ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນອັງຄານ, ວັນທີ 2 ສິງຫາ 2022 ຢູ່ທີ່ຫ້ອງປະຊຸມ ສພຂ ໄດ້ເປີດກອງປະຊຸມຮັບຟັງການລາຍງານສະພາບການກະກຽມບັນດາເນື້ອໃນທີ່ຈະນໍາເຂົ້າຜ່ານໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານ ສພຂ, ເຂົ້າຮ່ວມກອງປະຊຸມມີຮອງປະທານ ສພຂ, ບັນດາທ່ານໃນຄະນະປະຈໍາ ສພຂ, ຄະນະເລຂາທິການ ສພຂ, ຫົວໜ້າ/ຮອງຫົວໜ້າພະແນກການ, ຜູ້ຕາງໜ້າຈາກຫ້ອງວ່າການແຂວງ, ກອງບັນຊາການ ປກສ ແຂວງ, ທະນາຄານແຫ່ງ ສປປ ລາວ ພາກເໜືອແຂວງອຸດົມໄຊ ແລະ ຫົວໜ້າຂະແໜງກ່ຽວຂ້ອງພາຍໃນ ສພຂ ເຂົ້າຮ່ວມຢ່າງພ້ອມພຽງ.ກອງປະຊຸມໄດ້ຮັບຟັງການລາຍງານຫຍໍ້ສະພາບຄວາມພ້ອມຂອງອະນຸກໍາມະການເນື້ອໃນ ສພຂ ແລະ ພະແນກການດ-ກົມກອງ ທີ່ມີບົດຈະນໍາຜ່ານໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງນີ້. ຫຼັງຈາກນັ້ນບັນດາທ່ານໃນຄະນະປະຈໍາ ສພຂ, ບັນດາອະນຸກໍາມະການກ່ຽວຂ້ອງໄດ້ມີຄໍາເຫັນເພີ້ມເຕີ່ມ ແລະ ບັນດາພະແນກການໄດ້ມີຄໍາເຫັນແລກປ່ຽນ ແລະ ປຶກສາຫາລືກັນຢ່າງກົງໄປກົງມາ ເພື່ອໃຫ້ການດໍາເນີນກອງສຳເລັດຕາມຄາດໝາຍ ແລະ ຖືກຕ້ອງສອດຄອງ ຕາມທີ່ໄດ້ກໍານົດໄວ້ໃນກົດໝາຍວ່າດ້ວຍ ສະພາປະຊາຊົນຂັ້ນແຂວງ.

ຈາກນັ້ນປະທານກອງປະຊຸມໄດ້ມີຄໍາເຫັນ ແລະ ມີທິດຊີ້ນໍາຕໍ່ການກະກຽມກອງປະຊຸມເຊັ່ນວ່າ: ໃນໄລຍະຜ່ານມາທາງຄະນະປະຈໍາ ສພຂ ໄດ້ອອກຂໍ້ຕົກລົງແຕ່ງຕັ້ງບັນດາອະນຸກໍາມະການຕ່າງໆ, ໄດ້ກໍານົດບັນດາຫົວຂໍ້ໃຫ້ແຕ່ລະພະແນກການ, ອົງການ ແລະ ໄດ້ປະສານສົມທົບກັບພາກສ່ວນກ່ຽວຂ້ອງໃນກະກຽມບົດລາຍງານຕໍ່ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ເຫັນວ່າສໍາເລັດຫຼາຍພະແນກການ, ພ້ອມທັງກໍານົດວັນສົ່ງບົດລາຍງານດັ່ງກ່າວ. ຕາມການຕົກລົງເຫັນດີກອງປະຊຸມຄັ້ງນີ້ຈະຈັດຂື້ນໃນລະຫວ່າງວັນທີ 9-10 ສິງຫາ 2022 ນີ້ ແລະ ພ້ອມນັ້ນທ່ານຍັງໄດ້ຮຽກຮ້ອງໃຫ້ບັນດາພະແນກການຮີບຮ້ອນສົ່ງບົດລາຍງານໃຫ້ທາງ ສພຂ ເພື່ອທີ່ຈະສົ່ງຕໍ່ໃຫ້ບັນດາທ່ານສະມາຊິກສະພາປະຊາຊົນແຂວງ ຄົ້ນຄວວ້າຢ່າງເລິກຊິ່ງ, ຖີ່ຖ້ວນຕໍ່ບັນດາເນື້ອໃນຕ່າງ ແລະ ຮັບປະກັນໃນການພິຈາລະນາ, ຮັບຮອງເອົາໃນກອງປະຊຸມ ໃຫ້ມີປະສິດທິພາບ, ປະສິດທິຜົນ.

   ພາບ/ຂ່າວ: ແສງພອນ ອິນນະລົງ.