທີ່ຜ່ານບົດລາຍງານແລ້ວ ທ່ານປະທານກອງປະຊຸມກໍ່ໄດ້ເຈາະຈິ້ມ ແລະ ຮັບຟັງການຊີ້ແຈງ, ການລາຍງານຈາກພາກສ່ວນທີ່ກ່ຽວຂ້ອງເຖິງຄວາມຄືບໜ້າໃນກະກຽມບັນດາເນື້ອໃນທີຈະນຳເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາປະຊາແຂວງຊຸດທີ II ຊຶ່ງແຕ່ລະພະແນກການໄດ້ລາຍງານຄວາມຄືບໜ້າໃນການສ້າງນິຕິກຳໃຕ້ກົດໝາຍ ຢ່າງກົງໄປກົງມາເພື່ອຊອກຫາວິທີ່ແກ້ໄຂຮ່ວມກັນຕື່ມອີກ.
ໃນຕອນທ້າຍຂອງກອງປະຊຸມທ່ານປະທານໄດ້ໂອ້ລົມ ແລະ ເນັ້ນໜັກໃນທຸກພາກສ່ວນຈົ່ງພ້ອມກັນເອົາໃສ່ຈັດຕັ້ງປະຕິບັດໜ້າທີ່ວຽກງານທີ່ໄດ້ຮັບມອບໝາຍໃຫ້ປະສົບຜົນສຳເລັດ ໂດຍສະເພາະການສ້າງ ແລະ ປັບປຸງນິຕິກຳໃຕ້ກົດໝາຍ ຮຽກຮ້ອງໃຫ້ທຸກພາກສ່ວນເອົາໃຈໃສ່ຂອດປະສານສົມທົບກັບພາກສ່ວນທີ່ກ່ຽວຂ້ອງໃນການຕອບສະໜອງຂໍ້ມູນ ເພື່ອຮັບປະກັນໃຫ້ແກ່ການສ້າງ ແລະ ປະປຸງນິຕິກຳໃຕ້ກົດໝາຍ ໃຫ້ມີເນື້ອໃນຮັດກຸມ, ຄົບຖ້ວນສົມບູນ ແລະ ສາມາດນຳເຂົ້າຜ່ານກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ II ຕາມຈຸດປະສົງຄາດໝາຍທີ່ວາງໄວ້.