ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 16 ມິຖຸນານີ້ ສພຂ ສາລະວັນ ໄດ້ຈັດກອງປະຊຸມຮ່ວມກັບຂົງເຂດເສດຖະກິດ-ການເງິນ ເພື່ອເປັນການເກັບກໍາຂໍ້ມູນ ເພີ່ມຕື່ມໃຫ້ແກ່  ສສຊ ເຂດ 14  ໃນການເຂົ້າຮ່ວມກອງປະຊຸມສະໄໝສາມັນເທື່ອທີ 3 ຂອງ ສພຊ ຊຸດທີ IX ທີ່ຫ້ອງປະຊຸມສະໂມສອນແຂວງ ໂດຍການເປັນປະທານ ຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄສຊ ເຂດ 14 ທັງເປັນປະທານ ສພຂ ມີ ທ່ານຮອງປະທານຄະນະກໍາມະການເສດຖະກິດແຜນການ ແລະການເງິນ, ຄະນະເລຂາທິການ, ຫົວໜ້າ-ຮອງຫົວໜ້າພະແນກໃນຂົງເຂດເສດຖະກິດ-ການເງິນ, ບັນດາທະນາຄານຕ່າງໆທີ່ປະຈໍາຢູ່ແຂວງ,ພະນັກງານ-ລັດຖະກອນທີ່ກ່ຽວຂ້ອງເຂົ້າຮ່ວມ.


      ການຈັດກອງປະຊຸມຄັ້ງນີ້ ໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ, ບັນດາໂຄງການລົງທຶນຂອງລັດໃນການກໍ່ສ້າງພຶ້ນຖານໂຄ່ງລ່າງ, ບັນດາໂຄງການເຊົ່າ-ສໍາປະທານທີ່ດິນ; ການຈັດຕັ້ງປະຕິບັດແຜນງົບປະມານໃນທົ່ວແຂວງ; ການຄຸ້ມຄອງທຸລະກິດນຳ້ມັນ ບັນຫາການເໜັງຕິງຂອງສິນຄ້າ; ຮັບຟັງການລາຍງານກ່ຽວກັບອັດຕາແລກປ່ຽນເງິນຕາຕ່າງປະເທດ ແລະຄຸ້ມຄອງເງິນຕາການຄຸ້ມຄອງຮ້ານແລກປ່ຽນເງິນຕາ; ລາຍງານການຂຸດຄົ້ນແຮ່ທາດຕ່າງໆ ລວມທັງຖ່ານຫີນ, ດິນໜຽວ, ກາວ, ແຮ່ຊາຍ ດິນ. ຈາກນັ້ນ, ໄດ້ມີການແລກປ່ຽນຄໍາຄິດຄໍາເຫັນຕໍ່ເນື້ອໃນທີ່ນໍາມາຄົ້ນຄວ້າໃນກອງປະຊຸມຢ່າງກົງໄປ-ກົງມາ.

 

(ຂ່າວ: ນາງ ຄັດສອນ ຮຸ່ງສະຫວ່າງ; ພາບ: ດີລໍາພົນ ພົມມະຈັນ)