(ສພຊ) ໃນຕອນເຊົ້າວັນທີ 3 ພະຈິກ 2023 ທີ່ຫ້ອງປະຊຸມໃຫຍ່ສະພາແຫ່ງຊາດ ນະຄອນຫຼວງວຽງຈັນ ການ ດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ໂດຍການເປັນປະທານກອງປະຊຸມຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ໂອກາດດັ່ງກ່າວ ລັດຖະມົນຕີບັນດາກະຊວງທີ່ກ່ຽວຂ້ອງ ໄດ້ໃຫ້ຄວາມກະຈ່າງແຈ້ງຕໍ່ວາລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ.

ຕາມວາລະດໍາເນີນກອງປະຊຸມ, ມີທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ, ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານ ແຫ່ງ ສປປລາວ, ທ່ານ ມາໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ປະເດີມພອນ ສົນທະນີຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກໍໄດ້ໃຫ້ຄວາມກະຈ່າງແຈ້ງ ໃນຂົງເຂດວຽກງານທີ່ຕົນຮັບຜິດຊອບ ຕໍ່ບັນດາຄໍາຊັກຖາມ ແລະ ຄໍາຖາມເຈາະຈີ້ມຂອງບັນດາທ່ານ ສະມາຊິກສະພາແຫ່ງຊາດ ຢ່າງມີເຫດມີຜົນ ແລະ ກົງໄປກົງມາ.

ຈາກນັ້ນ, ປະທານກອງປະຊຸມ ໄດ້ສະເໜີບັນດາທ່ານ ສະມາຊິກສະພາແຫ່ງຊາດ ມີຄໍາຊັກຖາມເພີ່ມຕື່ມ ຕໍ່ບັນຫາທີ່ຍັງມີຄວາມສົນໃຈ. ພາຍຫຼັງບັນດາທ່ານ ສະມາຊິກສະພາແຫ່ງຊາດ ມີຄໍາຖາມເຈາະຈີ້ມເພີ່ມຕື່ມແລ້ວ, ບັນດາທ່ານລັດຖະມົນຕີ-ຮອງລັດຖະມົນຕີກ່ຽວຂ້ອງ ກໍໄດ້ຊີ້ແຈງກັບທີ່ ເພື່ອໃຫ້ຄວາມກະຈ່າງແຈ້ງ ຕໍ່ບັນດາຄໍາຊັກຖາມຂອງສະມາຊິກສະພາແຫ່ງຊາດ.

ພາຍຫຼັງໃຫ້ຄວາມກະຈ່າງແຈ້ງແລ້ວ, ທ່ານ ທັນຕາ ກອງຜາລີ ຮອງປະທານກໍາມາທິການແຜນການ, ການເງິນ ແລະ ການກວດສອບ, ຕາງໜ້າກອງເລຂານຸການກອງປະຊຸມ ໄດ້ສະເໜີຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດສະຫຼຸບຕີລາຄາການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດ ຖະກິດ-ການເງິນ ໄລຍະ 3 ປີຜ່ານມາ. ເພື່ອເຮັດໃຫ້ເນື້ອໃນຂອງຮ່າງມະຕິດັງກ່າວ ມີຄວາມສົມບູນ ປະທານກອງປະຊຸມ ໄດ້ສະເໜີບັນດາທ່ານ ສະມາຊິກສະພາແຫ່ງຊາດ ປະກອບຄໍາເຫັນໃສ່ເນື້ອໃນຮ່າງມະຕິດັ່ງກ່າວ ຢ່າງມີຈຸດສຸມ. ຈາກນັ້ນ, ປະທານກອງປະຊຸມ ໄດ້ສະຫຼຸບສັງລວມການປະກອບຄໍາເຫັນຕໍ່ຮ່າງມະຕິດັ່ງກ່າວ.