ໃນລະຫວ່າງວັນທີ 27-29 ກຸມພາ 2024, ທ່ານ ບຸນທາມ ພຸດທະວົງສາ, ກຳມະການພັກ ນະຄອນຫຼວງວຽງຈັນ, ຮອງປະທານສະພາປະຊາຊົນ ນະຄອນຫຼວງວຽງຈັນ ພ້ອມດ້ວຍຄະນະ ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ຢູ່ທີ່ ສານປະຊາຊົນ ພາກກາງ, ກອງບັນຊາການທະຫານ ນະຄອນຫຼວງວຽງຈັນ, ສານປະຊາຊົນ ນະຄອນຫຼວງວຽງຈັນ ແລະ ສານປະຊາຊົນ ເຂດ 4, ເຊິ່ງໃນການລົງເຄື່ອນໄຫວຄັ້ງນີ້ ເພື່ອຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ, ນິຕິກຳໃຕ້ກົດໝາຍ ແລະ ຕິດຕາມກວດກາການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ນະຄອນຫຼວງວຽຈັນ ວ່າດວ້ຍການຮັບຮອງເອົາການຈັດຕັ້ງປະຕິບັດວຽກງານຂອງຂົງເຂດຕຸລາການ ແລະ ທິດທາງແຜນການໃນຕໍ່ໜ້າ. ນອກຈາກນັ້ນ, ຄະນະລົງເຮັດວຽກ ຍັງໄດ້ຮັບຟັງການລາຍງານຜົນການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງສະແດງໃຫ້ເຫັນໄດ້ເຖີງຂໍ້ສະດວກຂໍ້ຫຍຸ້ງຍາກດ້ານສະພາບການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍຂອງແຕ່ລະຂົງເຂດວຽກງານ.

ໃນໂອກາດດັ່ງກ່າວ, ຄະນະລົງເຮັດວຽກ ໄດ້ມີການແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ພ້ອມທັງຮັບເອົາບາງບັນຫາ, ຂໍ້ຫຍຸ້ງຍາກທີ່ແຕ່ລະຂົງເຂດ ໄດ້ພົບພໍ້ ເພື່ອນຳໄປປຶກສາຫາລື ແລະ ສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂ ແລະ ໃນຕອນທ້າຍກອງປະຊຸມ ທ່ານ ບຸນທາມ ພຸດທະວົງສາ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະນຳຂອງແຕ່ລະພາກສ່ວນທີ່ໄດ້ເອົາໃຈໃສ່ຕັ້ງໜ້າປະຕິບັດໜ້າທີ່ດ້ວຍຄວາມຫ້າວຫັນ ຈົນໄດ້ຮັບຜົນສຳເລັດຫຼາຍດ້ານໃນໄລຍະຜ່ານມາ ແລະ ໃຫ້ສືບຕໍ່ເອົາໃຈໃສ່ປະຕິບັດບັນດາຄາດໝາຍທີ່ກຳນົດໄວ້ໃນແຜນປີ ໃຫ້ສຳເລັດ ແລະ ໃຫ້ບັນລຸຕາມຄາດໝາຍທີ່ວາງໄວ້.