ໃນວັນທີ 02 ມີນາ 2023 ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 1 ນວ ແລະ ສະມາຊິກສະພາປະຊາຊົນ ນວ ຊຸດທີ II (ສສນວ) ໄດ້ລົງພົບປະກັບຜູ້ມີສິດເລືອກຕັ້ງ ຢູ່ເມືອງປາກງື່ມ ນວ ເຊິ່ງແບ່ງອອກເປັນ 2 ຈຸດ ຄື: ຄາບເຊົ້າ ຢູ່ບ້ານທ່າຊ້າງ ແລະ ຄາບບ່າຍ ຢູ່ບ້ານຫົວນາທົ່ງ ໃນການລົງເຄື່ອນໄຫວຄັ້ງນີ້ ແມ່ນເພື່ອເຜີຍແຜ່ຜົນສໍາເລັດຂອງກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ (ສພຊ) ແລະ ຂອງສະພາປະຊາຊົນ ນວ; ໃຫ້ກຽດລົງເຜີຍແຜ່ນຳໂດຍ ທ່ານ ອານຸພາບ ຕຸນາລົມ ປະທານ ຄະນະສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 1 ນວ, ປະທານ ສະພາປະຊາຊົນ ນວ, ມີ ທ່ານ ຂັນທີ ສີວິໄລ ສະມາຊິກສະພາປະຊາຊົນ ນວ ຊຸດທີ II, ຫົວໜ້າຄະນະສະມາຊິກ ສະພາປະຊາຊົນ ນວ ປະຈຳເຂດເລືອກຕັ້ງເມືອງ, ປະທານ ອົງການກວດກາພັກ-ລັດ ເມືອງປາກງື່ມ, ທ່ານ ບຸນທະວີ ສີແສນດີ ສະມາຊິກສະພາປະຊາຊົນ ນວ ຊຸດທີ II, ຫົວໜ້າອົງການໄອຍະການປະຊາຊົນ ເຂດ 2 ນວ, ມີບັນດາທ່ານຄະນະພັກເມືອງ, ນາຍບ້ານ ແລະ ພໍ່ແມ່ປະຊາຊົນ ເຂົ້າຮ່ວມຮັບຟັງໃນການເຜີຍແຜ່ຄັ້ງນີ້.

ໃນການລົງພົບປະຄັ້ງນີ້, ໄດ້ຮັບຟັງການລາຍງານສະພາບການຈັດຕັ້ງປະຕິບັດຂອງ 02 ບ້ານດັ່ງກ່າວ ເຊິ່ງອາຊີບ ຕົ້ນຕໍຂອງພໍ່ແມ່ປະຊາຊົນ ແມ່ນໄດ້ຖືເອົາການເຮັດນາ, ປູກຝັງ, ລ້ຽງສັດ ແລະ ປູກພືດອິນຊີ ເປັນຫຼັກ. ໃນໂອກາດດັ່ງກ່າວ, ບັນດາ ສສຊ ແລະ ສສ ນວ ກໍໄດ້ພັດປ່ຽນກັນນໍາສະເໜີເນື້ອໃນທີ່ສຳຄັນຕ່າງໆ ທີ່ຖືກຄົ້ນຄວ້າ, ພິຈາລະນາ ແລະ ຮັບຮອງເອົາໃນກອງປະຊຸມສະພາແຫ່ງຊາດ ແລະ ສະພາປະຊາຊົນ ນວ ຕາມພາລະບົດບາດ, ສິດ ແລະ ໜ້າທີ່ ເພື່ອເປັນການຈັດຕັ້ງຜັນຂະຫຍາຍ, ໂຄສະນາເຜີຍແຜ່ມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນ ນວ ໃຫ້ປະຊາຊົນຜູ້ມີສິດເລືອກຕັ້ງໄດ້ເຊື່ອມຊຶມ, ຮັບຮູ້ເຂົ້າໃຈຢ່າງກວ້າງຂວາງ ແລະ ທົ່ວເຖິງ, ທັງເປັນການພົບປະຜູ້ມີສິດເລືອກຕັ້ງ ເພື່ອນໍາເອົາຄໍາສະເໜີຄວາມຂັດຂ້ອງໝອງໃຈຂອງພໍ່ແມ່ປະຊາຊົນ ໄປຊຸກຍູ້ໃຫ້ພາກສ່ວນກ່ຽວຂ້ອງຄົ້ນຄວ້າຫາວິທີການແກ້ໄຂ ເຊິ່ງຄຳສະເໜີສ່ວນໃຫຍ່ແມ່ນຕິດພັນກັບການທຳການຜະລິດຂອງປະຊາຊົນ ເປັນຕົ້ນ: ແຫຼ່ງທຶນໃນການທຳການຜະລິດກະສິກຳ, ບັນຫາຄອງຊົນລະປະທານນໍ້າ ເພື່ອໃຫ້ສາມາດທຳການຜະລິດໄດ້ 02 ລະດູ, ນອກຈາກນັ້ນ, ປະຊາຊົນຍັງໄດ້ສະເໜີຂໍເສັ້ນທາງປູຢາງໄປຫາບ້ານດັ່ງກ່າວ. (ນາງ ໂຮງທ່າວ ຊົງເຢີ)